22-муьн сентябрь, э санаторий «Каспий» э Карабудахкентски район вокурде омори 12-муьн гIэрейхэлгъие гIэрейдинлуье жовоне форум. Э форум бэхш вегуьрдебируьт нушудорегоргьой эн регионгьой Уруссиет ве эн де вилеетигегьо.
ГIузетлуье гъуногъгьой форум бирет: Сернуьш эн Хьуькуьм Догъисту Абдулмуслим Абдулмуслимов, меслэхьэтчи эн Сервор РД Энрик Муслимов, сернуьш эн Комитет НС РД э товун миллетлуье политике, эн пуьрсуьшгьой жэгIмиетлуье ве динлуье гуьрдномегьо ве эн гIэрейпарламентски ологъгьо Фирудин Раджабов, архиепископ Махачкалински ве Дербентски Варлаам, жигегир эн Муфтий РД Магомед Магомедов ве диеш.
Э гIэрегьой межлуьслуье вокурдеи форуме эки бэхшвегиргьо эз нуминей эн Сервор РД эн Сергей Меликов руй бири Сернуьш эн Хьуькуьм Догъисту А.Абдулмуслимов.
Э нушудии хуьшде у риз кеши, ки гIэдотлуье дингьо эн Уруссиет гьисдуьт вожиблуье гъозие, комики ек сохдени одомигьоре, гъувот доренуьт фикир рэхьмире, дузгунлуьире ве рэхьмедуьлире.
«Э деврон эн вожиблуье геополитически дегишигьо иму виниреним омбар биреи ижире секонеигьоре, чуьн хуьршлуье миллетпереси, нехогьи, экстремизм ве терроризм. Э жугьобдореи э сер эни четинигьо иму мие муьхькем сохим гIэрейбазургенде гоф сохдеи дуь э екиревоз, э гуьнжо овурде хьуьрметлуьире э гIэрей жовонгьо ве параменд сохде дуь екире варасиреи э гIэрей нушудорегоргьой эн жире-бе-жирее базургендигьо. Энжэгъ эз гIэрей еклуье рэхьме коргьо ве эн варасире оморенигьо гофсохи иму миданим поисде э гъэршуй бужу сохдеи дуьшменире, ве ме э бовориниревоз гуфдиренуьм, ки хэрекети сохдеи эн жовонгьо тозеден сохде ологъгьой эрхэгьоре ве хуьшденишуь э гуьнжо овурде зиндегуние везифегьоре э биней хьуьрметлуьи ве ватанхогьи», — руй бири А.Абдулмуслимов эки бэхшвегиргьой эн жовоне форум.
Песде эки курабирегоргьо руй бири Архиепископ Махачкалински ве Дербентски Владыка Варлаам: «Кейки э Дербенд оморебПрезидент эн вилеет иму уре бэхш доре оморебу Гъурон ве у уре гуфди лап бугъолуье бэхш, гьемчуьн у гуфди, ки гIэрейдинлуье разименди гуьнжуьндени биней эн уруссиетлуье хьуькуьмете. И гофгьо бирмундени гьэгъигъэтие фикир эн Сервор хьуькуьмете ве мэгIэной эн жэгIмете. Гуьрд сохденки гъувотгьой одомигьоре эн жире-бе-жирее миллетгьоре ве дингьоре, иму хэрекети сохденим эки жэгIмие везифе – вокурдеи шолуме биевгьоре, комики мибу жэгIмие эри гьеммей иму».
Архиепископ Варлаам согъбоши гуфди эз Сервор эн Республикей Догъисту эз Сергей Меликов ве эз Сернуьш Хьуькуьм Догъисту эз Абдулмуслим Абдулмуслимов эри дешендеи э несигIтдореи имбурузине жовонгьоре э руьхь ватанхогьи ве мугьбет эки ватан хуьшде.
«Дошде гIэрейдинлуье ве гIэреймиллетлуье шолумире гьисди эри иму егъине вожиблуьи, эзу товун ки буруние секонеигьо расиренуьт э гьер одоми эн вилеет иму», — гуфди у.
Жигегир муфти эн Республикей Догъисту Магомед Магомедов эз нуминей муфтий эн республике, эн шейх Ахмад Афанди до шолум ве хубтее войгегьо эри бэхшвегиргьой форум. У нушу дори жэгIмие везифере, гуьрд сохдигьо э мейдун форум э Догъисту нушудорегоргьой жире-бе-жирее дингьоре ве миллетгьоре:
«Расире э шолуме гофсохи дуь э екиревоз ве э дуь екире варасиреи – вожиблуье барасини эн еклуье кор иму. Имуре гуьрд сохдени жэгIмие везифе – гъэлхэнд сохде жовоне эрхэгьоре эз фикир экстремизм, нехогьи ве терроризм. НесигIэт дореи э дин гуьре, гьеммише бу ве мундени муьхькемлуье гъэлхэнди эри жэгIмет, ве еклуьги хэлгъгьо – бинелуье ерэгъ имниу», — гуфди М.Магомедов эз жовонгьо.
Нушудорегор эн жэгIмиет дин-догIоти жугьургьо эн Республикей Догъисту Моисей Аврумов гуфдири, ки форум и жирелуье мескени эри дуь э екиревоз корисохдеи эн базургендигьо ве зиед сохдеи динлуье гIуьломе.
«Гьемме э гIуьлом муьди бирени э буьлуьнде гъонунгьо, ве гьеркире эз иму вожиблуьни варасире динлуье везифей хуьшдере. Офирегор дори имуре жирелуье бэхш – зигьисде э раче гIуьлом, эже гьисди гьемме эри хосде ве шор бире. Торих фурмуш не сохди омбаре нишонегьой эн гьэгъигъэтлуье боворинире ве мердьетире – чуьтам у нэхирчи, комики виниренки гIэтош гIэзиеткешгьоре, не терсиребу э гършуй бирэхьм поисде, куьшденки гIэтоше. Боворини эну доребу уре гъувот поисде э гъэршуй зулуми. Гьечи ве коргьой ишму, ишугъ доренигьо э бовориниревоз, вегуьрденуьт жирелуье мэгIнолуьире. Жовоне эрхэгьоре огол зеренуьм бире тигъэтлуь эки хьохоми келетегьо, эзу товун ки гьэгъигъэт ишмуре герек мибу берде бергулу дананигьоре песде»,- гуфди М.Аврумов.
