Эйчьуниге те и пушогьо бири хьисоб сохде, чуьки бэхшвегири зенгьо лап кем бу. Оммо имбуруз э параменди биреи жэгlмитегьерие хэбере имуре гlэмел миёв дануьсде омборте хэбер. Гьечуь оморени, чуьки гье и гъосуьт бири кем мэгlлуьмети сохде оморе. Лап шори доре гьер тозе гъозиегьо, коминигьо дорени дануьсде э товун бэхшвегири зенгьо э азадсохи вилеет имуре эз миллетперезгьо.
Э ВОВ бэхшвегир бирет ве зенгьо – жугьургьой догъи. Кеме мэгlэнолуьи не бири корисохи эн угьо э доруни. Зенгьо-дедегьо, зенгьо, хэгьергьо – бирет бофолуье хэгьергилигьо, тен-бе-тен э мердгьоревоз сохдет гьемме минкини гьисдигьо, кими вэхд ве минкинсуьзе эри Бараси. Те эхир очугъ сохде не омори нумгьо ве гъозиегьо пузмиш биреи зенгьоре.
Бири дануьсде нуботлуье нумгьо:
- Абрамова Галина Матвеевна (Мататьяевна) – э кими мэгlдонгьо, Аврамова Г.М., келеи сержант, санинструктор. Телеф бири э гъовхо;
- Гаврилова Валентина (Волна) Исааковна;
- Зарбаилова Вера;
- Мигирова Зинаида Кигиновна;
- Мурзаханова Сара Манахимовна, 1918-муьн сал, эз Баталпашинск (гьони Черкесск), КБ АССР, оголзере омори Моздокски ГВК э август 1941-муьн сал. Бири медсестра. Нисд бири хэберсуьз э март 1943-муьн сал;
- Юсупова Мария (Мама) Ифраимовна, медсестра. Нальчик. Телеф бири. Э екиге даннигьо, муьрди эз нечогъи;
- Юхаева Берта (Бурли) Нагдимовна, 1920-муьн сал Махачкала. Оголзере омори Махачкалеи ГВК. Рядовая. Нисд бири хэберсуьз э сентябрь 1942-муьн сал э район Моздок. Телеф бирет ве дуь бирор эну: Юхай ве Михаил;
- Яшаева Довро, Куба (Красная Слобода);
- Якубова Сара телеф бири – гъовре сохде омори э Прага. 21.06.1945-муьн сал;
- Якубова Вида телеф бири (книг ёргири Дербенд 3-муьн том).
Мунди очугъ не сохде гъисмет дуь хэгьер: Лазарева Яфо Лазаревна (Куба) ве Лазарева Истир Лазаревна (Куба), комигьо гьемиге эз довгlо не вогошди.
***
Мигирова Зинаида Кигиновна, 1914-муьн сал, хьэсуьл омори э Нальчик. Варасунде бегьем сохди медицини институт. Э гlуьмуьрлугъи бисд хьофди сал бири оголзере э РККА Ростовски РВК э звание капитан. Бири довгlои духдир 3-муьн ранга. Э «Книг Ёргири лешгерчигьо-жугьургьо, телеф биригьо э гъовхогьо э душмей миллетгьоигеревоз» ёр гуьрде омори э звание майор. Э е даннигьо, э 1942-муьн сал ералуь бири ве гъисмет бири э есири. Песини жиге гъуллугъсохи 59 ЛАП 30 СД.
Амиров Ефрем, бэхшвегир ВОВ эз Нальчик э ёр овурди: «Э хуьшде диромори э софхоне, дениширем, поисди э зевер сер ме Мигирова Зина-довгlодухдир. Кейки э хуьшде оморем минет сохдем: Зина, не фуьрс мере э сузуми. Куьшде миём. Э хуне мивогошдуьм, хэбер эз туь э деде-бебе мидануьм мэгlлуьм сохде. Э зугьун дедеи гоф сохди, эри чуьки екигегьо недануь варасири мере. Зина гьичиш жугьоб не дори мере, энжэгъ чумгьоревоз, чуьки варасири. Пойгьой эн мере не гьишди бурра э тегьер хирурги. Оммо Зина эз довгlо не вогошди». («Лешгерчигьо колонки» — Валерий Амир).
Зинаидере муьрди дуь гlэзизе бирор: Шомииль (1906-1944) ве Мушкат – Мушаил (1920-1941) ве кухолу: Мигиров Мендель Шениилович.
Майор медгъуллугъсохи Кигинова Зинаида Мигировна. Довгlоидухдир 3-муьн ранг. Эз е даннигьо, э 1942-муьн сал ералуь бири ве гъисмет бисдо э есири, эже телеф бири. Э екиге даннигьо – гъовре сохде омори э Одесса. Екиге хэбергьо э товней гье и зен, э десдин ме не дебири.
****
Вера Зарбаилова рафди э довгlо эз институт, биреи студент медицини институт, эз Баку э 1941-муьн сал, дануьсдеи э товун телеф биреи бирор ю Яков. Уре воисди гъэгьре ведешенде эз товун телеф бире бирор, оммо э май 1942-муьн сал телеф бири э зир Керчь.
Эз когъоз Вера Зарбаилова-Мушаилова эз довгlо гирошде жиге:
«Руз э хэйр бу хьуьрметлуье гъовумгьо!
Фуьрсоренуьм эри ишму дуьллуье шолум ве хосденуьм гьемме хубигьо э зиёдгуьзелие зиндегуни Ишму.
Гъовумлуье холе Лиза, эйчуь Ишму эри ме не нуьвуьсденит, чуьревоз гье и андуьрмиш сохде?
Наум нуьвуьсди, чуьки когъозе э у туь не дорей, оммо ве э хуьшдени ме гьичиш не нуьвуьсденит. Ме гьейсэгlэт зобу не зигьисде. Имуре хубе хуреки, партал иму гьисди ве пул доренуьт имуре. 20-муьн февраль (1942), ме мифуьрсуьм эри Ишму 700 монет. Хосденуьм эз Ишму э нореи сенгъ ёргири эри Яша. Эгенер Ишму мисохит и кор, жун ме динж мибу, чуьки ме гъэрхунди хуьшдере веровундем.
Имбуруз сеимуьн рузи ме нечогъ биреи, э песой ме дениширени еки лап дуьлхошие духдер, духдир III гъэдер, Джана – грузиночка. Ме э уревоз дусдлуьнуьм.
Эгенер дануьсди, нуьвуьс, чендгъэдер гереки эри чуьки сохде гьовуни асанте чапар, ве эгенер зуьнде мимунум, не куьшдге немцгьо, гогь э нуботлуье гиле, дузгунлуь э нуботлуье мегьине муьзд жофои мифуьрсуьм гене пул, сохит ве эри келедеде бугьолуье. Гье у имуре одоми сохди, гьеммере угьоре, кире не воисде гъэйгъу кешире э товун сенгъ ёровурдеи.
Хьуьрметлуье холе! Михьило хосденуьм эри ижире ехмишлуье когъоз, чуьки мере гьейсэгlэт бигlэдотие овхьоли. Ме ди винирем э хов, гуйге ме э шуьвер ведарафденуьм.
Яша э ме бэхшире суьрхини энгуьшдери хуьшдере ве моч сохде э пушоне, ве гуфдирени: «Ме лап шор бирем, чуьки гъовумлуье хэгьер хуьшдере э шуьвер дореи» — ве гирисдени.
Инжо, ме лап омбор гирисдем. Белкине, не дануьсденуьм, мимируьм эз дес гитлер.
Бигьил бу уре эз ме сенгъ ёргири.
Варасденуьм, коргьой иму хуби, фикир сохденуьм, вохурде мибошим э Ишмуревоз, гlэзизлуьегьой меревоз, эгенер нэгl, гьемигеш зобу нисди. Моч сохденуьм Ишмуре. Келе шолум Хаиме, гъуншигьоре. Ане, холу Даниле. Белкине, мивинуьм эн имугьоре».
***
Зоя Амуржуева, хьэсуьломорегор Нальчик, рафди э войгей хуьшде гуьре э довгlо, чуькле гlэилгьо биреи, комигьоре у гьишди э гъэйгъукеши чуьклеи хэгьер. Те довгlо сергуьрди Зоя Шальмиевна варасде бегьем сохди медицини училище. Неки е гиле ералуь бири, оммо хос биреи э софхоне, гье гене вогошди э жерге. Кейки э 1942-муьн сал дуьшменгьо куьнде тегьер омори эки Ростов-на-Дону, комиссар медсанбата, э комини у кор сохди, несиет дери уре гlэилгьоре бежидлуь берде э шегьер Оржоникидзе (Владикавказ). Гье и руз мунди э ёр гьеммейки эн угьо эри омборе вэхд: партленмиши ерэгъгьо ве туп гlэжели, хьэройгьо ве виз-визи ералуьегьо, гlэтош ве дуре. Ростов сухди, ве луьп сухдеи ишуьгъ дори э соките гlовгьой нуькере Дон. Дуь лешгерчигьо, винири хэсде бире медсестраре э дуь гlэилгьоревоз, кумеки сохди э у. Вегуьрдет гlэилгьоре э дес хуьшде, пэхьни сохдет угьоре э плащ-палаткеревоз. Оммо у, комини рафди э шеш сала духдерлеревоз Алларевоз песмундигьо ве э гужевоз омори э шегьер Батайск. Куфди э суьфдеи офдоре оморигьо хуне, у хосди сэхьибхунере екем герм сохде духдере. Гьечуь духдер мунди э зигьисдеи э рэхьмедуьллуье одомигьо – Полине ве Архип Дорофеевгьо – ве гьемме зиндегуни хуьшде хьисоб сохди угьоре дуьимуьн кифлет.
Энжэгъ, е сал бэгъдовой, э февраль 1943-муьн сал, э вэхд хилоссохи Батайске санинструктор Золотой Шальмиевна (чуьтам нум гуьрдет уре командиргьо ве ералуье лешгерчигьо) дануьсди оморе, эри чуьки гешде духдер хуьшдере. Рэхьмедуьллуье одомигьо кумеки дори э у эри офде хуней угее деде-бебе Аллочка (у гьемме зиндегуни хуьшде бири э дуьдуьине фамилие – Амуржуева-Дорофеева). Угьо омборе вэхд гъэл гуьрдет дуь екире, гирисдет ве разилуьи хуьшдере нушу дореи э Офирегор эри тилисим!
Зоя Шальмиевна ведеберди ералуьегьоре эз сэхьро гъовхо, дори э угьо суьфдеи кумекии. Е гиле хуьшден ю бири ералуь. Хос сохде омори э софхоне. Эз хос биреи гене вогошди э жерге. Э еки эз гъовхогьо э зир Гомель Зоя Шальмиевна гене бири ералуь. Оммо не поюнди кумекии доре э ералуьегьо. Э у гъовхо у хилос сохди зиндегуни 27 ералуье лешгерчигьоре ве 13 офицергьоре.
Э кифлет Амуржуевгьо дошде омори когъоз серворлуье духдир полк, э комини гъуллугъ сохди Зоя Шальмиевна. Э у гуфдире оморени:
«Келеи сержант Амуржуева Зоя Шальмиевна омори э полк э январь 1944-муьн сал чуьтам санинструктор десде. Э вэхд гъуллугъсохи у нушу дори гьинорменди, мердьети, муьгьбет эки Ватан. Хьэрмэхь Амуржуева э зир гунилеи жергегьо, терссуьз ведеберди эз сэхьро гъовхо лешгерчигьоре ве офицергьоре. Гьемме буйругъгьо духдиргьоре ве келеигьоре э звание веровунди гофсуьз. 4-муьн апрель 1944-муьн сал Амуржуева З.Ш. бири контужена лов биригьо дуьшмение ерэгъэвоз э куьндигьо эз шегьер Могилёва э дигьбон Антоновка. Оммо веровунди лешгерчие гъэрхунди, хилос сохди ералуьегьоре».
Эри гье и игиди Амуржуева З.Ш. бири бэхшире орденевоз Слава 3-муьн степень.
Кантузие вегуьрдеи Амуржуева гене дегешди э софхоне. Энжэгъ песде у вогошди эки гlэилгьо э Ростов-на-Дону. Зоя Амуржуева эз зиндегуни рафди э 1982-муьн сал, гъовре сохде омори э шегьер Ростов-на-Дону.
***
Гюзергюль (Роза) Махаеве хьэсуьл омори 13-муьн апрель 1924-муьн сал э кифлет эн Раши Анухович ве эн Болбике Ануховне Махаевгьо э Махачкале. Э июнь 1942-муьн сал Роза сер гуьрдени хунде э курсгьой эн медицински хэгьергьо э Догъистоние фельдшерски-акушерски школе э шегьер Махачкале. Э сер ноябрь эн 1942-муьн сал барасилуь хунде бегьем сохдени и школере э сенигIэт «медицински хэгьер» ве гье бирден фуьрсоре оморени э довгIо. Эз ноябрь 1942-муьн салевоз сер гуьрдени кор сохде э госпиталь №1047, ве эз унжо вегуьрде оморебу э сереботи лов сохдеи госпитале 18.10.1945-муьн сал. Э 1945-муьн сал э лещгергьоревоз у рафди расири те Дрезден, оммо Бесгъунире вохурди э Харьков, эже рэхь сохдембу гурунде ералуь биригьоре генерале.
Э ноябрь 1945-муьн сал эз лешгер рэхьо сохде оморебу. Роза Махаеве кем ихдилот сохдембу э товун довгI, эзу товун ки и ербиеригьо эри эну гурунд бу. У дуь гиле ералуь биребу. Коминиге вэхд э довгIо у санинструктор бу, эз гъовхо у ведиревундембу ералуьгьоре. Бинелуье духдир эн госпиталь тигъэте чарунд э у, ки эн кимигьо ералуьгьо ерагьо бесде омори хуб, жейле эгенер и бу четине ерагьо ве хосди овурде эки эну саниструкторе. Кейки дедеймере овурдебируьт эки эну, у гуфди, ки ижире сенигIэткор уре э инжо гереки ве гьишди уре э госпиталь. Деде гуфдирембу, ки у хилос сохди зиндегуни энуре. Э гьеммейки мэгIлуьми, чуьтам кутэхь бу зиндегуни эн саниструкторгьо. Бэгъдовой довгIо гирошди эри зигьисде э Сахалин.
Э Сахалин гIуьзет сохденуьт ереровурдире э товун Р.Махаеве ве гъуллугъ сохденуьт гъоврей энуре.
***
Мардахаеве Анастасия (Ася) Михайловне хьэсуьл омори 1-муьн январь 1923-муьн сал э Буйнакск. Э сентябрь 1940-муьн сал гье э унжо дарафди э акушерски-фельдшерски школе. Кейки сер гуьрде оморебу Буьзуьрге довгIой Ватани рафди кор сохде э госпиталь 46-51 ве хундеиреш не шендебу. Э 1942-муьн сал хунди бегьем сохди акушерски-фельдшерски школере ве э войгей хуьшде гуьре рафди э довгIо. Гъовхолуье гъуллугъи Асе гирошди э Софун Кавказ э госпиталь (АПГ-45-40). Э зир гIэтош дуьшменгьо жовоне духдер кумеки сохдембу э ералуь биригьо лешгерчигьо, э сер назуьке душгьой хуьшде угьоре ведиревундембу эз гъовхо.
***
Ханукаеве Вера хьэсуьл омори э Махачкале.
Э 1941-муьн сал э войгей хуьшде гуьре дарафди э лешгер ве эз суьфдеи рузгьо бэхш вегуьрдебу э гъэлхэнд эн шегьер Сталинград. Э довгIо Вера Адинагуевне радистке бу. Гьееки э лешгергьой эн Союз Советиревоз В. Ханукаеве бэхш вегуьрдебу э хилоссохи Украинере, Молдавиере, Румыние ве Венгриере. Эри гъовхолуье верзуьшигьо уре бэхш доре оморебу орден эн Ватанлуье довгIо ве омбаре гъовхолуье бэхшгьо. Нуьвуьсдеи э бэхшдоренигьо велг эн Вера Ханукаеве: «Старшина Ханукаеве В.А. э лешгер омори э войгей хуьшде гуьре э рузгьой эн зулумие гъовхо эри шегьер Сталинград. Эз суьфдеи рузгьоревоз биреи э батальон у жугьобдорлуь сер гуьрди хундеире ве вегуьрди сенигIэт эн радиотелеграфист эн 1-муьн класс. Бирмунди гьинор хуьшдере э кор. 5-муьн февраль 1944-муьн сал герек бу э кор венгесде ологъире э фронтевоз, старшина В.Ханукаеве, дур не рафде эз передатчик ве приемник, се рузгьо ве шевгьо гуьрдебу ологъире э КП эн Одесски Корпрайон ПВО э кореспондетгьой хуьшдеревоз. Не денишире э дегмишигьо э эфир, ве э кор эн радиостанциегьой эн дуьшменгьо. Ве энжэгъ бэгъдовой нореи муьхькемлуье ологъире дори дежурствой хуьшдере. Старшина В.Ханукаеве нишонеи эри гьемме лешгерчигьо-зенгьо». Эри эни игиди старшина В.Ханукаеве доре оморебу бэхш медаль «Эри гъовхолуье верзуьшигьо».
Эри гъовхолуье верзуьшигьо гьемчуьн уре доре оморебу орден эн Ватанлуье довгIо,ве омбаре гъовхолуье медальгьо. Бэгъдовой довгIо уре доре оморебу нум «Ветеран войск связи и радиообеспечения». Песини салгьо зигьисдембу э Махачкале.
***
11-муьн апрель 1942-муьн сал эз вокзол Махачкале э сес эн духовой оркестревоз э войгей хуьшде гуьре эдовгIо рафдебируьт 980 духдергьо эн 30 миллетгьо. И бу тозе эрхэгьо жовоне зенгьо, азадлуь эз кугьне гIэдотгьо ве эз гIэдотгьой дингьо. Угьоре е оголзереи бу – «Ватан бугьоте эз зиндегуни хуьшде». Омбаремиллетлуье кифлет эн хэлгьгъой вилеет имуре нушу доребируьт:
Фавзия Хасанове – татарке, Елена Смирнове – урус, Султанат Омарове – лачке, Рабият Кебедове – аварке, Аня Мизабекове – даргин, Ханбике Эмирсултанове – лезги, Роза Адамове – тат, Ася Абукеримове…
Гьеммей энугьо бирет лешгерчигьо эн 76-муьн жейле батальон ВНОС эн гъувотгьой ПВО.
Гье э у 1942-муьн сал э довгIо огол зере оморебуу бирор эн Роза Адамове – Рафой. Э довгIо бирор ве хэгьер вохурдебируьт, герекиге гуфдире, чендгъэдер шори ве мозол овурди и вохурдеи. Вохурдеи э довгIо, хэйф, песини бу.
АДАМОВ Роман (Рафой) Рашмиевич. 1924-муьн сал хьэсуьл омореи Махачкале. Э лешгер огол зери Махачкалински ГВ. Сержант эн 1-муьн танкови десде. Муьрди эз ерагьо 24-муьн август 1944-муьн сал э ХППГ-133.
***
Агарь Паяндаев э ер овурдембу: «20-муьн май 1943-муьн сал иму, духдергьо эз Буйнакск, огол зере оморебирим э довгIо, ве иму оморебирим э коминиге чеченски дигь экуьнди Грозный. Э инжо иму доребирим лешгерие шовгIо, песде иму фуьрсоре оморебирим э Кубань, эже гирошдембу зулумие гъовхогьо. Суьфде иму терсирембирим, оммо евош-евош вердуьш бисдорим эки тупгьой гIэжели шендеи. Эзинжо ме фуьрсоре оморебируьм санитарке э 91-муьн батальон, песде гировунде оморебируьм гье э и сенигIэт э батальон эн ранцеви огнеметгьо. Иму бэхш вегуьрдебирим э хилоссохие гъовхогьо э Кубань, э Калинински область, э Латвие, Литва ве Эстоние.
***
Э сентябрь 1941-муьн сал Маргарита Абрамове рафди э довгIо, бэхш вегуьрдебу э гъэлхэнди Ленинград. Э довгIо эз суьфдеи рузевоз бу ве чуьклеи бирор эну Михаил Чуьклеи лейтенанте эн административни гъуллугъи Абрамове М.Я. доре омори медаль «Эри гъэлхэнди эн Ленинград». Э бэхшдоренигьо велг нуьвуьсде оморебу, ки у желдлуь бэхш вегуьрдебу э гъэлхэндие мероприятиегьо эн шегьер-игид. Песде Маргарите дебу э хьисоб эн лешгергьой иму э Иран (эже гирошдебу мэгIлуьмлуье Тегерански конференцие), э рэхь эз Ленинград э Иран, е ченд руз биренки э Баку дануьсди норе угее кук хуьшдере (умогьой омбаргьо нисе дануьсдембируьт, ки и гьэгъигъэт «угее» куки, суьгъде кук нисди) э туберкулезни санаторий – екиш не дануьсди нэгIи сохде эз э довгIобирегор. Э вэхд эн Буьзуьрге довгIой Ватани чуьклеи лейтенант М.Абрамове, бешгъэй медальгьо «Эри гъэлхэнди эн Ленинград» ве доре оморебу медальгьо: «Эри гъэлхэнди эн Кавказ», «Эри бесгъуни э сер Германие э Буьзуьрге довгIой Ватани 1941-1945-муьн салгьо» ве орден эн Ватанлуье довгIо эн 1-муьн риз.
Эз лешгер Маргарите Яковлевне омори э 1947-муьн сал.
***
Суре гешдегор эн ПВО Тамара Абрамове.
Тамаре бири суре гешдегор. У э вэхд кор миест фегьм сохде веди бирениге самолетгьой эн дуьшменгьо ве гье бирден мэгIлуьм сохде э штаб э товун рэхь энугьо. Угьо гирошдембу эз сер эн ветэгъэгьой нефти, эже шев ве руз гешде офде оморембу нефт. Ве герек бу жирелуье гьинер, эри шинохде дануьсде фашистки самолетгьоре, жейле шев. Ве ефрейтор Т.Абрамове лап хуб дануьсдембу кор хуьшдере. Э вэхд дежурствой эну гьемме фашистки самолетгьо винире оморембу. Э гуфдиреи энуревоз зенитчикгьо зерембируьт самолетгьой дуьшменгьоре. Рэхьбер эн полк е ченд гиле М.Абрамове дорембу грамотгьо. Угьо те имогьоиш дошде оморени э гъовхолуье когьозгьой эну. Кейки гьеминон эн 1943-муьн сал лешгергьой иму э пушово рафдембируьт, зенитни-артиллерийски полк э буйругъ эн рэхьбергьо эн Софун-Кавказски фронт гуьре гировунде оморебу э МэгIэрове фронт, песде – э 3-муьн Белорусски, комиреки рэхьбери сохебу дуь гиле биригьо Игид эн Союз Совети генерал эн лешгер И.Д.Чрняховски. Э вохурдеи иму Т.Абрамове э ер овурдембу, зенитни-артиллерийски полк, дебугьо э мескен Германие, э Мизрэхьлуье Пруссие, е ченд гиле нисд сохдембу самолетгьой дуьшменгьоре, эри эну рэхьбер эн фронт согъбоши гуфдиребу эз полк. Гьечуь бу э вэхд унигее э пушово рафденигьо операциегьо.
***
Тирсо Амрамове э Гъирмизине Лешгер огол зере оморебу 19 сале биренки эз шегьер Баку. Амрамове Тирсо Илизаровне гъэлхэнд сохдебу Ватане э лешгер эз 18-муьн октябрь 1942-муьн сал те 11-муьн май 1945-муьн сал. Оммо э лешгер уре бежид гуфдирембируьт Лиза, песде и бири дуьимуьн нум эну. Суьфде и бу 20-муьн лешгерие-автмобильни рэхь, песде 18-муьн. Гьееки э хьовиргьоревоз жовоне раче духдер регурировщик бу, песде бири рэхьбер эн жигей регулирование. Т.Амрамове доре оморебу нум чуьклеи сержант. Э 1944-муьн сал бэхш, э хьисоб комики гъовхо бердембу Тирсо Илизаровне, хилос сохдебу польски шегьере Краков. Эже зере оморебу еровурдие сиротгьо э гъовхолуье хэгьергилигьоревоз-комсорггьоревоз, гьемчуьн э майор Пожарцкиревоз. Эри бэхшвегири э Буьзуьрге довгIой Ватани жовоне духдере доре оморебу орден эн Ватанлуье довгIо, медальгьо «Эри хилоссохи Польшере» ве «Эри бесгъуни э сер Германие».
***
Кукулиеве Ривекка Абрамовне, 1925-муьн сал хьэсуьл омореи, эз шегьер Грозный э довгIо рафди э войгей хуьшде гуьре. Бу телефонист эн жейлее роте, эн связь эн 4-муьн гвардейски Орден эн Гъирмизине Гъэлеме стрелкови десде. Медаль «Эри гъовхолуье верзуьшигьо» доре оморебу эри нуботлуье игиди: «9-муьн февраль 1943-муьн сал э вэхд э пушово рафдеи э сер дигь Шенджи э телефоневоз рафдебу э 3-муьн ОСБ ве гуьрдебу ологъире э КП десдеревоз. СэгIэт дуьдуь эз лов биреи эн ерэгъ дуьшменгьо ологъи бурра оморебу. Тов.Кукулиеве не терси ве э зир гIэтош эн дуьшмен тозеден э хуьшде дировунди ологъире э КП десдеревоз. 10-муьн февраль 1943-муьн сал э ен дигь Тахтамукай гьееки э унигее телефонистгьо-духдергьоревоз э зир гIэтош эн дуьшменгьо расунди телефонии ологъире э КП десдеревоз».
***
Санитарке эн госпитальни взвод Нисанове Роза, 1923-муьн сал хьэсуьл омореи эз шегьер Грозный рафде расири те Берлин.
Нисанове Роза Риканоровне, 1923-муьн сал хьэсуьл омореи, щегьер Грозный. Гъирмизине Лешгерчи. Санитаркере эн 121-муьн медико-санитарни батальон эн 20-муьн дуь гиле биригьо Гъирмизигъэлеме догълуье-стрелкови дивизие доре оморебу медаль «Эри гъовхолуье верзуьшигьо».
Эз бэхшдоренигьо велг:
«Товарищ Нисанове эри кутэхьэ вэхд гъуллугъсохи э 121-муьн МСГО бирмунди хуьшдере чуьн эшгълуье ве хьэвеслуье одоми э кор веровундеи гъовхолуье тапшьрмишигьоре э товун гъуллугъ сохдеи ералуьгьоре. Дусд Нисанове, кор сохденки санитарке эн госпитальни взвод эри вэхд эн гъовхолуье операциегьо эн 20-муьн ДВКИД эз 25-муьн те 31-муьн май эн 1943-муьн сал гъуллугъ сохди 300 ералуьгьоре, гоф не сохде веровундембу гьемме буйругъгьой эн духдиргьоре, не денишире э вэгIэдой хуьшде ве э секонеи эри зиндегуни хуьшде э вэхд тупгьой гIэжели шендеигьо. Гьемме гъовхолуье тапшуьрмишигьоре веровундембу хуьшдере гъимеш не сохде ве игидлуь. Э партиегьо эн Ленин ве Сталин гьемчуьн эн Социалистически Ватан бофолуьни». Медальгьо: «Эри вегуьрдеи Берлине», «Эри вегуьрдеи Кенигсберге», «Эри гъэлхэнди эн Кавказ», «Эри бесгъуни э сер Германие э Буьзуьрге довгIой Ватани 1941-муьн-1945-муьн салгьо» ве «Эри гъовхолуье верзуьшигьо».
***
Михайлове Порот (Барат) Илишаевне – суьфдеи зен – парашютист.
Е теке Десантнице. Э 1933-муьн сал дарафди э Бакински паруьсденигьо училище. Э 1941-муьн сал рафди э довгIо. Э 1943-муьн сал у дешенде оморебу э дорун дуьшмен, фуьраморенки э парашютевоз э район эн шегьер Ростов-на-Дону ералуь биребу ве вегуьрде оморебу э есири. Духдере сэхд куьшдебируьт. Хэгьергили эну куьшде оморебу. Беддбэхде зенгьоре бесдебируьт эки гIэсб ве фуьрсоре оморебируьт эз риз дофгIо. Порот Илишаевне зинде мундебу ве эз лешгер вогошде оморебу бэгъдовой хосбиреи.
***
Парат Ашировне Нисанове гъовхо бердебу э хьисоб эн 195-муьн десантни полк. Эн 195 зенап ПВО. Эн 132 озенабр ПВО. Нуьшдебу э гушвенигьоревоз э сесгуьрденигьо жиге ве мэгIлуьм сохдембу эже гирошдембу самолетгьой эн дуьшменгьо. Нисанове П. э довгIо бири се сал ве се мегь. Эз довгIо вогошде омори э июль 1945-муьн сал. Уре бэхш доре оморебу медальгьо «Эри гъэлхэнди эн Кавказ» ве «Эри бесгъуни э сер Германие».
***
Сухман Мозолут, хьэсуьл омори э шегьер Баку ве у э ер овурдембу: «Э пушой рафдеи э довгIо е руз ме э хуне бируьм, эри согъбоши гуфдире эз деде-бебе. Бебе мере доребу чуькле нуьвуьсдеире эз Тиро, деде э дес хуьшдеревоз духдебу чуькле чейтенле ве гуфдиребу, ки и чуькле хэйкел эн туь мибу, гердуьн уре э герден ве гьич вэхд векенде герек нисди». Гофгьой Тироре Мозолут доноребу э чуькле чейтен. Ве уре у э герден гердуьндебу.
***
Тиферет Натановне Абрамове хьэсуьл омори э 1924-муьн сал э Баку. Э сергири довгIо у векендембу гъэршуйтанкови чухуригьо, песде дарафди э фельдшерски училище. Хунде бегьем сохденки фуьрсоре оморебу эри кор сохде э эвагоспиталь нумир 5027, коминики дебу э район эн Черногородски куьрпи: эз эшелонгьо вегуьрдембу ералуьгьоре, бесдембу ерагьоре, кумеки сохдембу э вэхд операциегьо, кор сохдембу э лабораторие. Уре доре оморебу офицерски нум лейтенант эн медицински гъуллугъсохи. Бэхш доре оморебу медаль «Эри гъэлхэнди эн Кавказ».
Э сентябрь эн 1945-муьн сал дарафди э хундеи э Азгосмединститут ве хунде бегьем сохди уре э 1950-муьн сал. Омбаре салгьо тербие дорембу – токсикологиере ве радиологиере э лешгерие кафедре эн Бакински институт хубте сохдеи сенигIэтлуьи духдиргьоре. Хьозуьр сохди ве гъэлхэнд сохди диссертациере, э гъосуьт «Медицински кумеи дореи э нечогъгьо, зарали зере оморигьо э гъовхолуье огъуе молгьоревоз». Гьонине вэхд Абрамове Тиферет зигьисдени э дигьбон Неве-Менахем э Карней-Шомрон э Исроил.
***
Александра (Шура) Шаулове хьэсуьл омори э Грозный э 1913-муьн сал. Э 1937 сал рафди э хундеи э Орджиникидзе, хундембу э хоссохие факультет эн медицински институт. Уре хунде бегьем сохди э июнь эн 1941-муьн сал. Чуьн лешгерчи огол зере оморебу э лешгер. Э довгIо и назуьшменде духдер бу лешгерие духдир эн госпиталь э эшелонгьо.
Шаулове Александре кор сохдембу духдир э больнице №1 э шегьер Грозный эн Чечено-Ингушски АССР. Шаулов Гадалье, бирор эн Шаулове Александре, телеф бири э 1943-муьн сал эки Керч.
***
Мария (Мейром) Махаеве эз Махачкале – хундеварасдегор эн Московски медицински институт, комиреки хунди бегьем сохди э барасиревоз э 1940-муьн сал. Оммо э и зуригьо сер гуьрде омо довгIо, жовоне духдер э риз довгIо дебу ве у бу лешгерие духдир. Уре гье бирден доре оморебу гъуллугъ сервори сохде санитарни поезде. Межбур бу пэхьни сохде миллет хуьшдере, чуьнки и хэтолуь бу ве гъэрор сохде оморебу мэгIлуьм сохде э товун эну, ки лешгерие духдир – эрменини. Э жигей эн сервор эн санитарни поезд Марие э десдей хуьшдеревоз хилос сохди омбаре ералуь биригьо лешгерчигьоре. Бэгъдовой довгIо 27 сале биренки ведарафди э шуьвер (фомилей шуьвери ю Авадьяев), ве зенди 5 гIэил.
***
Камелия Анисимове хунде бегьем сохди Азербайджански медицински институте ве гье бирден бири э 2-муьн Украински фронт э жигей духдир-ординатор эн Полевой гешденигьо госпиталь. Песде 50 сал кор сохди духдир-офтальмолог.
***
Хагило Соломоновне Ханукаеве эз Дербенд бу серворлуье духдир эн фронтовой госпиталь э Магадански область. Капитан эн медицински гъуллугъсохи э шолумие зиндегуни кор сохдембу духдир-педиатр э поликлиникей гIэили.
***
Ханукаеве Мариам (Мириам) Азарьеве, хунди бегьем сохди Медицински институте.
Ст.лейтенант эн медицински гъуллугъсохи, бэхшвегир довгIо.
***
Шамаеве Тамара Борисовне – бу жигегир эн серворлуье духдир эн эвакогоспиталь №1628 э Дербенд.
Хая Рабиханукаеве (Шлайфер) хунде бегьем сохди Догъистонлуье Медицински инстуте (духдир-хирург) э вэхд эн Буьзуьрге довгIой Ватани ве эз гьеминон эн 1942-муьн салевоз кор сохдембу э госпитальгьой эн Дербенд, песде эн Грозный.
Моисееве Галина Михайловне. Медицински фельдшер эн эвакогоспиталь №3269 эн шегьер Нальчик Роза Данилове ве чуьн мундигьо корсохгьо эн эвакогоспиталь, эз ен ералуьгьо нисе рафдембу.
Измайлове Ольга Нусуевне – медицински хэгьер эн Буйнакски ЭГ 3490.
Ксения (Бетсиин) Иосифовне Абрамове, Юнаеве-Давыдове Тамара, хэгьер эн Хизгил Авшалумов. Дадашеве Овгоиль кор сохдембу медицински хэгьер э госпиталь эн Дербенд медицински соводисуьз, ве шуьвер эну Бенсион ве кук Яков э довгIо бируьт.
Руфь Соломоновне Анисимове хьэсуьл омори э Догъисту э шегьер Дербенд. Хундебу э универститет Махачкале, э сенигIэт – тербиедорегор зугьун урусире. Эз сергири эн Буьзуьрге довгIой Ватани те 1943-муьн сал, гъуллугъ сохдембу э Гъирмизине Лешгер, эз 1944-муьн -1946-муьн салгьо гъуллугъ сохдембу э Тамански дивизие э ен Москов.
Векил Уруссиет э Исроил Анатолий Викторов э 2020-муьн сал Р.Анисимове доребу юбилейни медаль «75 сал Бесгъуни э Буьзуьрге довгIой Ватани 1941-1945-муьн салгьо». Д.Пархомчук Р.Анисимове омбаракбу сохдебу э руз хьэсуьломореиревоз ве эз нуминей эн Уруссиетлуье базургенде меркез доребу гъуьлгьо. У зигьисди 104 сал. 27-муьн август 2021-муьн сал, еки эз пире гьемватанигьой эн Исроил ве белки лап келе дигълуье жугьургьо эн гIуьлом, Руфь Соломовне Анисимове биребу 104 сале.
Нуьвуьсди Ирина Михайлова
Тержуьме сохди Ильягуева А.
