Э пресс-меркез ТАСС э Москов гировунде омори пресс-конференцие, гIуьзет сохде оморигьо э вокурдеи гьеминоние сафарлуье вэхде эн 2026-муьн сале э регионгьй Уруссиет. Э мероприятие бэхш вегуьрдебируьт нушудорегоргьой эн Хьуькуьметлуье Думе, эн федеральни ве эн региональни органгьой хьуькуьм, гьемчуьн пушобере фегьмсохгьо эн сафарлуье отрасль.
Э вохурдеи бирмунде оморебу вожиблуье тарафгьой параменд сохдеи доруние сафарире, э хьисоб дешендеки э гуьнжо овурдеи тозе сафарлуье рэхьгьоре, параменд сохдеи дерьегьлуье сафарире, хубте сохдеи инфраструктурей эн тен шушгденигьо жигере, гьемчуьн расундеи секонесуьзе форигъэтире э догълуье жигегьо.
Республикей Догъистуре э пресс-конференцие нушу дори министр сафари ве эн хэлгъие шекуьллуье мэгIрифетгьо Эмин Мерданов.
Э нушудии хуьшде у ихдилот сохди э товун гирошденигьо овхьолет эн сафарлуье отрасль эн регион ве э товун вожиблуье тарафгьой параменд сохдеи уре. Министр гуфди, ки, не денишире э зобуне гьовой рузгьо ве э четине рэхьгьо, сафарлуье инфраструктуре эн республике кор сохдени гьеммишеире хуно. Э муниципалитетгьо оводу сохде оморени сафарлуье объектгьо, хубте сохде оморени жэгIметлуье жигегьо ве параменд сохде оморени инфраструктурей рэхьгьо. Э гофгьой эн Э.Мерданов гуьре, Догъисту параменд сохдени гьемме бинелуье тарафгьорей сафарире, базургенде-варасиренигьоре, этнокультурнире, гастрономически, экологически ве дигьлуье сафарире, гьемчуьн э гъирогъ эн Каспийски дерьегь тен шушденигьо форигъэитре.
Жейлее тигъэт э регион доре оморени э параменд сохдеи гьеймогьине инфраструктурей эн тен шушденигьо жигере. Э республике э гуьнжо овурде оморени хубе жэгIметлуье жигегьо э ен дерьегь, гьемчуьн э кор венгесде оморени келе проект эн Каспийски гъирогъдерьегьлуье гуьрдноме, санаторни-курортни объектгьо, жигегьо эри кифлетлуье ве гIилие форигъэти ве э гуьнжо овурдеи тозе корлуье жигегьо.
Жейле министр гуфди э товун э пушобердеи сафарлуье минкингьой Догъистуре э федеральни ве гIэрейхэлгъие ризгьо. Республике пенжимуьн гиле бири вожиблуье хьовир э гIэрейхэлгъие сафарлуье бирмундеи МIТТ 2026 ве уре доре омори нум «Стратегически туристический регион». Гьемчуьн Э.Мерданов мэгIлуьм сохди э товун э кор венгесдеи тозе сафарлуье рэхьэ «Салам Дагестан», ве э товун гировундеи информационни сафаригьоре эри уруссиетлуье ве эн де вилеетигее сафарлуье идорегьо.
Гуфдиренки э товун параменд сохдеи желдлуье ве гъозиелуье сафарире, министр риз кеши, ки Догъисту муьхькем сохдени жигей эн е эз пушобере жигегьой вилеет э и тараф. Э регион гировунде оморени келе трейлови боржберигьо, фестивальгьо ве идмонлуье-сафарлуье мероприятиегьо. Гьемчуьн э кор венгесде оморени проект «Кавказкая тропа», фуьрсоре оморигьо эри параменд сохдеи секонесуьзе треккинге э догълуье жигегьо.
Не денишире э е коминиш буруние гъозиегьо, иму хьозуьрим гъобул сохде гъуногъгьоре, тогIин сохденки, ки Догъисту – и мескен эн гьэгъигъэтлуье вокурдеигьои, эн жирелуье базургендини ве эн кондуьллуье гъуногълуьини», — гуфди Э.Мерданов.
