Бирмунуши «Лотой урусси» (э томошей Василий Сигарева) э муниципальный театр жугьури Дербенд эде норе келе кеширегор Джанбулат Габибов. Э дуьзугьуни (жугьури не урусси) томоше мешгуьл мибу гьемме десдей корсохгьой театр.

Э гофгьой директор театр гуьро Борис Юдаев, э томоше бирмунде миев бигlэдотлуье гъэдхунегъэ гъозие не хуьшдере бирмундеи, дениширенки, гlэдотие одомие. «Оммо э песей хэндеи тараф томоше пэхьни бири лугъондлуье фикир. Эде очугъ бире нисе веди гьисдигьой мэгlэно одомигьо. Социальни тенсуьзи, э ичку хуте бирегоргьо, бибоворини э гъовум-гъэрдеш, сочгуни – игьо энжэгъ кими бологьои, комики е гъэдер драматург расире омори», — гуфдири Борис Юноевич.

Пердей томоше эде гирошде э чуькле хуне. Кифлетлуье той, шуьвер Николай не зен Галина, эдет берде пул э лото. Зен-шуьвере э и гъозие гиро войсде гировунуд мигlид э хьовироровгьо. Миг1ид эде гирошде, шороб не мэгlнигьо эде тигьи бире нуькерере хуно, эз у бэгъде гъуногъо э сэхьибхуне э хифлет рафдет. Эз сегьери Галина э сер офдо бэхдлуье билит э е жигеш веди нисди. Сэхьибхуне эде шек сохде хьовироре: «Небугеш киниге эз игьо вирихунди?!»

Эгъимиетлуье возирегор Лиана Нагдимунова, ихдилот сохди, «Возирегоргьу егlэлмиш бири э гъэрей келе пуло не гъэножогъи инсонети. Оммо ухшешие вихде пости э пушой гьемме возирогоргьй томоше».

Гьонине вэхд бэхш сохде омори бэхш возирегоргьо, эде хунде оморе томоше. Э и зури репетицие мигирору э сегьне. Пушокие мэгlлуьмети био бу эхир апрель.