Э Догъисту гене нисд сохде эзуновлейге бире гъозиегьой сайловгьоре. Жигегир полпред Президенте РФ э СКФО Магомед Рамазанов ве Сергей Меликов гировундет корлуье гуьрдлеме э товней пуьрсуьшгьо нисдсохи бире гъозиегьо ЧС э республике.

Серворлуье гъосуьт бисдо дануьсде расунде хунегьоревоз буланмиши кеширегоргьоре эз сайловгьо. Серворлуь гьисдигьо вице-премьер Заур Эминов гуфдири э товней вихде оморигьо хории муьлкгьо.

Эри кучмиш сохде зигьисдегоргьой Мамедкала вихде омори муьлк мейдоневоз 10 га, у норе омори э кадастрови хьисобсохи, э кор венгесде омори генплан дигьбон. Э песдеине муьлк мибу дарафде э серхьэд могьлугълуье жиге, э куьндлуье вэхд сер гуьрде миёв разилуьи. Гьисди дарафдение рэхь, гьисди минкини екбиреи эки подстанцие – хьозуьр сохдеи трансформаторгьо вес биреи эри дануьсде расунде зигьисдегоргьоре электроэнергиеревоз, гьисди ве азаде гъувотлуьигьо эри газрасундеи.

«Эз гьемме вожиблуьи – у гъобул сохде омори зигьисдегоргьоревоз чуьтам муьлк, минкини эри кучмишбиреи»,- гуфдири Эминов.

У гlуьзет сохди, чуьки эри кумекии доре буланмиши кеширегоргьоре э гуьнжо овурде документгьоре гуьрд сохде омори мобильни десдегьо. Тигъэти серворгьой хьуькуьм бири руй бире э вожиблуьи гировунде гье и коре зуте э тигъэтиревоз э михьтожлуьигьо одомигьо. Э вихдеи хории муьлкгьоре эри кучмиш бирегоргьо мибу хьисоб бире гьемме герекие инфраструктуре.

Экуьнди пенж гьозор хунегьо фегьм сохде омори э Догъисту бэгъдовой сайловгьо, мэгlлуьм сохди сервор минстрой регионе Бахтияр Уллаев.

Жигегир полпред Президенте РФ э СКФО Магомед Рамазанов э ёр овурди э серворгьой хьуькуьм э товней вожиблуьи э вэхд ю нореи объектгьоре э кадастрови хьисоб.

Э артгьо гуьрдлеме серворгьой муниципальни идорегьо гъуллугъ дори эки 12 май очугъ сохде тегьер пулдореи э гьер вирсохи енебуге хэреби хуне э тигъэтлуье тегьер кор сохдеи ёгъинлуье келме э товун вокурдеи, гъуьчсохи енебуге бедел гъуьчсохи, зигьисдение жигегьо.