Корлуье омореи эн рэхьбер Федеральни агенство э товун жэгIгири эн Илья Шестаков э Догъисту бирмунди мэгIнолуье барасигьоре ве плангьой эн песдеине зевербиреи жэгIхозяйственни комплекс регионе. Гьееки э жигегир сернуьш эн хьуькуьм Республикей Догъисту э Нариман Абдулмуталибовевоз сервор ведомство рафди э Махачкалиски жэгIи порт ООО «Порт-Петровск». Э унжо у желдлуь гировунде оморени коргьой э гуьнжо овурдеи гьеймогьине инфраструктурере.
ФГУП «Нацрыбресурс» объекте э омбаревэхдине киро дори э ООО «Порт-Петровск». Гировунде омори вожиблуье коргьо э товун оборудование ве гъуьчсохи; вокурде омори цех эри тозеден э кор венгесдеи 100 тонн килькаре э шеви-рузи, норе омори морозильникгьо, бегьем сохде омори капитальни гъуьчсохи административни беногьоре ве гьомборгьоре, гировунде омори тозе кабелгьо ве норе омори гьеймогьине энергетически узел. Мескен порт темиз сохде омори эз кугьне гемигьо, минкин доренки зиед сохде корлуье жигегьой причалгьоре.
Хэржигьо эри хубте сохдеи гуьнжуьнде омори эз 350 млн монетгьо омбарте, коргьо мие бегьем сохде биев э 2026-муьн сал. Рэхьбер эн Уруссиетлуье жэгIгири буьлуьнде гъимет дори гировунде оморигьо коргьоре, риз кеширенки вожиблуьи тозеден сохдеи инфраструктурей порте эри барасилуь кор сохдеи отрасль жэгIи эн Догъисту.
Эри песини дегьсалигьо гъэдер гуьрдеи жэгI зевер бири е ченд гиле. Э артгьой эн 2025-муьн сал гуьре регион э рынок ведиревунди эз 32 гьозор тонн омбарте гIовлуье биоресурсгьоре, умогьой кейки е сал пушоте бирмунуши бу эз 25 гьозор тонн кемте. Зевер бирени бэхш эн аквакультуре, жэгIгирие хозяйствогьой Догъисту дошде веровундет эз 8 гьозор тонн жэгI омбарте. Республике зиед сохди фурухдеи жэгI э вилеетгьой гъуншигьо – Азербайджан ве Казахстан, фуьрсоренки э унжо эз 1200 тонн молгьой жэгIгире омбарте.
Э товун вожиблуье везифегьой параменд сохдеи отрасле гуфдири сервор Догъисту Сергей Меликов: хьуькуьмет дорени пуллуье кумеки, доре оморени пулгьо эз республикански бюджет, мерэгълуь сохде оморени сэхьиблуье инвестициегьо э сферей аквакультуре ве э вокурдеи гьеймогьине корхонегьоре эри тозеден э кор венгесдеи жэгI. Э план гуьре денишире оморени ки э и куьнде вэгIэдо э кор венгесде миев дуьруьжде инвестиционни проектгьо – «СК-Аква» ве «Ирганайски чобогъ», гьемчуьн вокурде миев завуд эже тозеден э кор венгесде миев жэгI ве хьозуьр сохде миев проект «Ачикольски дерьегьчегьо».
Гьемме э Догъисту э хьисоб веноре омори 214 корхонегьо, комигьоки кор сохденуьт э жэгIвоз, э и хьисоб 126 фермегьо э товун аквакультуре ве 88 жэгI гуьрденигьо корхонегьо.
