Хьэе гировунде Уруссиетие бирмунуши тейфелуье гуспендгьо ве буьзгьо дуьимуьн сал офдоре э республике зн иму. Программе гьеймогьине 24-муьн бирмунуши, вокурде оморе ди, бегьеми лугъондлуье ве ведилуье. Бирмундеи ватание дошде веровундеи барасигьо ве миросилуье жире-бе-жирее тегьер гуспенддошди гирошди э Каспийск, э мейдун «Анжи Мейдун томошеи».

Э Догъисту эки корисхи гьеммеуруссиетие доруние гъэдер хьозуьр бире бинеден. Гуспенддошдеи э республике гьеммише хуб параменди, э песини салгьо э хотур чуьки зиёдгъувотлуьи региональни хьуькуьм у ведиреморе э тозе хубе ве гъэдерлуье риз гъэдерлуьи.

Э дигьбониекорсохгьо гьисди чуь бирмунде. Э бирмунуши нушу доре омборте 20 догъистоние гуспенддошдение сэхьиблугъи ве Федеральни гIилмие бине РД. Инжо гIэмел миёв винире догъистоние догъие, андийски, тушински, лезгински, артлухски, эдильбаевски ве софункавказие жире гуспендгьо ве зааненски ве гъовие буьзгьо.

Э кимигьо сэхьиблугъи э кори сохдеи дуь э екировоз э гIилмчирево дерсгьо хьозур сохдеи зевер биреи тебиетие барасилуье хубе догъистоние догъие жире ве тозе эри республике эн иму жире, чуьтам лакон, мериноленд, дорпер ве уруссиетие гушдие меринос.

Гье у гьисди бинелуье везифе Гьеммеуруссиетие бирмунуши тейфелуье гуспендгьо ве буьзгьо. Эри дегиши синогъирево, бирмундеи барасигьо э дошдеверовундеи кор эки иму омори гIилмчигьо ве молгъэредори эз омборте 20 вилеет.

Э зиреклуье гъэдер бирмунуши, у дуразкеши се руз, гъобул сохде бэхшвегири нушудорегоргьо Федеральни хьуькуьм, региональни рэхьберисох АПК, зутеине хэёл сохдеи согъэ жерге бэхьс гофи э вожиблуье пуьрсуьшгьо АПК.

Гьемме бирмундеие дуьруьжде утогъ дорушде хубтее нишонегьо тейфелуье сергьой молгьэре эки 60 сэхьиблугъи эз Астрахански, Ивановски, Калининградски, Ростовски областьгьо, Краснодарски, Ставропольски улке, Кабардино-Балкарии ве еккейгегьо регионгьо вилеет ве, гьелбетте, Догъисту.

Инжо сохде омборе гъэфес-бирмундеи э хьэйвуй хунеи, эже бирмунде 30 жире гуспендгьо ве буьзгьо, дошде веровундеи э вилеет эн иму. Гьер бирмундеи э хьэйвуй хунеиревоз э гуьнжо овурде э жигенореи гьисдигьо э товун дошде веровундеи жире ве э товун мол ведешендение бирмунуши сэхьиблугъи, комики хэлгIэт веноре бэхшгьо, дипломгьо э бедел дошде веровундеи ве тейфелуье кор.

Гьемме рачи ве мэгIлуьметии, ве эзу товун эз себэхь офтолуье суьфдеие руз э бирмунуши бири омборе одомигьо. Музыке, тиён э хьозуьр сохдеи гIошево э гуспендево огол зере э инжо зигьисдегоргьо эз омборе хунегьо ве каспийчан.

Догъисту, Кабардино-Балкарие, Калмыкие ве Ставропольски улке фирегь лов сохде эн хуьщде региональни сэхьиблугъи, жирелуье культурни, хэлгъие ве хуреглуье жирелуье. Бэшгъэ э гуьнжо овурде сэхьиблуьи хэлгъгьо эн Догъисту, э сэхьиблугъи торих комики гуспенддошдеи возире келе жиге. Гуьрд сохде бирмундеие дьуруьжде утогъ э молгьо корхонегьо догъистоние АПК, гене э молгьорево хэлгьие-художествени коргьо. Жирелу ве жире-бе-жирее тегьер догъистоние дошдеи молгъэрере гьемчуьн бирмунде гомишгьо, девегьо, ахалтекински гIэсбгьо дениле.

Межлуьслуье вокурдеи бирмунушире гировунде Сервор Хьуькуьм РД Абдулмуслим Абдулмуслимов. Хунде шолуми гуфдиреи э Сервор РД Сергее Меликове, у кутэхь дори хосиетноме овхьолете гуспенддошдеи э Догъисту.

«Шор сохде, чуьки э гьеймогьоине вэхд санкционни корисохи э хуреглуье корхоне Догъисту гьисди еки эз суьфдеи э молведешендеи гуспенде, комики э эхир 2022-муьн сал бири 37,4 гьозор тонн э 12, 7% зеверте эз бирмундеи 2021-муьн сал.

Э песой и келе барасигьо поисде одомигьо – жофохосдегоргьо, гъэйгъукешие, бофолуье э кор эн хуьшде, не денищире э бологьо.

Согъбоши э гьемме корсохгьо эн отрасле! Э хотур чуьки э шуьлхьон омборе гьемватани гьисди ве гьеммише мибу хубе ве берекетлуье догъистоние хуреггьо, унегуьре иму нисе гIэмел миёв поисде э рафде расиреи барасигьо ве зиёд сохде кумеки эри гуспенддошдегоргьо эн иму»,- риз кешире премьер-министр.

Гъуногъоре ве бэхшвегироре бирмунушире тейфелуье гуспенде шолуми гуфдире жигегир министре дигьбоние сэхьиблугъи РФ Андрей Разин. Согъбоши гуфдире рэхьбер республикере ве догъистонигьоре э хубе гъобулсохи у нушу доре боворини, чуьки и рузгьо бири пур.

«Эзуш бэгъэй келе корлуье программе инжо гIэмел омори ве доруни гIошир бире: лап келе культуре республике нушу доре э и бирмунуши. Ве гьелбетте ме согъбоши гуфдиреи э гьемме э гуьнжоовурдегоргьо э песой ижире муьгьбет ве гъэножогъи эки кор»,- гуфдире Андрей Разин, буьлуьнд гъимете омонети догъистонигьо э параменди молгъэредори ве ватание дигьбониепромышлени комплексе.

Бирмундеи серворе Миллетлуье союзе гуспеддошдегоргьо, академике Уруссиетие академие гIилми Харона Амерханове, хуб гуфдире э товун догъистоние АПК, бегьем сохде межлуьслуье вокурдеи бирмунушире. Э бирмундеи эну, э гъэрорноме везифе хьуькуьм зиёд сохде молгьо эз гуспендгьо, имиди э синогъи эн Догъисту.

Шинох бире э дошдеи веровундеи минкини ватание гуспенддошдеи э рэхьбери эн отрасле гирошди э вэхд динлуье гезме бирмундеи. Э пушо гене келе корлуье программе, комики дешенде э кор пуьруьшсохи биёвгьо гуспенддошдеи э моле э де вилеетиге бердеи миникини, пуьрсуьшгьо хэйрлуье молведешендеи пешме, барасигьо духдиргьо хьэйвуй хунеи хушхьолии, гIилмие рэхьсохдеи ве корсохгьо биреи э отрасле.

Э вэхд ю герек гьисдигьо пуьрсуьшгьо э гуспенддошдеи омбори. Эки меселен, Гази Амиров рэхьбер – СПК «СССР» эз кент Баитли Хунзахски районе, нушу доре тушунски жире гуспенд, ихдилот сохде э товун еки эз четинигьо: э товун гъэгьтии пешме чиреи. «Жире дуьмбеи, гуфдире у,- оммо пешме доре омбор. Пешме чире ве фурухде ведиреморе гъэзенж суьз. Чуьтам бошим? Гье у пуьрсуьш гереки гьово гуьрде э гуьрдлеме.

Наталие Долгове эз Калиниградски область, рэхьбер КФХ, эже дошде веровунде африкански жире гуспенд – дорперов, зиёдте имидие. «Бирмунуши эри му вожиби. Иму уже фурухде чуь овурде э хуьшдерево. Эриму мерэгълу хундеи дануьсдеи синогъи еккейгегьо корсохгьо, гъуьч сохде гъэножогъи э восдорегоревоз, комики мерэгълуь бире э и лап асантие, оммо гъэдер мол ведешендеие жирей гуспенд»,- гуфдире у.

Корсохде бирмундеи те 25-муьн мая. Мерэгълу у ве эри хосдебаз кобобгьо.