Томоше «Огъили» э пьесей эн догълуье-жугьурие нуьвуьсдегор эн Хизгил Авшалумов бирмунде оморебу э Аварски театр эн Махачкале.

27-муьн июнь Аварски театр эн Махачкале бирмунди томошере «Дур цIар ахIулаго…» «Огъили» э ихдилот эн догъистоние догълуье-жугьурие шогьир ве драматург эн Хизгил Авшалумов гуьре. И могьбуллуье ве эз дивэгI жун гирошденигьо гъозие э гъосуьт эн Буьзуьрге довгIой Ватани. Томошере хьозуьр сохдет верзуьшлуье возирегор эн Республикей Догъисту Разият Дибирове, режиссер постановщик – верзуьшлуье возирегор эн Республикей Догъисту Заур Алиев. Гъозие гирошдени бэгъдовой довгIое салгьо. Келете зен ве шуьвер зигьисденуьт э динже зиндегуни ве гузет сохденуьт кук хуьшдере, комики э довгIо рафди э войгей хуьшде гуьре. Э пушой рафдеи э довгIо, кук гуфди эз деде: «И гъэрхунди мени!».

Рэхь сохденки куке э довгIо, деде весиет доребу гъовхо берде те Бесгъуни, бирэхьмлуь куьшде дуьшмене, оммо дуьл деде эдембу лов бире эз дерд. Деде ве бебе бовор сохдебируьт, ки кук вогошде миев зинде ве жунсогьлуь. Оммо кук не омори, у дешенде оморебу э нуботномей эн нисд биретгьо мэгIлумсуьз. Э гьичиш не денишире, деде ве бебе бовор сохденуьт, ки е теке кук энугьо вогошде миев зинде, гьеммише гуш дошдембируьт э сесгьо оморембугьо эз песой пенжере, гьер куьфдеире э дер…

Деде эз дуьлдерди муьрдени, гузет не сохде куке эз сэхьрой гъовхо. Бебе зигьисдени э тэхьнои. Могьбуле шекуьл зиндегунини, жирей зиндегуни, гоф сохдеигьо, гузет сохдеи вогошде омореире эз довгIо е теке куке екиреш бигIор не гьишди.

Томоше э хьэвес венгесдени хубтее инсоние гьисгьоре, ижирегьоре чуьн езугъбери, дуьлсухуни, инсоне хосдеи ве диеш. Э томоше бэхш вегуьрдебируьт: верзуьшлуье возирегор эн Республикей Догъисту Разият Дибирове (Деде), Шамил Исмаилов, Магомед Дудаев ве унигегьо. Э томоше хунде оморебу дестонгьо эн Расул Гамзатов.

Нуьвуьсди Ирине Михайлове.

Тержуьме сохди Ильягуева А.