Э Догъисту гъуьч сохде омори 76 объектгьой дошдеи жунсогъире. Вице-премьер Абдурахман Махмудов бэхш вегуьрди э артлуье гуьрдлемей коллегие эн Министерство дошдеи жунсогъи эн Догъисту, э комики гировунде оморебу артгьой коргьо эри 2025-муьн сал ве норе омори везифегьо эри 2026-муьн сал.
Чуьтам э ер овурди жигегир сернуьш э 2025-муьн сал Догъисту сер гуьрди э кор венгесде региональни проектгьоре э гIэрей миллетлуье проектгьо «Дуразе ве желдлуье зиндегуни» ве «Кифлет». Э гIэрегьой э кор венгесдеи проектгьоре медицински идорегьо вегуьрдет:
— 171 тек санитарни мошингьо;
— 746 тек гьемогьине медицински оборудование;
— гъуьч сохде омори 76 объектгьой дошдеи жунсогъире, омбар э дигьгьо;
— вокурде омори 44 медицински идорегьо ве ФАПгьо.
Министр эн дошдеи жунсогъи Догъисту Ярослав Глазов мэгIлуьм сохди, ки еки эз бинелуье гъозиегьо, кори сохденигьо э сер зофру сохдеи муьрдеи могьлугъэ эз гьисдигьо гIэзорсуьзе нечогъигьо, и гъоимлуь ве хэйрлуь гировунде медицински фегьмсохире. Э 2025-муьн сал медицински фегьмсохире гирошдет 720,1 гьозор одомигьо (100%).
Гьемчуьн медицински фегьмсохире гирошдет 735,8 э гьеждегьсале не расирегоргьо (100%). Эзуш бегъэй, э гирошдигьо сал э 13,7 гьозор нечогъгьо декуьрде омори хун. Гьемме Гъуллугъи эн хун э 2025-муьн сал гъобул сохди экунди 16 гьозор хундерегоргьоре, 72% эз комигьоки гьеммишеине хундорегоргьои. Э Федеральни нуботнемей эн доноргьой эн костни мозг вери 4155 доноргьо-догъистонигьо, 13 дорет костни мозге (дуьдуь эз угьо э 2025-муьн сал).
Э 2025-муьн сал э Догъисту сер гуьрдет гировунде телемедицински меслэхьэтдореигьоре э жирей «духдир-нечогъ» э кумеки эн мобильни приложениеревоз, гьеймогьой ве эз мессенджер МАХ. Гьечи, эри 2025-муьн сал ижире меслэхьэтдореигьо гировунде омори эз 3 гьозор омбарте, оммо э февраль 2026-муьн сал гировунде оморебу эз 15 гьозор ТМК омбарте э гIэрей духдир ве нечогъ эз вэхд э кор венгесдеи сервисе э МАХ.
Э гIэрей гуьрдлемей коллегие эн Министерство дошдеи жунсогъи РД гьемчуьн сеч биригьо медицински корсохгьоре доре оморебу бэхшгьо.
