Омборте 3 гьозор тонн пешме ведебердеи Догъисту э вилеетгьо куьнде эз серхьэд эуло.
Жигегир Сернуьше Хьуькуьме Догъисту Ризван Газимагомедов гъобул сохди бэхшвегири э гуьрдлеме ГIэрейидореие рэхьберисохие бинере эсер пуьрсуьшгьо параменди фурухдеие пешме э е гъэдер мескен Уруссиете, комики гирошди э шегьер Москов э зир рэхьберисохи суфдеи жигегире сернуьше Несиете Федераци Андрее Яцкине.
Э гъэд вожиблуье везифегьо Андрей Яцкин нуме гирди веровундеи ёгъинлуье проектгьоре э жигегьо синогъие регионгьоре. Сенатор бирмундеи тигьэте э гъосуьт гъэлхэнди хэржисохдегоргьой пешмие молгьоре – гъусо рафде э товун фурухдеи э маркетплейсгьо, эже вохурде молгьо, пешме э гъэд комикигьо сеч биреигьо дуь эз еки мэгIлуьм сохдеи.У огол зери зевер сохде вожиблуьи жирей корисохире э азадлуье сертификациревоз «Пешм Уруссиете»ве зиёдте фирегъ сохде э кор вегесдеи уре.
Гуфдире э товун параменди пешмие сэхьиблугъире э регионе, Ризван Газимагомедов бирмунди, чуьки Догъисту вегуьрди суьфдеи жигегьо эсер корхонегьо пешме омборте 14 гъозор тонн гьер сал, чуь гуьнжуьнде эки 36% эз жэгIмие доруние гъэдер пешме, комикире э гуьнжо овурди э Уруссиет, ве омборте 65% эз жэгIмие доруние гъэдере э СКФО. Молгьо корхонере берде оморе чуьтам э регионгьо Уруссиете, гьечи э республике Беларусь. Э песини салгьо эз Республике Догъисту ведеберде омори э Беларусь, Китай ве Казахстан омборте 3 гьозор тонн пешме э гъэдер 2,3 млн долларгьо США.
«Э гъэд параменди пешмедегишие сэхьиблугъи пушоки дире дануьсде хьуькуьмлуье кумекии э жире дореи субсидие промышленни корхонегьоре э вогорундеи беделе хэржилугъигьоре э восдореи оборудовани эри дегиш сохдеи пешме ве черме хьэйвуй хунеигьоре, те 70% хэржигьо, оммо не омборте 100 млн монет екире проекте. Э республикански бюджете э гирошденигьо сал пушоки дире дануьсдеи овгъотгьоре э гъэдер 100 млн монет. Эзуш бэгъэй, э гъэд веровундеи корисохигьоре «рэхьие карте» э республике э гуьнжо овурде омори промышленни десде эсер дегиши пешме, э комики дарафди 8 корхонегьо э жэгIмие доруние гъэдеревоз пуледореигьо э 343,6 млн монет ве э гуьнжо овурдеиревоз 147 корисохие жигегьо».
Э гъэд гьемкоркии Догъистуре ве Беларусе корхонеревоз ООО «Кавказски пешм» э сер дореие везифе хьозур сохде синогъие беделе школеи жилетгьоре э гъэдер 13 636 доне. Гьонине вэхд жэгIмиесоводлуье идоегьоревоз восдоре омори омборте 10 200 жилетгьо, хьозур сохде белорусски корхонегьоревоз эз догъистуние пешм.
Гьисди эрзо гене э 6 гьозор жилетгьо. Гьимет еки школеи жилете эри жэгIмиесоводлуье идорегьо республике гуьнжуьнде эз 650 те 850 монет.
Э гуьрдлеме бирмунди гьемчуьн нушудорегоргьо Республике Калмыкие, Карачаево-Черкесски Республике, республике Бурятие, Республике Тыва, Забайкальски ве Ставропольски улкегьо, эже параменди сохде лугъонде дегиши гусбендие пешме.
