Пуьрсуьш дореи хубе ГIовеовурдеире могьлугъе жергей могьлугълуье жигегьо Дербендски районе бири гъосуьтевоз жирелуье тигъэти э гуьрдлеме э зир рэхьберисохиревоз серворе районе Эльмане Аллахвердиеве.
Э пуьруьшсохи гъобул сохди бэхшвегири: Тамирлан Аджиев – кумекии дорегор министре минтебиете РФ, Садай Агаметов – сервор ООО «Геолог», Руслан Юсуфов – сервор беделе геологие ве ихдиёри дореи Департаменте эсер мэгIдонгьоре э кор венгесдеи э СКФО эсер РД, корсохгьо УЖКХ Дербендски районе.
Э корисохи вокурдеире бири фегьм сохде э вэхд ю герек гьисдигьо пуьрсуьшгьо четини гIовеовурдеи дигьбоне Мамедкале, гьемчуьн дигьгьоре Кала, Мичурино, Андреевке ве Юный пахарь. Зигьисдегоргьо и могьлугълуье жигегьоре е ченд гиле руй бири э вогуревоз э вес нисди гъэдере ве зобуне доре оморе гIове, чуь жейле гьисд сохде оморе э гьеминоние вэхд.
Э артигьо вохурдеи бири гъобул сохде гъэрорноме, комики фуьрсоре оморе э хубте биреи гъозиере. Бинелуье коревоз мибу буругъ векендеи дуь гене буругъгьоре э гIовебилогъ Даш-булаг. Гье у билогъ гьисди вожиблуь эри овурде расундеи гIове э и могьлугълуье жигегьо, ве зиёдсохи гъувотлуьи энуре гьишдени омбор зевер сохде доруние гъэдере эз мэгIдон вегуьрде гьенжиреие гIове.
Хьуькуьм Дербендски районе вегуьрди эсер хуьшде ёгъине гъэрхунди эсер дореи герекие инфраструктуре эри веровундеи и проекте. Мибу гировунде тозе рэхь эки гIовебилогъ Даш-булаг. Гье у гьишдени доре болосуьзие минкини спецтехникере эри гировундеи буругъ векендеие коргьоре, гьемчуьн асанте сохдеи песдеине гъуллугъсохи ве гъуьчсохи буругъе.
Эзуш бэгьэй, везифе норе омори коргьо эсер темиз сохдеи гьисдигьо буругъгьоре, чуь гьемчуьн хуб мисоху гешдеи ве офдеие гIове. Гене мибу буругъ векендеи ве тозегьоре, чуь гьишде э гуьнжо овурде имидие хьозуьр сохдеи гIове эри могьлугъгьо.
Гьемме э пушо норе коргьо, дешенде тозе рэхьэ нореи ве буруггъ векендеи тозе буругъе, мибу бегьем сохде те 25-муьн май. Гуьре э игърол бесдеиревоз, 30-муьн май буланмиши кеширеигьо эз беди могьлугълуье жигегьо мибу бегьем доре гIове.
Унегуьре зигьисдегоргьо дигьбоне Мамедкале ве дигьгьо Кала, Мичурино, Андреевке, Южный пахарь мидануь хэржи сохде хубе гьенжиреие гIове уже э эхир май.
И пуьрсуьш поисди э фегьмсохи Серворе вилеете Владимире Путине ве Серворе Догъисту Сергее Меликове.
