Догъисту э гъэд серворгьо э СКФО э сер веровундеи миллетлуье проектгьоре. Эз жэгIмие бюджете э корисохигьо э кор венгесде омори 99,2%, гье у зеверте, эз э миглее э СКФО. Сергей Меликов согъбоши гуфдиреи жугьобдорлуье рэхьбергьо идорегьо хьуькуьме э песой кор ве э пушо нори э брасилуьи э песдеине. Эз угьо, чуьтам идорегьо везифе нори э кор эн хуьшде, межбур биреи хуби ве э вэхд ю бегьем сохдеи корисохигьоре.

«Мере воисдени, эри чуь э и гъэножогъи иму э ишмуревоз вокурде коре гьечи, чуьтам иму чендгъэдерие нишоне венореним – гьевел гьемме эсер контрактацие»,- гуфдири сервор регионе.

У бирмунди вожиблуьи желдие э хуьшде вогосундеи пуледорегоргьоре эри социально-экономически параменди республике.

«Гьер пуьрсуьшгьо, комики бесде оморе э гофевоз «параменди» ек бире э гофевоз «пуледореи». Э песини салгьо гье у коргьо желди рафде. Гье у пуледореигьо, комики иму вегуьрденим, неки э гуьнжо овурде вожиблуье гереклуьи социально-экономически праменди, оммо ве кумекии доре пур сохде гъэзенжлуье беделе бюджет эн имуре эз дореи налоггьоре»,- гуфдири Сергей Меликов.

Гьечи, э республике вокурде оморе се электростанци эсер тозе энергетике, угьо э кор венгесде гене гъувотлуьигьо ве, эзуш бэгьэй, овурде э бюджет республике налоггьо э дегьигьо миллиардгьо.

Сервор регионе бирмунди: эри э хуьшде вогосундеи пулдорегоргьоре , гереки э гуьнжо овурде эри эн угьо гьемме иловлере, суьфдеи нубот гъэрор норе хориие пуьрсуьшгьоре эсер э жиге ю нореи серхьэде э гIэрей муниципалитетгьо.