Э песой песини е ченд сал э Догъисту хьуькуьмгьо регионе фуьрсоре омборте 400 млн монет э восдореи 500 гьозор хундение книгьо э гъовумлуье зугьунгьо. Ижире пулдореи э коргьой параменди гъовумлуье зугьунгьо э песой песини дегь сал э республике не бири.
Сернуьш Хьуькуьм Догъисту Абдулмуслим Абдулмуслимов э корисохие омореиревоз сер кешире Лакски районе республикере.
Еки эз объектгьой серкеширеи бири Кумухски миглее школе э нум Мусе Манарове – мэг1луьмлуье э вилеет космонавте.
Премьер-министр винире гьовой школере, гофсохи дуь э екиревоз э тербиедорегоргьоревоз ве хундегоргьоревоз.
Чуьтам очугъ сохде, э школе кор сохде е ченд тербиедорегоргьо, комиоре гьисди гъэдер корисохи э вэхд гуьре эз 30 те 40 сал.
Абдлмуслим Абдулмуслимов гъэдэгъэ зере доре молгьоре э тербиедорегоргьой школе эки дореи г1уьзетлуье нум «Верзуьшлуье тербиедорегор Республике Догъисту».
Меслэхьэти э тербиедорегоре хуне Кумухски СОШ зиёд сохдеи э пуьруьшсохиревоз э вэхд ю герек гьисдигьо четинигьо – вес нисди дананигьо догъистунигьоре гъовумлуье зугьунгьоре.
Чуьтам бирмунде э корисохи меслэхьэти, гъэдер дануьсдегоргьой гъовумлуье зугьунгьо лап бири кем. Четинигьо э вэхд ю герек гьисдигьо эри гьеммей муниципалитетгьой регионе ве гъэрор норе уре гереки эз школе.
Абдулмуслим Абдулмуслимов мэрегълуь бире э фикиревоз тербиедорегоргьоревоз э товун войней, комики корисохи э и четинигьо. Э гъэд ижире угьо гуфдире вес нисди гъэдер сэг1эт эри «Гъовумлуье зугьун» э хундение программе, вирсохдеи зигьисдегоргьой республике кифлетлуье дингьо бердеи гоф сохдеи дуь одоми э гъовумлуье зугьун.
Гуфдире э товун герекии дошдеи гъовумлуье зугьунгьоре, Сернуьш Хьуькуьм Догъисту Абдулмуслим Абдулмуслимов бирмунде, чуьки э песой песини е ченд сал э Догъисту хьуькуьмгьо регионе фуьрсоре омборте 400 млн монет э восдореи 500 хундение книггьо э гъовумлуье зугьунгьо. Ижире пулдореи э коргьой параменди гъовумлуье зугьунгьо э песой песини дегь сал э республике не бири.
«Оммо мере воисде е гъэдер расире ве екейге четини – тэхсири бебе-деде, комики э хуне нисе гоф сохде э г1эилгьоревоз э гъовумлуье зугьунгьо.
Мере гьемите гьисди г1эилгьо ве невегьо, ве э хуней эн иму гирошде женг э товун, чуьки угьо э г1эрей хуьшде гоф сохде э уруссиетие зугьун.
Эри, иму биё согъбоши гуфдире зугьун уруссире ве уруссиетие тербиедорегоргьоре, комики э 40-60-муьн салгьо э фурсореиревоз оморе эз раче шегьергьой буьзурге Уруссиет ве, кейки имуре не бири е жиреш комунальни гъуллугъсохи ве инфраструктуре, мунде э догъгьо ве хунде имуре. Уруссиетие культуре ве уруссиетие зугьун лап омбар ег1ни э поисде жигере гуьрде миллетлуье культуре эн имуре. Оммо иму нисе биё фурмуш сохде ве гъовумлуье зугьунгьоре. Вожиблуье кор зугьун э у, чуьки у дошде культурере ве гировунде уре эз эрхэ э эрхэ. Унегуьре дошдеи гъовумлуье зугьунгьоре – норе везифе ве хьуькуьме, ве жэг1миете,ве гьер кифлет э бешгъэ»,- бирмунде Абдулмуслимов.
Гъэножогъи эн хуьшдере гуфдире ве министр соводи ве г1илми Догъисту Яхья Бучаев. «Минобрнауке Догъистуре э гирошденигьо мегь эсер кумекии дореи Федеральни институте гъовумлуье зугьунгьо гировунде курсгьо зевербиреи дананигьо тербиедорегоргьоре. Э и зуригьо э гьемме школгьо республике бегъем нуьвуьсде диктантгьо э гъовумлуье зугьунгьо. Гемчуьн э регион везифе норе дешенде ОГЭ (э вихдеи хундегоргьо) э гъовумлуье зугьунгьо»,- ихдилот сохде Бучаев.
Сервор Минобрнауки Догъисту гьемчуьн бирмунде, чуьки гъэдер сэг1этгьо, доренигьо э хундение план э английски зугьун нехэбереки гъисмет бире э гъэдер сэг1этгьо пушоки дире дануьсдеи э хундеи гъовумлуье зугьунгьоре.
Ме хосде серворе Федеральни институте гъовумлуье зугьунгьо э сереботи саре риз гъэдерпуьи данани тербиедорегоргьой гъовумлуье зугьунгьоре, э гуьнжо овурде курсгьо. Федеральни институт гъовумлуье зугьунгьо э гуьнжо овурде лап хубе курсгьо, э комики э четиниревоз оморе тербиедорегоргьо гьовумлуье зугьунгьо. Гье у четини мунде гьечи ве гъэрорномесуьз.
