Э кор венгесдеи программере «Десдей Догъисту» - и диеш е э вэд ю ве дузе пойнореини. Республике эззуревоз михьтожлуьни э системни корсохдеи э жовоне сенигIэткоргьоревоз, ве вожиблуьни, ки и хьэвесе э пушо нори сервор регион.

Федор Щукин неки гуфдирени э товун гереклуьи эн дегишигьо, гьемчуьн э пушо норени егъинлуье тегьер расиреи э угьо.

Лап вожиблуьи э программе – тараф ве очугъи эну. У эри хубтее школехундеварасдегоргьои, комигьоки субут сохдет эгъуьл хуьшдере, ве э и гуьре нисе поисденуьт э серхьэдгьой республике, оммо назари сохденуьт хундегоргьоре э де регионейгегьо. И соводлуье гъэножогъини: доре жовонгьоре минкин вегуьрде хубе соводи эже воисдге ве э гуьнжо овурде овхьолет ве себеб э хьэвес венгесдеире эри вогошдеи.

Оммо, чуьтам гьер хьэвес, «Десдей Догъистуре» э раче гофгьо ве э нишонлуье футболкегьо гуьре гъимет доре ние биев, оммо э гьэгъигъэтлуье барасигьо гуьре мие гъимет доре биев. Вожиблуьни, чуьнки э песой бренд эн программе биев егъинлуье серноме: очугъэ сенигIэтлуье минкингьо, несигIэтдореи, пуллуье ве административни кумеки сохдеи э бэхшвегиргьо. Имбуруз жовонгьоре гереки дузе везифегьо: очугъэ социальни зомингьо, эже вожиблуьни дананигьо ве мэгIрифет, рэгъиблуье овхьолет эн жофо ве гьъэгъигъэтлуье кумеки дореи – эз грантгьо эри проектгьой хуьшде те нисегIэтдореи.

Жовоне одомигьо мие варасуьт, чуьжире минкингьо э угьо денишири ве чуьтами проектгьоре угьо мидануьт э кор венгесде э ватан.

Жейле воисдени гуфдире э товун вогошдеи э хуне – и пойнореи э пушово. Эри омбаре одомигьой Догъисту, рафдетгьо эри хунде э келе шегьергьо, хэел шиновусде оморени э сер гоф поисдеире хуно. У мие дегиш соху вердуьшире э товун эну, ки э бараси мидануь расире энжэгъ эз республике эуло, ве гуьнжуьндени тозе еклугире: Догъисту – и жиге, эже гIэмел миев вокурде рэхь сенигIэтлуьире ве кори сохде э сер дегишигьо.

Бараси программе межбур мибу эз дуь э екиревоз корсохдеи эн хьуькум, бизнес ве эн соводлуье идорегьо. Эгенер «Десдей Догъисту» нибу егилеине гъозие, оммо мибу омбаревэхдине проект э варасиренигьо тегьергьоревоз ве э гьэгъигъэтлуье барасигьоревоз, республикере мибу келе минкингьо эри гъэрор сохде сенигIэтлуье пуьрсуьше ве эзу товун мидануь параменд бире экономике ве социальни сфере.

ВИКТОР МИХАЙЛОВ,

Заслуженный работник культуры РД.