Гьерсалине ГIэрейхэлгъие хушхьоле бине СТМЭГИ гировунде межлуьсе дореи э гIуьзете овхьолет бэхше э нум мэгIлуьмлуье этнографе Сергее Ивановиче Вайнштейне. И бэхш везифе норе омори эри угьо, ки желди кумекии доре дошдеи ве параменди жирелуье культурере жуьгьургьой догъире.
Сэхьиб гIуьзетлуье бэхше бирени мэгIлуьмлуье корсохгьо, гьеркиш миллетлуьи, эн ки зиёдгъувотлуьигьо фуьрсоре оморе э дошдеи, гIоширбиреи ве лов сохдеи культурни дингьой жуьгьургьой догъире.Чигьрет, комики нишоне веноре бэхше, доре оморе угьоре, коргьой эн ки бири омборте жирелуье э и рэхьгьо.
Э и сал барасиберевоз Бэхше Вайнштейне бири: Шауль Симан-Тов, Сергей Ильясафов ве Наталье Кашовски.
Шауль Симан- Тов (Исроил). Э песой коргьо э дошдеи культурни миросигьоре жуьгьургьой догъире.
Хьэсуьл омори э 1971-муьн сал э Боку, Азербайджан,зигьисдени э Тират-Кармеле, Исроил.
Рэхьбер бинере догъие-жуьгьурие культуре «SLOIUMI» еки эз желдлуье бэхшвегиргьо Идорере «АзИз» (Азербайджан-Исроил).
Шауль Симан-Тов гьисди гьеммишеине ю хуьшдени нуьвуьсдегоревоз ве жейлее корреспондентевоз медиа-десдере STMEGI э Исроиле.
Бинелуье рэхь корисохи эн у – дошдеи, параменди ве мэгIлуьм сохдеи культурни миросире жуьгьургьой догъире э Исроил.
Бине «SLOIUMI» дофус зери омборе гъэдер дофус зереие книггьоре ве аудиокниггьоре, комикигьо гIуьзет сохде омори жуьгьургьой-догъие культуре э жуьгьури ве екейгегьо зугьунгьо.
Шауль Симан- Тов зиёд сохде дебердеире дуьруьжде дешендеи э параменди ве дошдеи жирелуье культурно-торихие миросире хэлгъ эн хуьшдере, муьхькем сохдеи гIэрейхэлгъие бесдеигьоре вевэхьзи сохде гьиметлуьире жуьгьургьой-догъие еклуьгире.
Сергей Ильясафов (Исроил). Э песой дешендеи э дошдеи ве параменди музыкеи мэгIрифете жуьгьургьой догъире.
МэгIлуьмлуье мэгIнихун, хьэсуьл омори э 1963-муьн сал э Дербенд. Эз гIэильети нушу доре мерэгъ эки музыке, варасунди э 1988-муьн сал музыкеие хундеире. Те рафдеи э Исроил э 1995-муьн сал Сергей э барасиревоз бирмунди э дуьруьжде консертни площадкегьо Софуние Кавказе, бесгъун дореи мэгIлуьмлуьи э гъэд гушдошдегоргьо. Бэгъдовой дегиши мескен зигьисдеире зиёд сохди параменди сенигIэткорире, э гуьнжо овурди сэхьиблуье десдере, э комикиревоз кор сохде те имбурузине руз.
Сергей Ильясафов желди кор сохде музыкеие корисохиревоз, бирмунде э тегьер уруссиетие ве кавказски шансоне. Э программе возирегоре омборе гъэдер мэгIнигьо э жуьгьури, э у гъэдер ве ю хуьшдени нуьвуьсде мэгIнигьо. Э 2002-муьн сал э гуьнжо овурди продюсерски бинере, комики бири вожиблуьи эри кумекии дореи сер гуьрденигьо возирегоргьоре. Э песдеине салгьо барасилуь нушу дори э жейлее консертгьоревоз, бэхшвегири сохди э телевизионни бирмундеигьо ве мигIидгьо, гьемчуьн э гIэрейхэлгъие мигIидгьо Уруссиетие гьемватанигьо э Москве (2007). Бирмунде дуь э екиревоз э ижире мэгIлуьмлуье возирегоргьоревоз, чуьтам Ян Левинзон ве Ефрем Амирамов.
Вожиблуье проектевоз бири гуьнжолуьи гIэилие музыкеие идоре э зир рэхьберисохиревоз Полине Питаровой, комики фуьрсоре омори э кумекии жовоне мэгIнихунгьо.
Сергей Ильясафов гьисди очугъэ одоми э культурни зиндегуни Исроиле, кумекии доре дошдеире ве фирегь мэгIлуьм сохдеире дингьоре уруссиетие ве жуьгьургьой- догъие музыкере.
Наталье Кашовски (Уруссиет). Э песой коргьо э дошдеи торихие миросире жуьгьургьой догъире.
Торихчи, гIилмчи-эпиграфист (эпиграфике – торихие ве филологически кори, комики хунде дануьсде хэтнуьвуьсигьоре э муьхькемлуье молгьо). Э дуразовуне гировундеи гIилмие сенигIэткори эн хуьшдере берде хундеире куьгьне жуьгьурие битехьэимгьо Крыме ве Кавказе э везиферевоз бэхшсохдеи эпиграфически гуьрдномегьоре. Хунди дануьсди сенгьгьо ёровурдире Тамани ве битехьэиме Дорумие Догъистуре. Хуьшдени ю нуьвуьсдегоре эки 50 гIилмие книггьои э эпиграфически мироси жуьгьурие торихе. Сервори сохде беделе «Месебе Мизрэхье» э Хьуькуьмлуье музее торихе месебе э Санкт-Петербурге.
Согъ мундеигьо гъэдимие жуьгьерие битехьэимгъо Догъисту, комики вир бири э гIэрелугъгьо догъигьо енебуге серине жигегьо дерегьо, комики зеверо верафде э догъгьо, гьишденут гуьнжуьнде нушудореи э товун «географие кучмиш биреи жуьгьурие жэгIмете э е гъэдер мескен» Догъисту, вегуьрде хэбере э товун жуьр-бе-жуьрелуье лой беинлуье ве ёгъинлуье зиндегуни догъие-жуьгьурие могьлугъе, сер гуьрде эз вэхд Средневековье. Бинелуье объектгьоревоз гешдеи гIилмигьоре Наталье Кашовски бири сенгъгьо ёровурди шегьере Дербенде ве дигьбонгьо: Маджалис, Нюгди, Карчаг, Джерах, Марага, Хели-Пенджик, Янгикент. Кор сохде дуь эекиревоз э сер гуьрденигьо гIилмчигьоревоз э эпиграфически гешдеи гIилмигьоре, Наталье Кашовски неки хуьшдени ю хунде дануьсде гирошдигьо жуьгьургьой догъире ве екейгегьо хэлгъгьой Кавказе, оммо ве хьозуьр сохде нуботлуье эрхэ гIилмчигьоре, комикигьо гIуьзет сохде хуьшдере жуьгьурие культурере ве хундеи дануьсдеи догъие-жуьгьурие жэгIмиет дин-догIотигьоре.
P/S/. Межлуьс бэхширеи бири э жуьгьури-догъие жэгIмиет дин-догIоти бине ОГЕ э Сокольники.
«Барасибергьо бэхше э нум С.И. Вайнштейна – гье угьо, ки веровунде омборе коргьо эри дошдеи дингьоре, гIэдотгьоре, культурере догъие жуьгьургьоре, э гуьнжо овурде чигьрете жэгIмете э гIэрейхэлгъие медиапространстве. Вихде барасибергьоре, эри иму бири лап четин, эхи э гьэд омборе верзуьшлуье бэхшвегиргьо гереки бирмунде верзуьши хубтеегьоре. Вихдеи бири четин, оммо иму боворини, чуьки иму нушу дорейм верзуьшлуьигьоре»,- бирмунди Сервор Фонде СТМЭГИ Герман Захарьяев.
Дофус зери СТМЭГИ
Тержуьме сохди Ягудаева О.
