Асаил Хияевич Бинаев хьэсуьл омори э 1882-муьн сал э Дербенд. Данани вегуьрди эз раввин, песде гъуллугъи сохди хазани (ихдиёри гъэдиш хунде) э Келе Нумаз Дербенд «Келе-Нумаз».

Шогьир ве нуьвуьсдегор Хизгил Давыдович Авшалумов э еки эз книггьой хуьшде нуьвуьсди: «Асаил Бинаев бу ведилуье эз хуьшде мерд: гьуьндуьр, инчебел, э дуьлтиже ве э хуьшде вогосундение чигьретгьо сиечердеи сифет. Бири сэхьиб зиёдгуьзелие сес оперни мэгlни хундегор ве зиёдгуьзелие жирей гуфдиреи. Э жирей гуфдиреи эну гьеле асантие гофгьо чуьтамигеш бирени жирелуье сеслуье гъэдуьр». Мэгlрифет эну ве рачи не мунди тигъэтисуьз. Асаил Бинаев зен хосди э чуьклеи духдер Шомоила Авшалума Ханукаева (лап мэгlлуьмлуье э у вэхд одоми э жэгlмиет дин-догlоти жугьургьо), Ёвдит. Омборгьо э жэгlмиет дин догlоти фикир сохди, чуьки у поисде сервори сохдеи эну ве мибу келеи равин. Оммо зиндегуни деберди дегишбиреигьо. Асаил Бинаев шинох бири э гъолхмишчигьоревоз Якове ве Софье Маркусгьоревоз, сергуьрдеи сер кеширеи кружок угьоре ве хуьшдере терг сохди эз дин-догlотие нум.

Э Асаиле ве Ёвдите бири хьэшд гlэилгьо. Э 1928-муьн сал Бинаев А. бисдо Сервори редактор гозит «Захьметкеш» («Жофокеш»), дофус зере оморенигьо хьэрфоревоз иврити хьэрфноме э догъи-жугьури зугьун, э 30-гьо салгьо бежид дофус зери э верэгъгьо дофусзереи эн хуьшдени сэхьиблуье ихдилотгьо, торихгьо дестонгьо, книггьо. Э 1934-муьн сал бири вихде оморе э сернуьши Дербендии шегьери несиет, эже кор сохди эз е сал омборте. Э 1937-муьн сал бебере дустогъи сохди э сереботи дургуне одомифурух. Гъонунлуье андуьрмиши дустогъ бири егlэлмиши э дофус зереи э еки эз нумиргьо гозит. Гуьрд сохде омори хьэрфгьоре э дес вечиреиревоз. Дофусзерегор вечири е хьэрфе э фомиле сервор у вэхдине бидузи. Эз е салиге бебере рэхьо дори. Омборе сал эз е гъэдер вэхд еки эз духдергьой Асаил Бинаев, Ершо, бисдо зен мэгlлуьмлуье догъистуни нуьвуьсдегор Х. Авшалумов.

Динж бири бебе се кукгьо ве пенж духдергьо Асаил Бинаев э 1958-муьн сал. Эну гlэилгьо ве невегьо буьзуьрг вегирлуь ёровурде бебере ве келебебере.