Веровундегор гъэрхундигьой эн сервор Догъистуре Федор Щукин суьфдеи гиле гъобул сохди одомигьоре, э гIэрей комики фегьм сохди диреморигьо руйбиреигьоре ве хуьшдени ю гоф сохи э оддомигьоревоз.

Гъуллугъ дори диеш зуте гъуьч сохде бун эн четине хунере э Дербенд

Веровундегор гъэрхундигьой эн сервор Догъистуре фегьм сохди руйбиреи эн зигьисдегор Дербенде эн Санжи Агабевове. Шеш сал э зевери тебэгъэгьой эн хуне №28 э кучей э нум Умурдинове дэгъ оморени ве кара зерени.

Э план гуьре бун гъуьч сохде миемо энжэгъ э 2039-муьн сал, оммо эз дегиш сохде оморигьо толь хэйр не бири. Санжи Агабекове бирмунди э четинигьо э канализациеревоз ве э гурунд биригьо бун э сереботи омбаре бакгьо.

Веровундегор гъэрхундигьой эн министр вокурдеи ве эн ЖКХ республике Бахтияр Уллаев андуьрмиш сохди: «Хуне вокурде омори и пушогьо, эзу товун э план гуьре миест гъуьч сохде оморе э 2032-муьн сал. Э хьисоб вегуьрденки овхьолет буне, иму хьозуьрим тозеден фегьм сохде вэхде». У егъинте гуфди, эри гировунде вэхде гереки жэгIмие гуьрдлемей эн зигьисдегоргьо, песде гъэрорноме ведеберде оморени э комиссие эн министерство вокурдеи. Э гофгьой министр гуьре, проектни-сметни документгьо хьозуьр мибу э эхир июль, конкурсни коргьо гировунде миев э август, оммо коргьо бегьем сохде миев 25-муьн ноябрь.

Веровундегор гъэрхундигьой эн рэхьбер Госжилинспекцие Арсен Гаджиев ихдилот сохди, ки рэхьбер компаниере доре омори гъуллугъ буне гъуьч сохде те сергуьрде коргьо, чуьнки э вэхд ворушгьо дэгъ неев. Ф.Щукин те эхир гуш дошденки докладгьоре, гъуллугъ дори диеш зуте сохде гьемме коргьоре. «Дир нисди? Чендгъэдер зуте, унгъэде хуби – гуфди у, андуьрмиш сохденки вэхд эн 25-муьн ноябрь. – Оммо зу сохде, чуьнки гье гене тигьи бу, гIэмел ниев. И вокурденигьо коргьои, ве гереки э хьисоб вегуьрде гьемме герек гьисдигьо тегьергьоре».

Сервор республике тогIин сохди тозе назарлуье вэхд – те 1-муьн ноябрь. Гьемчуьн у гъуллугъ дори фегьм сохде пуьрсуьш гIоврасундеире ве гIовбердеире, гуфдиренки, ки и лап вожиблуье омбаревэхдине кори.

Гъуллугъ дори диеш зуте гировунде газе э хуне

Зен эн бэхшвегир СВО, омбаре гIэилгьо гьисдигьо деде Гюльпери Рашидове руй бири эки рэхьбер регион э хогьишевоз э товун гировундеи газе э хуне э куче Махачкалински э Догъистоние Огни. Кифлет нисе дануьсде зигьисде э хуней хуьшде э сереботи нисдии газ ве зигьисдени э зобуне овхьолет э келете дедеревоз ве э шуькесте гIэилевоз.

Веровундегор гъэрхундигьой министр энергетикере ве эн тарифгьой Республике Догъисту Марат Шихалиев ихдилот сохди, ки пуьрсуьш энуре назари сохдени ведоство. Э игъролноме гуьре э план гуьре, бесде оморигьо э сетевой компаниеревоз, газ э хуне гировунде миев э сентябрь эни сал.

Э хьисоб вегуьрденки овхьолете э товун комигьоки гуфдиребу Г.Рашидове, Ф.Щукин гъуллугъ дори бегьем сохде гьемме коргьоре, герек гьисдигьо эри гировунде газе э хуне, э кутэхьэ вэхд – те эхир июль. Эзуш бэгъэй, э у кумеки сохде миев эри э гуьнжо овурде расиренигьо пулгьоре – эри восдоре герек гьисдигьо газави оборудованиере- 100 гьозор монетгьо. Гереки э ер овурде, Догъисту желдлуь бэхш вегуьрдени э программей социальни догазификацие, комики минкин дорени гьовои гировунде газе эки серхьэд хуне. Льготни одомигьоре гьемчуьн доре миев пул эри восдоре ве норе газови оборудованиере э дорун хуне.