Э пушой мигlид Симхьо-Туро, комики имисал сер гуьрде омори шев эн 23-муьн октябрь, Келе раби Уруссиет Берл Лазар руй бири эки дин-догlотие жэгlмиет жугьургьо:
Хьуьрметлуье хьовиргьо!
Гьеммей ишмуре омборекбу сохденуьм э и шоре мигlид салевоз. Бэгъдовой Суккот, комики э Туро гуфдире оморени «вэгlэдой шори иму» — омори расири гъугъ эни шори. Оммо имисал и «шори э гlэрсгьоревоз э чумгьо». Е сал гирошди эз лап зулуме теракт бэгъдовой нацистски Холокост. Эз 1200 хэгьергьо ве бироргьой иму омборте, келетегьой иму, зенгьо ве гlэилгьой иму э е руз куьшде оморебируьт. Чендгъэдер кифлетгьо и руз э ер миоруьт пуч биреи куьнде одомигьой хуьшдере! Оммо гьеле гьисди э гиров вегуьрдегоргьо, комигьоки те имогьиш деруьт э дес зулумкорсохгьо.
Чуьтам иму миданим бирмунде шори хуьшдере, э вэгlэдой ижире бигlэдотии? Чуьтам гировунде миев мигlид Симхьо-Туро гьейсэгlэт? Гьелбете э ишму ихдилот сохде оморебу, ки гьеле э лап зобуне салгьо эн коммунистически вэгlэдо, кейки эри хундеи туроре ве веровундеи весиетгьой жугьургьоре фуьрсоре оморембу э ГУЛАГ, кими вэгlэдо э уьлуьм — гьер сал, э гьичиш не денишире, е ченд гьозор одомигьо оморебируьт эки нумаз, шор биребируьт ве вежегьисдебируьт. Эри — шор биребируьт ве вежегьисдебируьт, чуьтами бигlэдотие зиндегуни небугеш.
Омбордекигьо пуьрсиренуьт — гьейчуь унгъэде шори бирени гьэгъигъэт э Симхьот-Туро? Э Рош-а-Шана — мигlид офиреи гуьломе ве одомире ижирие шори нисе бире. Э Нисону — мигlид говле биреи иму гьемчуьн ижире шори нисе бире. Э шавуот — мигlид бахширеи Туроре нисе бире. Э мэгlэной гьемме мигlидгьой иму дери торихлуье гъозие, вожиблуь гьисдигьо эри гьемме хэлгъ. Оммо Симхьот-Туро э е гъозией гирошдигьоревоз ологълуь нисди. Чуь мигlиде иму гировунденим?
Гировунденим мигlид хьол-овхьолете. Гировунденим мигlид ологъире э гlэрей Офирегор ве иму, гировунденим мигlид мугьбетлуьи Офирегоре эки гlэилгьой эну, эки гьеммей иму. И ологъи эз гьемме гъозиегьо зевертеи, комигьоки гирошдет енебуге гьейсэгlэт гирошденигьо э гьеммей гlуьлом. И мугьбете эхир нисди, чуьтам мугьбет дедегьо-бебегьо эки дир зенде омиоригьо гlэил — мугьбет жирелуьни, комики андуьрмиш сохде нисе оморе. Чуь иму сохденим э Симхьот-Туро? Вегуьрденим Сефир-Туроре, гъэл гуьрденим уре — чуьтам гене гереки э Офирегор биромунде мугьбет имуре?! — ве вежегьисденим, бирмунденки шорире эз ологъи э Уревоз. Гьэгъигъэт эзу товун жугьургьой совети, не денишире э гьемме четинигьо, оморембируьт э и мигlид мугьбет ве шори. Эхи мугьбет ве шори — лап гъувотлуье гьисгьои, угьо мидануьт гирошде эз гьемме четинигьо. Гьэгъигъэт угьо дорет имуре уре, чуь гьейсэгlэт имуре гьисди — азади, минкини зигьисде э зиндегуни жугьургьоревоз.
Ве гьейсэгlэт, не денишире э и зулуме теракт эн гирошдигьо сал, иму эз хуьшде ве эз гlуьлом гуфдиреним: нибу дуьлхуьрди, гьичиш нибу гьечуь имид биребируьт зулумкорсохгьо. Туро имуре хуте сохдени эки дузе зиндегуни, ве и биней шорини. Пор иму диеш еклугь бирейм, омборте еклугь биреним э жугьурьети хуьшдеревоз. Омборте шор биреним — и шори э гlэрсгьоревоз э чумгьо гьисдигеш. Эхи шори бараси эн коминиге хубе гъозиегьо нисди, шори и овхьолет жуни, хосденигьо Офирегоре ве дануьсденигьо, чуьки Офирегор хосдени имуре. Ве имбуруз шори иму егъин э иму кумеки мисоху гирошде эз гьемме четинигьо ве Худо борухо мисоху э бесгъуни дузи, ве песде эри гьеммежэгlмлуье шолуми.
Ме сейрек эз ишму э мигlид хосденуьм э товун гьерчуь бисдо. Оммо имбуруз эки гьеммешму руй биренуьм, эки гьерки эз ишму — биейт э нумаз шев першобот! Биейт, чуьнки вежегьим гьееки э Туроревоз, чуьнки э гьееки шор бошим, чуьтам гьич не биребирим. Худо мивину шори ве еклуьги имуре — ве э гуьнжо миору муьгlуьжуьзгьоре эри хэлгъ Исроили, эри гьер иму «У э гуьнжо миору келе муьгlуьжуьзе, куьнд сохденки омореи Мошиэхь!»
Э хуьрметевоз,
Пресс-гъуллугъи эн Келе раби Уруссиет.
