Руьхсет сохит нушу доре э ишму гъиметлуье зене, коминире сеч сохде сенигlэтлуье «тербиедорегори» сес э герме тегьер сес сохдеи ве дорундуьли кумеки сохде гъулбенди хуьшдере. Нум эну Галина Петровна Давыдова, эз хьэсуьл омореи Садыкова. Гьэгъигъэт э гье и нумевоз дануьсде уре омборе тербиевегуьрдегоргьо: гьечи уре воисди нум хуьшдере гуьрде, асант сохде жирей гуфдиреи эри чуькле тербиевегирдегоргьой хуьшде. Оммо хьэсуьл омореи, 10-муьн февраль 1934-муьн сал, деде-бебе дори уре раче жугьури нум Гинонор.
Э кифлет Гинонор хьэсуьл омори диеш дуь гlэилгьо, оммо гьердуь муьрдет э зуине гlуьмуьрлугъи, гьеле те сергуьрдеи Келе довгlой Ватани. Нум бебей духдер бу Панул Ильфиевич Садыков, хьэсуьл омори у э 1912-муьн сал. У кор сохди э колхоз нум Ленина ве бу желдлуье бэхшвегир партие, бисдо еки эз суьфдеигьо зигьисдегоргьой Дербенд, верзуьнде оморигьо (э 1938-муьн сал) орден Ленина мэгlлуьмлуье жофолуье барасигьо. Не денишире э джебе, Панул э войге хуьшде гуьре рафди э довгlо ве телеф бири э гъовхо э пушой Моздок э 1942-муьн сал. Гъисмет эну мунди мэгlлуьмсуьзи, ве омборе салгьо Галина гешди гьерки гириш нишоне бебере, руйбире э гьемме биренигьо идорегьо, оммо гьечи не дануьсди офде дим-дузе тараф бире жиге ю. Гьер сал, гировундеи мигlид Руз Бараси, у рафди э Моздок, эри чуьки гlуьзет сохи ёргири мэгlлуьмсуьзе лешгерчигьо, гъовхо бердигьо э унжо. Теклуье кук хуьшдере Галина гъэрор нори доре нум э хотур бебе.
Гьемме гъэйгъу кеши э товун кифлет дегешди э душ дедей Галине, Рахили Авниловны Абрамовой, кор сохдигьо э гьемшегьери консервни завуд. Зен жофо кешири хуьшдере гъимиш ние сохдени, хьэрекети сохди дануьсде расунде теклуье духдер хуьшдере гьемме гереклуьигьоре, доре уре минкини вегирде хубе соводи. Гье и синогъи э гуьнжо овурди жирелуье гъэножогъи Галине эки зиндегуни гурундигьо ве несигlэтдори гьис жугьобдорлуьи ве гъэйгъукеши – неки эки куьндлуьигьо, оммо ве эки гьемме гъулбендигьо.
Миглее данани Галине вегуьрди э школе №115 шегьер Дербенд, песде дарафди э гьемшегьери педагогически тербиедорение идоре. Муьгьбет эки хундеи ве войге бэхш сохде данани бисдо бинелуье бирмунуши эри эну биёвгьо вэхд корисохи. Хьэрекети несигlэтдореи жогьиле эрхэ, тербиедоре угьоре э рэхьмедуьли ве хьохоми бисдо серворлуье гъосут зиндегуни эну. Гьэгъигъэт суьфдеи тербиедорегоре нум доренуьт дуьимуьн деде, эзу товун чуьки у бирени суьфдеи рэхьбирмундегор э гlуьлом данани ве вомухундеи инсони верзуьшигьо.
Э 1956-муьн сал Галина гуьнжуьнди муьхькемлуье кифлет. Шуьвер эну Захар Адиянович Давыдов хьэсуьл омори э 1931-муьн сал. Зигьисдет зе-шуьвер э гъовуме шегьер хуьшде Дербенд. Бебей шуьвер, Адинья Давидович Давыдов (1909-1969), гирошди гьемме довгlоре, бири бэхшвегир э штурм Берлин ве гьишди хэтнуьвуьси э дивор Рейхстаг. Деде шуьвер, Гефер Ифраимовна Галилова, гlуьзетлуь бири зэхьметхогьиревоз, желдлуь бэхшвегири сохди э тербие невегьо.
Тербиесохе корисохи Галине сергуьрди э 1959-муьн сал, кейки у бисдо несигlэтдорегор гlэили богъче. Эзуновлейге, э 1961-1964-муьн салгьо, кор сохди тербиедорегор суьфдеи классгьо э дигь Джалган, эз гурунди гирошде келе рэхьгьоре пейде эз онгурбогъгьо. Э 1964-муьн сал гирошди э хьэшдсали школе №7 шегьер Дербенд, э 1968- муьн сал бу гировунде оморе э тозе школе №19. Э гьемме жигегьо, эже ми кор не сохди Галина Петровна, у бирмунди меселен бофолуьи кор хуьшдере, дореи гьеммей хуьшдере э кор ве сохде гьемме минкинигьоре, эри чуьки вокурде очугъ сохде минкин гьерки хундегоре.
Бэгъдовой 30 сал желдлуье тербиедореи корисохи Галина бири бэхшире гlуьзетлуье нум верзуьшлуье тербиедорегор. Э 1989-муьн сал, кейки омори пенсионни гlуьмуьрлугъи, Галина ведарафде рафди эз школе эшгъсуьз, не денишире э ихдиёри рафде э пенсие диеш зуте – чуь омборегlэили деде. Ведарафдеи э верзуьшлуье форигъэти, у диеш мунди бедел школеи жэмигlэт, дошди герми гьис бесдеи эки гьевел биригьо хундегоргьо ве гьемкорсохгьо.
Э кифлет Галине ве Захар хьэсуьл омори шеш гlэилгьо: пенж духдер ве теклуье кук. Э хотур тигъэти ве гъэйгъукеши деде-бебе гьеммейки вегуьрди хубе данани. Келеи духдергьо бисдо филологгьо, варасде бегьем сохдет Догъистуни хьуькуьмлуье университет, кук тербиевегуьрди э Воронежски политехнически институт, угьонигейге духдергьо вихдет медицини сенигlэт. Омборгьо эз кифлет гирошдет э Исроил ве Бинелуье Уруссиет, оммо дошдет тенге гъэножогъигьо дуь э екиревоз.
Эхирлуье фикире нушу дореи, воисдени гlуьзет сохде, чуьки Галина Петровна гьисди меселен гьэгъигъэтлуье офирегор инсони гъисметгьо. Чуьтам гьэгъигъэтлуье шекуьлкеш, у гуьнжуьндегор зиёдгуьзелие одомигьо эз хуьшдени несигlэтвегиргьо, рэхь дори параменди угьоре ве э гуьнжо овурди хубтее хосиетгьоре. Торих зиндегуни эну мунди э дуьлгьой эн угьо, эри ки бэхд бири хунде эки эну, чуьнки гьэгъилуье тербиедорегор зигьисдени э гьер ёровурдеи ве комининиге сохде кор тербиевегуьрдегоргьо ю.
«СЕРЗЕРЕИ ДУЬНЬЁГЬ ЭЗ ГЬЕММЕ ТЕРБИЕВЕГУЬРДЕГОРГЬО!» — гье и е келме гоф нушу доре лугъонде гlэжоиби ве хьуьрметлуьи, коминире синемиш сохди гьер эрхэ хундегоргьо, гирошдигьо эз десгьой хьохомлуье вомухундегор.
Нуьвуьсди Стелла Давыдова
Тержуьмесох Ильканаева И.
