Э Муниципальни театр тати эн Дербенд гировунде оморебу томоше, гIуьзет сохде оморигьо э 80-сали эн Буьзуьрге Бесгъуни.
Томоше э гуьнжо овурде омори э гъозиегьой зиндегуни эн башкирски нуьвуьсдегор Урал Галлеев «Мизиим» ве гIуьзет сохде омори эки 80-сали эн Бьзуьрге Бесгъуни. Режиссер – верзуьшлуье корсох мэгIрифет эн Рспубликей Догъисту Джамбулат Габибов.
Э пушой сергуьрдеи томоше эки гъуногъгьо руй бири сервор театр Борис Юдаев. У гуфди, ки э сал 80-сали эн Буьзуьрге Бесгъуни вожиблуьни гуфдире ве э товун эну, чуь гирошдебу дур эз пушоие – э дорун, эже одомигьоре герек бу зинде мунде, борж берде ве гъурбуни бире. «Томоше «ГIэзиет кеширетгьо эз довгIо» — и расде ихдилоти э товун эну, чуьтам довгIо хуьрд сохдени гъисметгьоре, шуькест сохдени дуьлгьоре ве э гъувотевоз гьишдени сохде уре, чуь суьфде гьич ни сохдим» — гуфди Борис Юдаев.
Томоше ихдилот сохдени э товун гурунде гъисмет зенгьо э дорун – э товун довгIо, э комики, сес ерэгъгьо нисе оморембу, гье гьчуь зулумлуь хуьрд сохдембу зиндегунири. Бинелуье игид – зен, шуьвер комики нисд бири хэберсуьз э довгIо. Гиснеи, терс эри гIэилгьо, э тэхьнои биреи ве гереклуьи сохде гурунде несигIэтие гъэрорноме – эз гIэрей гьеммей энугьо герек бу гирошде, эри зинде мунде ве дошде гIэилгьоре.
Э гуьнжо овурдеи сегьнере дим-дуз бирмундембу овхьолет томошере: гьемме томоше гирошде оморебу э е чуькле хуне, эже бу овхьолет косиби ве дуьлдэгъэи. Э гуьнжо овурдеи – кеме дуьрлуьг, торике товуш, тигьине шуьлхьон – гофсуьз гуфдирени э товун четинигьой дорун, э товун эну, чуьтами гурунде зиндегуни бу зенгьоре гуьзет сохденки хэбергьре эз довгIо.
Музык – нэзуьке, дуьлдэгъэине, — зиед сохдебу гьис эн дуьлдэгъине гузет сохдеире. Гьемме гьееки и э гунжо овурдембу согъе, лугъонде егъинлуье шекуьл зиндегунире э салгьой довгIо, эже гьер деталь кор сохдембу эри доре жэгIмие хьол дорд дореире ве чоресуьзире.
Э томоше возиребируьт возирегоргьой театр: Лаура Изгияеве, Александр Рабаев, Христине Абдуллаеве, Лиана Нагдимунове. Гьемчуьн жовоне возирегор Азиза Тагирове, лап рач возиригьо духдер эн бинелуье игиде.
Лап гъувотлуье возиренигьо коргьоре, жейле рол зенгьо, пур гьисдигьо э дердевоз, э доруние дуьлдъэгъэиревоз ве э бирмунде нисе оморенигьо гьисевоз. Томошесохдегоргьо, сес не сохде, гуш дошдембируьт гьер гофе. Жовоне Азизе лап хуб возири гурунде рол хуьшдере. Оммо песини гъусот эн игид Раисе комиреки возиребу Христине Абдуллаеве гIэжоиби сохди томошесохдегоргьоре ве эз чумгьой энугьо гIэрс оморебу. Э эхир томоше сервор эн идорей базургенди эн администрацией шегьер Самиля Наджафове эз возирегоргьо гуфдири согьбоши эри хубе ве дорундуьлие возиреи.У риз кеши, ки томоше лугъонд бирмундени уре, эз чуь гирошдет зенгьо э салгьой довгIо, эхи гурундигьой вирсохи, гъэйгъукшигьо э товун кифлет ве жофо э дорун веноре оморебу э сер душгьой энугьо.
Нуьвуьсди Джамиля Хафиз.
Тержуьме сохди Ильягуева А.
