Сергей Меликов гировунди гуьрдлеме э товун социальни-экономически параменд сохдеи Дербентски районе. Гереклуье ве вожиблуье проектгьоре сервор республике пуьруьш сохди э рэхьбергьой органгьой хьуькуьмевоз ве эн парламент э вэхд корлуье омореи э муниципалитет.

Вокурденки вохурдеире, Сергей Меликов гуфди, ки Дербентски район – ватан эн омбаре гъэлхэндчигьой Ватани, э гIэрей комигьоки Игидгьой Уруссиет Ярамир Темирханов, Хантемир Султанов, Курабек Караев ве Муслим Муслимов.

Имбуруз мескен зу параменд бирени, оммо уре гьисди диеш омбаре минкингьо. Жирелуье минкингьо вокурде оморени э дигьлуье хозяйственни сектор ве э сафари. Э инжо барасилуь кор сохденуьт дуьруьжде компаниегьо: «Анжелина», АО «Нарима Алиева», «Алвиса», «Каспийская Лоза», «Дербент Агро» ве унигегьо.

Вожиблуье жиге э песдеине параменд сохдеи доре миев Каспийски гъирогъдерьегьлуье кластере – согъсалине курорт, комики вокурде оморени э гIэрей федеральни проект «5 дерьегьгьо ве дерьегьче Байкал» комиреки гъувот дори президент. Коргьо э объект сер гуьрде омори.

Сервор регион гьемчуьн гьово гуьрди пуьрсуьшгьой бегьем сохде не оморигьо вокурдеигьоре. Гьевел э район сер гуьрдет вокурде социальни объектгьоре э программей «Дорум Уруссиет» гуьре, комики песде сэхд сохде оморебу. Сервор республике гъуллугъ дори хьозуьр сохде тегьергьой бегьем сохдеи вокурдеире, э у хьисоб эз хьисоб налогови диремореигьо ве эн бюджетсуьзе пулгьо.

Жейлее тигъэт доре оморебу Белиджире, эже имбуруз рэхьбер республике э ер овурди Игид Уруссиете Муслим Муслимове ве вохурди э гъовумгьой лешгерчиревоз. Э гъуллугъ эн Сергей Меликов гуьре дигьбоне гъувот миду спикер эн парламент Догъисту Заур Аскендеров.