Э кор венгесдеи кадрови программере «Десдей Догъисту» - и еклуье жугьоби э сер зутеине четинигьо, э комиревоз республике расирени э песини дегьсалигьо – рафдеи мэгIрифетлуье жовонгьо.

Федор Щукин егилеи чорегьой кумеки дореи э пушо нисе норе, оммо э пушо норени план, эже э бинелуье жиге поисди одоми.

Жейле вожиблуьни, ки программе неки эри энугьои, ки эз республике нисе рафде, гьемчуьн эри энугьо ки рафдени эри хунде э де регионгьойге. И гъобулсохи гьэгъигъэтлуьини: жовонгьой Догъистуре мие минкин бу вегуьрде хубтее соводире э гъирогъгьой республике, оммо гьемчуьн мие дошде биев ологъи э ватаневоз ве угьоре мие бу тегьер вогошдеи.

Программе сер гуьрде омори э вохурдеи э школехундеварасдегоргьоревоз – э хуб хундегоргьоревоз ве э бесгъунбергьой эн олимпиадегьо. И хубтее хосдеигьои эри школехундеварасдегоргьо. Угьо субут сохдет минкингьой хуьшдере, ве имогьой регион гуфдирени эзугьо: «Иму ишмуре гузет сохденим ве хьозуьрим кумеки сохде э ишму эри параменд бире».

Оммо бинелуье пуьрсуьш – неки э имиддореигьо, оммо э веровундеи программереи. Чуь гьэгъигъэт мивегинуь бэхшвегир эн  программе «Десдей Догъисту»? СенигIэтлуье рэхь? НесигIэтдореи? Пуллуье кумеки дореи? Егъинлуье проектгьо эри э кор венгесдеи? Бараси программе межбур бирени эзу, чендгъэдер зу гьеммей эни фикиргьо ве программегьо фегьм сохде ве э кор венгесде миев.

Оммо гьеле вожиблуьни, хосдеигьо шиновусде омори. «Вогошдеи э хуне – э песово рафдеи нисди, и пушово рафдеини»

Жовонгьо мие винуьт, ки Догъисту – и мескен эн минкингьои. Ве энжэгъ мескен эн еровурдигьой эн гIэилгьо нисди. Ве эгенер «Десдей Догъисту» мидануь ире субут сохде э синогъи, республике мидануь поюнде «рафдеи эгъуьлменде одомигьоре» ве сохде бинелуье овгъот хуьшдере - меэгIрифетлуье жовонгьоре – э бинелуье жуьмуьсденигьо гъувот параменд сохдеи регионе.

Серволуье редактор эн гозит «Ватан»