Сервор Республике Догъисту Сергей Меликов хуьшдени ю войге сохди сергири дуьруьжде боржберире вокурдеи жэгIмиесоводлуье идорегьоре эз видеоконференцсвязе. Э гъэд тозе объектгьо соводи гьисди чуьтам тозе хундение идорегьо, суьфдеи бо гъобул сохдеи хундегоргьоре, гьечи ве тозеден э хуьшде дировундеи идорегьоре, вогошдигьо эки битов согъэ тегьер коре бэгъдовой гъуьчсохие коргьо.

Э гъэд эн угьо э дигьбон Белиджи Школе №3 вокурди дергьоре бэгъдовой дуьруьжде гъуьчсохи.

Э гье у руз Сервор Дербендски районе Эльман Аллахвердиев межлуьслуь вокурди дергьоре тозе сохдеие школере №3, комики гирошди дуьруьжде гъуьчсохире. Гье у гъозие бирмунде тозе е гъэдер вэгIдо э параменди соводие инфраструктуре дигьбоне ве вокурдени э пушой жовоне зигьисдегоргьой Белиджи дергьоре э гьеймогьоинее, хубе ве хьэвеслуь ве эшгълуь сохдеие жиге эри дананидореи.

Межлуьс вокурдеи сер гуьрди эз хубе гофгьо ве динлуье гъуногъ сохдеиревоз. Хуьрметлуье гъуногъгьоре дори хушбуйлуье щербет, комики нушу доре гъуногълугъи ве фирегьдуьллуьи. Песде сес сохди мэгIнигьо Уруссиетие Федераци ве Республике Догъисту.

Э шолум гуфдиреиревоз эки оморегоргьо руй бири Сервор муниципалитете Эльман Аллахвердиев. У э сикеиревоз ве шориревоз бирмунди:

«Имбуруз эри дигьбон эн иму – жейлее рузи. Иму э сикеиревоз ве шориревоз вокурденим дергьоре тозе школере №3, комики гирошди бегьем те эхир дуьруьжде гъуьчсохире э гъэд программе эсер тозе сохдеи школгьоре ве бохчегой гIэилире Республике Догъисту. Гереки риз кешире, чуьки куьгьне школе дигьбоне Белиджи комики лап михьтож бире э дегишбиреи, кор сохди эз 1958-сал. Имбуруз э пушой эн иму – гьеймогьоине, тозе школеи, комики хьозуьри гъобул сохде тербиевегирдегоргьой эн хуьшдере э тозе иловле. Э и вожиблуье гъоэиеревоз ме омборекбу сохденум гьеммеекире! Войге сохденум тозе школей эн имуре гуьлишонлуь бире, тербиедорегорегьоре – хьэвес ве барасигьо э гъэдуьрдане жофой эн угьо, гIэилгьой эн имуре – очугъэ гIилмие вокурдеигьо, тозе дананигьо ве бэхдлуье гIэильети э и зиёдгуьзелие хундение идоре! Бгьил и школе мибу жигеревоз, эже хьэсуьл оморе войгегьо ве веровунде э зиндегуни гьинорменде хьэрекетигьоре!»

Бэгъдовой бирмундеи Серворе районе, э шолум гуфдиреиревоз эки оморегоргьо руй бири сервор дигьбоне Белиджи РамизГабибуллаев, гьемчуьн риз кешири вожиблуьи гьисдигьо гъозиере эри биёвгьо эрхэгьо.

Эхири межлуьслуье беделе бири бирмунушие бурраире гъирмизине бафтаре.

Эльман Аллахвердиев, Рамиз Габибуллаев ве сервор школе гьеммееки бурри бффтаре, межлуьслуь вокурде тозе сохде хундение идорере.

Песде гIуьзетлуье гъуногъгьо э софоревоз фегьм сохди гъуьчсохде классгьоре, гьеймогьоине кабинетгьоре ве дуьлхошие иловлере, комики э гуьнжо овурде омори эри хуб биреи эри хундегоргьоре ве тербиедорегоргьо.

Гье у руз Сервор Дербендски районе гъобул сохди бэхшвегири э гуьрдлеме Несиете эсер гIилме э зир рэхьберисохиревоз Серворе Республике Догъисту Сергее Меликове.

Э гъэд гуьрдлеме бири спорт, эже э дузовнее эфире Эльман Аллахвердиев гуфдири э Сервор Республике Догъисту э товун вокурдеи тозе школере э дигьбон Блиджи.

Гье у риз кшире гьуьндуьре вожиблуьи, комики рэхьбергьо республике доре параменди соводие иловлере ве хубте биреи овхьолет иловлеире дананидореире эри гIэилгьо.

Вокурдеи школере №3 э дигьбон Белиджи -гье у неки гъуьчсохи школее жигере, гье у пуле дешендеи э биёвгьо, э тозе эрхэгьо, комики мивегину минкини хундеире э гьеймогьоине иловлегьо, параменди сохде мэгIрифетгьой хуьшдере ве вокурде барасилуье биёвгьо.