Хьуькуьмгьой Догъисту борж э жейлее вокурдеигьоревоз ве э кор венгесде комплексни параменди е гъэдер мескен э Махачкале ве Каспийске.
Сервор Догъисту Сергей Меликов гировунди гуьрдлеме Координационни несиете э сер параменди агломерацие. Бинелуье гъосуьт – боржбери э гъэтмегъэришие вокурдеиревоз ве гирошдеи эки комплексни параменди е гъэдер мескене.
Меликов риз кешири, чуьки жейлее вокурдеи неки дегмиш биреи параменди агломерацие, оммо ве терс доре секонеисуьзи одомигьоре. У э ёр овурди э товун ловсохи газе э редукторни дигьбон Махачкале: «Вокурдеи берде хьисобисуьз сохдеи, площадкесуьз, жигегьо эри форигъэти, парковкегьо ве иловле эри нечогъэ одомигьо. Гье у гъонунепузмиши шегьеревокурдение гъэдере».
Имогьой гьер вокурдение проектгьоре мибу бегенмиш сохде энжэгь бэгъдовой разисохдеи э жейлее министерствегьоревоз ве фегьмсохи э несиет. Э гофгьой серворевоз республике, ижире корисохигьо «дегиш мисоху веди шегьергьоре ве дегиш мисоху шегьеревокурдеие жейлее фикиргьоре
Гирошде эки еклуье вокурдеигьо
Министр вокурдеигьо Бахтияр Уллаев гуфдири, чуьки э Махачкале ве Каспийске дешенде омори коргьой комплексни параменди е гъэдер мескен (КРТ). Э песой е сал фегьм сохде омори проектгьо – 14 э Махачкале, 4 э Каспийске. Гъэдер уже вегуьрди руьхсет, мундегьо – песде.
Вожиблуьи доре неки вокурдеи хунегьоре, оммо ве э гуьнжо овурдеи инфраструктуре: иженерни, социальни, транспортни. Вожиблуье минкинигьо эри зиндегуни: хубе хьэётгьо, жигегьой эри возиреи г1эилгьо, парковкегьо, контейнерни жигегьо, хубе иловле.
Поюнде гъэллее фегьмсохигьоре
Суьфдеи вице-премьер Манвел Мажонц бирмундеи тигъэте э никиеномуссуьзе вокурдегоргьо, комики овурде э фегьмсохи проктгьоре техническисуьзе игъролевоз, норе справкере э жигей официальни когъоз. Фегьмсохи э ижире овхьолгьо гировунде жейлее компанигьоревоз. Сервор регионе гъэдэгъэ зери Минстрое ве Минюсте фегьм сохде гъонунлуье корисохи эн угьоре ве э сер гъонунепузмишигьо доре молгьоре э ихдиёригъэреули сохдеие идорегьо.
Тозе гъэножогъи эки параменди Махачкале Ве Каспийске
Жигегир серворе Махачкале Тимур Галбацов шинох сохди э везифегьоревоз: дебе сохдеи эз жейлее вокурдеи, веровундеи Генплане, э гуьнжо овурдеи микрорайонгьоре-спутникгьоре, Жейле э софуне бедел шегьере. Гье у биё хилос соху бинере ве хубте сохдеи гъэдергьой зиндегуни шегьеригьо. Проектгьо мибу веровунде э хуьшде вогосунде пуледорегоргьоре ве эз хьуькуьмлуье – жейлее гьемкоркии.Э Каспийск, э гофгьой Наби Амирове, бинелуье проектевоз бири вокурдеи гъуногъхонее комплексе мейдуневоз 62 гьозор кв.м. э 222 нумироревоз, хьэвуьзевоз ве гешдение жигегьоревоз. Жирелуье тигъэти доре параменди экуьнди гъирогъие жигегьо, везифе нори мастер-везифегьо э 35 гектаргьо эки дерьёгь.
Фегьмсохи э песой веровундеи
С.Меликов э ёр овурди, чуьки параменди агломерацие – ёгъинлуье везифеи. Гьемме проектгьо веровунде эз коргьой КРТ, чуьки зомин дореи комплексни ве разилуье гъэножогъи. Сервор регионе гъэдэгъэ зери вегуьрде э фегьмсохи программере кучмиш биреи хэребеие хунегьоре, фегьмсохи жейлее дениширеи ве хуби гьеммей тозе объектгьоре.
