Пуьруьш сохде оморебу вожиблуье везифегьо параменд сохдеи Догъистуре э 2026-муьн сал э зир рэхьберьети эн Сергей Меликов. Э товун эни э гуьрдлеме ихдилот сохди хьуькуьметлуье секретарь эн республике Нюсрет Омаров. У риз кеши, ки э 2026-муьн сал Догъисту мие вегинуь хубе барасигьо гье бирден э е ченд тарафгьо.
ГIоврасундеи
Бинелуье объект – магистральни товгьой гIови «Чиркей–Махачкала–Каспийск». Те эхир сал товгьо мие норе биев э дуразовуни эн гьеммей гIовбердеи. Бэгъдовой варасдеи суьфдеи бэхш коргьоре гереки сер гуьрде гировунде товгьой гIовире те Избербаш, эри нисд сохде э сегIэтевоз дореи гIове одомигьоре. Объект мибу ве жиге эри вожиблуье проект «Лазурный берег».
Темиз сохденигьо дуьруьжде вокурдеигьо
Э 2026-муьн сал гузет сохде оморени желдлуье вэхд эн вокурденигьо-монтажни коргьо э хьофд дуьруьжде проектгьо э федеральни гъувотдореиревоз.
Энергетике: савзе генерацие ве кем сохдеи бедхэржигьоре
Зиед сохде миев э кор венгесдеи программей зевер сохдеи муьхькемлуьи электросетевой комплексе э «Уруссиетлуье сетьгьоревоз».
Бегьем сохде миев дуьимуьн бэхш вокурдеи Новолакски ВЭС, э Ногайски районэ кор венгесде миев офтолуье электростанцие ве коргьо гировунде миев э Махачкалински ВЭС ве э Самурски чуькле ГЭС.
Э сферей логистике ве транспорт:
Э план гуьре денишире оморени ки бегьем сохде миев дуьимуьн бэхш ве э кор венгесде миев жирелуье гьомбор «Озон» ве федеральни рэхь Р-217 «Кавказ» гировунде миев э чорризе рэхь. «Э 2026-муьн сал мие зу вокурде биев рэхь э иловлей Дербенд, Хасавюрт ве Махачкале, мие бегьем сохим коргьой вокурдеи тозе рэхь мошингьоре овурденигьо эки порт, комики миведеберуь юкгьоре берденигьо мошингьоре э гъирогъ эн кучелуье-рэхьлуье сеть эн Махачкале ве сук мисоху пробкегьоре э и жигей шегьер»,- гуфди докладхундегор.
Э гIэрей везифегьо – э кор венгесдеи учмиш биренигьо ве нуьшденигьо ризгьой эн аэропорт Махачкалере. Э план гуьре денишире оморени энжэгъ э 2026-муьн сал восдоре миев 142 жир-бе-жирее автобусгьо.
Сафари. Каспийски гъирогъдерьегьлуье кластер
Э товун омбаре объектгьо вегуьрде омори барасигьой эн Главэкспертизе, оммо э товун омбаретарафлуье меркез коргьо гировунде оморени. Республике бегьем сохди проектгьой эн чор рэхьгьоре (25 км) ве эн системегьой гIоврасундеире. Гье евэхди бесде омори игъролномегьо э 18 инвесторгьоревоз эри э гуьнжо овурдеи нумирной фонде эз 3,5 гьозор текгьо омбарте. Коргьо эри 2026-муьн сал – сергуьрдеи желдлуье вэхд вокурдеи объектгьоре.
Дигьлуье хозяйственни комплекс
Вокурде миев мейвохьэвуьждошдехонегьо эри гъэрор сохде четинигьой дошдеи бегьере. Э план гуьре денишире оморени ки э кор венгесде миев Чиркатински консервни завуд ве сер гуьрде тозеден э кор венгесдеи пешме.
Корхонегьо ве ОПК
Фегьм сохде оморени пуьрсуьшгьой э кор венгесдеи хьуькуьметлуье хогьишигьоре. Э кор венгесде миев инвестпроектгьо э гIэрей шишелуье кластер ве эн проект «Шегьер эн пойвокудухдегоргьо».
Экологие
Вожиблуье везифе – гъэрор сохдеи четинигьой хокоруре. Бегьем сохде оморени вокурдеи хокоруре вихденигьо комплексгьоре, жигегьо хьозуьри э Кумторкалински ве Дербентски районгьо. Сервор республике гъуллугъ дори зуте сохде коре эри дузгунлуь сохдеи экономикере, фегьм сохдеи корсохгьоре ве очугъ сохде гьисдигьо гъитигьоре э отрасль.
