Э сернуьшсохи спикер Заур Аскендеров гирошди гуьрдлеме 51-муьн сессие Хэлгъи Гуьрдлеме Республике Догъисту VII созыве. Э мероприятие бэхшвегир бири сервор республике Сергей Меликов, корсохгьо хьуькуьм, рэхьбергьо ведомств, сервор Махачкале, жэгlмиети корсохгьо, гьемиге деде суьфдеи Игид Уруссиет Нурмагомеда Гаджимагомедова Сапижат Мазаева.
Э вокурдеи гуьрдлеме, Сергей Меликов мэгlлуьм сохди э регион э товун сергуьрдеи Сал еклуьги хэлгъгьой Уруссиет, мэгlлуьмети доригьо президент Владимир Путин. Сервор Догъисту риз кешири жирелуье мэгlэнолуьи гье и гъосуьт эри эз гьемме омборемиллетлуье ватан.
«Тейте уруси игид гъэреул сохде гъэдиш мусурмуре, тейте гъуллугъчи дин-догlот хочперези ве мусурму минет сохде эри лешгерчигьой иму, тейте иму дениширеним э чумгьой дуь еки боворинлуь ве хьуьрметлуь – иму бибесгъунлуьим», — гуфдири Сергей Меликов.
У гьемиге гlуьзет сохди еклуьги рол жирелуье довгlои операцие, эже душ эки душ гъуллугъ сохде нушу дорегоргьо жире-бе-жирее хэлгъгьо.
Спикер парламент Заур Аскендеров бирмунди тигъэти жирелуье рол депутатгьоре э муьхькем сохдеи еклуьгире.
«Гьерки эз иму нушу доре район хуьшдере, шегьере. Гьэгъигъэт э жигегьо, э гофсохи э одомигьоревоз ве хьэсуьл оморе гьэгъигъэтлуье еклуьги», — гlуьзет сохди у, э гъуллугъ дореи депутатгьоре желдлуь дарафде э кор веровундеи.
Э вэхд сессие бири гировунде оморе бэхширеи. Сергей Меликов дори э гlуьзете овхьолет депутате Имаме Яралиеве гlуьзетлуье нишон «Эри рэхьмедуьли ве мисво сохдеи». Дирте спикер Заур Аскендеров гьемиге бэхшири уре Гlуьзетлуье грамотеревоз парламенте.
Депутатгьо фегьм сохди жерге серворлуье гъонунепроектгьо. Э суьфдеи хундеи бири гъобулсохи э хьэвес спикер гуьро проект гъонуне, гьисдигьо э хубте сохдеи гъозиегьо ватанхогьи вомухундеи.
«Гъосут фегьм сохде оморенигьо гъонунепроект – сэхд муьхькем сохде уре, чуь гьисди бине ватанхогьи: данани торих, хьуьрметлуьи эки келетегьо, гъэножогъи эрхэгьо ве хьозуьрлугъи э вилеет гъуллугъ сохде», — гъондуьрмиш сохди Заур Аскендеров.
Гьемиге парламентаригьо тогlин сохди кандидатурегьо гlуьломи дивусохдегоргьо, суьфдеи бо норе оморигьо дивусохдегоргьо дори присяга. Бири гъобул сохде оморе э суьфдеи хундеи проектгьо гъонунгьоре, гьисдигьо гъэножогъи жирелуье хунеи фонд, объектгьо культури мироси ве Кодекс э товун хьуькуьмлуье гъонунепузмиши РД.
Э дуьимуьн хундеи бегенмиш сохде омори гъонун э сфере гьемшегьери хуьшден рэхьберисохи, муьздсуьзе юридически кумекии, зуте мэгlлуьм сохдеи гъонунепузмиши жогьилгьоре, соводи, аквакультури ве параменди хозяйство дигьбони.
Э эхир сессие бири гировунде бэхширеи. Медаль «Эри кумеки дореи э довгlо гирошдеи» нушу дори сернуьш комитет э коргьой ветерангьо Абдулла Магомедов. Гlуьзетлуье грамотевоз парламенте бэхшире омори бэхшвегир СВО, рэхьбер отдел правовой рэхьбери Шамиль Эмиргамзаев. Депутатгьо гьемиге тогlин сохдет кандидатуре Светлане Гамзатова э корсох Жэгlмиет палате Догъисту.
