Веровундегор гъэрхундигьой эн сервор Догъистуре Федор Щукин гировунди гуьрдлеме э товун вожиблуье пуьрсуьшгьо. Э план руз: кор э руйбирегьо эн одомигьоревоз; расундеи контейнергьоре ве жигегьоре эри хокору; дошдеи сетьгьой гIоврасундеире ве гIовбердеире ве диеш.

Чуьтам ихдилот сохди Рэхьбер Администрацие эн Сервор ве Хьуькуьм РД Махач Омаров, э май э социальни сетьгьо ЦУР э хьисоб веноре омори эз 9,5 гьозор руйбиреигьо омбарте. И э 56% кемтеи эз бирмунушигьой эн пушотеине мегь.

Омбаре руйбиреигьо бу э товун гъоимлуьи рэхьгьо э дуьруьжде шегьергьой республике ве э товун пуьрсуьшгьой ЖКХ. Гьеммей энугьо фуьрсоре оморебу э муниципальни соводигьо ве э овгъотгьо расунденигьо идорегьо эри песдеине кор.

М.Омаров тигъэт курабирегоргьоре чарунд э сер жейлее жирелуье гъозие-гъэдергьо, э хьисоб веноре оморигьо э социальни сетьгьо.

Гьечи, лов бири мэгIлуьмети э товун эну, ки етим Магомедфазил Курбетов межбури зигьисде э куче, эхи уре имид доре оморебу доре хуне те май 2026-муьн сал.

Администрацие эн Махачкале вохурди э етимевоз. Те гъэрор сохдеи пуьрсуьш хунере М.Курбетов мизию э кирое хуне эз хьисоб мисвосохдегоргьо. Уре доре миев кор ве кумеки сохде миев вегуьрде соводи.

Зигьисдегоргьой эн район «ДОСААФ» мэгIлуьм сохдет э товун вегуьрдеи муьлкгьо ве хунегьой энугьоре. Суьфде гуфдире оморебу муьлкгьо доре омори гъонунсуьз ве эзу товун бири бэхьсе-бэхьс. Э артгьой эн гировунде оморигьо кор администрацие эн Махачкале мэгIлуьм сохди ки 500 хунегьо вогордунде омори э сэхьибгьо.

Администрацие эн Махачкале хьозуьр сохди план э товун гъуьч сохдеи рэхьгьоре. План фуьрсоре омори э Минтранс эн Уруссиет.

Зигьисдегоргьой эн Ногайски район э хогьишевоз руй бирет чарунде тигъэте э гIмэмели нисдигьо овхьолет эн дуь жигей эн рэхь Кизляр-Терекли-Мектеб.

Догъистоние рэхьгьой мошингьо сер гуьрдет нисд сохде чухуригьоре.

Ф.Щукин жугьобдорлуье одомигьоре гъуллугъ дори ихдилот сохде э товун песдеине гъэрор сохдеи пуьрсуьш дореи етиме хуне.

Э товун вокурдеи контейнерни жигегьоре э регион ихдилот сохди веровундегор гъэрхундигьой эн министр тебиете ве экологие РД Ратмир Расулов.

Э 2025-муьн сал гьемме муниципалитетгьо тогIин сохдет рэхьлуье картгьоре ве э гуьнжо овурдет 1 578 контейнерни жигегьо, восдорет 6 373 контейнергьо. Имисал э гуьнжо овурде миев 1 114 жигегьо ве восдоре миев 4 129 контейнергьо. Э чор мегь эн 2026-муьн сал э регион хьэсуьл омори 245 фегьм сохде оморигьо жигегьо.

Э апрель оводу сохде омори 100 жигегьо, гьемчуьн э шегьергьо Кизилюрт ве э Агульски район гъуьч сохде омори 8 жигегьо. Э Бабаюртовски район рэхьлуье карте хьозуьр сохде омори эз вэхд зуте: оводу сохде омори 10 жигегьо э жигей 2.

Гьееки э уревоз вэхд вокурдеи 59 жигегьоре ве гъуьч сохдеи 7 объектгьоре дегиш сохде омори. Бинелуье войне, гуфдиренуьтгьо муниципалитетгьо, - зобуне гьовой рузгьо. Э «гъирмизине жиге»: Тарумовски, Кайтагски ве Дахадаевски районгьо.

Веровундегор гъэрхундигьой Догъистуре Ф.Щукин овхьолете э и сфере гуфдири зобуне овхьолет. «Плангьо, комигьоки тогIин сохде омори, веровунде нисе оморе. Жейлее муниципалитетгьо коргьоре те эхир нисе веровунденуьт. Ме варасиренуьм, э кимигьо эзугьо дегмиш бири сайловгьо, оммо зобуне овхьолет варасди. Эзу товун гьеммере, чуь не дануьсдейм э вэхди ю сохде у мегьгьо, гереки веровунде», - гуфди рэхьбер республике.

У диеш гуфди: «Жигегьой хокору – космодром Байконур нисди, гьичиш четинии э вокурдеи энугьо нисди. Угьо мие оводу сохде биев чуьтам герекиге. Эз гьер одооми эн республике пуьрсире омоге, чуьтами кор иму э иревоз, минуьт дуьдуь ве небуге еки эри эни кор».

Премьер-министре доре омори гъуллугъ и пуьрсуьше назари сохде хуьшдени ю. Э пушой муниципалитетгьо норе омори везифе – бегьем сохде коргьоре э федеральни бирмунушигьо гуьре, комики пор Догъистуре минкин дори дарафде э «савзе жиге».

Гьемчуьн э гуьрдлеме пуьруьш сохде оморебу овхьолет э кор венгесдеи ве дошдеи вокурде оморигьо объектгьой гIоврасундеире ве гIовбердеире.

Э гофгьой эн веровундегор гъэрхундигьой министр вокурдеире, архитектурере ве ЖКХ эн республике эн Бахтияр Уллаев гуьре эз 2020-муьн-20225-муьн салгьо э гIэрегьой эн Республикански инвестиционни программе вокурде омори 44 объектгьо. Э кор венгесде омори ве э баланс гировунде омори 26 объектгьой гIоврасундеи. Ве энжэгъ э товун 4 объектгьо тогIин сохде омори гъиметгьо эри гIоврасундеи, гьемме объектгьо кор сохдени гьеммишеире хуно. Бинелуье четини бири нисдии тогIин сохде оморигьо гъиметгьо ве овгъотрасунденигьо идорегьо, чуь дегмиш бирени э кор эн хьозуьре объектгьо. Эри 2026-муьн сал э программе дешенде омори пулгьо эри э кор венгесдеи 30 объектгьоре, эз комигьоки те эхир сал 14 э кор венгесде миев.

«У, чуь сохде оморени, хуб сохде нисе оморе, оммо гъэрорномегьой эн зутее штабгьо ве эри веровундегоргьо тогIин сохде оморигьо вэхдгьо войнесуьз веровунде нисе оморе. Ме муьшде эз шуьхьон низенуьм. Энжэгъ мэгIлуьм сохденуьм: угьо, ки войнесуьз э вэхди ю нисе веоровунуьт коргьоре эз кор вегуьрде миев. Эри гофгьой хуьшде гереки жугьоб доре»,- гуфди Ф.Щукин.