Гье и торих духдер догъи, биригьо муьгьбетлуь эри гьемме ве очугъсохе невролог лап дур эз хуне – э Ленинград-Петербург. Э гье и шегьеревоз ве бу бесде оморе гьемме зиндегуни эну ве сенигlэткорлуье рэхь.
Тамара (23.01.1951-22.12.2011) хьэсуьл омори э январь шев 1951-муьн сал э Дербенд, гъэдимие шегьер, гуйге бурра омори эз сенгъ ве кулок, э гlуьзетлуье кифлет Агаруна Худадатовича ве Бет-Заав Юсуф-Кызы Абрамовгьо. Бебе бу мэгlлуьмлуье инженер-нефтяник, хьуьрметлуье неки э гlэзизе Догъистуние АССР, оммо ве дур эз эхиригьой эну. Кейки духдер бисдо чор сала, кифлет рафди э Махачкале. Э 1976-муьн сал варасунде бегьем сохди Догъистуни медицински институт, э огол зереи дуьл хуьшде вихди неврологие – еки эз гьемме гурунде сенигlэт э медицине.
Оммо нисди гьичиш эз гурунди не гирошденигьо, кейки одомире гьисди метлеб ве хьохмоллуье гъосутгьо: духдире Абрамове фуьрсори э Новгородски область Ве гье и бу жирелуье хьэрекети эри чуьки вегуьрде клинически синогъи, кумеки доре одомигьоре инжо ве гьейсэгlэт. Эз дуь салиге омори десхэти эз Ленинград: рэхьбер сохдегор кафедра неврологие нечогъигьо институт нум И.И. Мечникова (гьеймогьой СЗГМУ нум И.И. Мечникова) зури-зури огол зери э гофсохдеи – азад бири теклуье жиге неврологе э ординатуре.
Дарафдеи э ординатуре кафедра неврологие нечогъигьо Институт нум Мечникова, Тамара Агаруновна гье бирден нушу дори хуьшдере чуьтам фикирлуье, гьуьнерлуье ве езугъберисохе духдир, верзуьшлуь бири ихьдибори нечогъгьо ве хьуьрмет эз лой гьемкорсохгьо ве несигlэтдорегоргьо – э вэхд недебиреи рэхьберисохе келеи невролог Абрамова веровунди кор рэхьберсох отделение ве гьэгъигъэт э зир жугьобдорлуьи эну ихьдибори бу эз гьемме гурунде нечогъгьо.
Э сергири 80-игьо Тамара Агаруновна дарафди э гъуллугъсохи неврологи э районни омборежирее софхоне шегьер Петродворец, гьеймогьой СПБ ГБУЗ «Николаевски софхоне» шегьер Петергоф. Инжо у кор сохди 30 сал омборте, э у хьисоб ве рэхьберие должность, сервори сохдеи отделение неврологие.
Э гъэд сенигlэтлуье менфигlэтгьой эну бири лой психоневрологие ве нечогъигьо жуьмуьндение нейроне, гье и гьеммише гурунде нечогъгьо, кими вэхд – кем-кем поюндение жуьмуьсдеи. У гешди тозе тегьер, эхдермиш сохди себеб эн клинически гъозиегьоре – гьеммише э у номуслуьи духдири, комини не терсире денишире э лугъонди нечогъи ве гъисмет.
Оммо чуьтам гуьнжо омори сэхьиблуье гъисмет эну? Духдир эз Догъисту, эри комини Санкт-Петербург бири хуне – хуне сэнигlэт эну, кифлет, буьлуьнде верзуьши. Тамара Абрамова гирошди рэхь эз ординатор те рэхьберсох отделение ве жирее сенигlэткор, верзуьшлуь бире кондуьллуье муьгьбет садигьо нечогъгьо ве хьуьрмет э сэнигlэткорлуье иловле. Те песини руз. Песини руз Духдир – э софхоней хуьшде. Оммо рэхьмедуьле коргьо эз у ве гьисди рэхьмедуьле, чуьки угьоре гьеммише гьисди зиёд дуразкеши. Ве имбуруз теклуье духдер Тамаре Агаруновне – Виктория Александровна – боворинлуь рафдени э пенжей пой деде.
Варасунде бегьем сохди Санкт-Петербургски медицински академие ве ординатуре э Москови медицински академие нум И.М. Сеченова, у кор сохде э Иерусалим (медицински сервор, Университетски Софхоне Хадасса).
Марина Яковлевна Абрамова, духдир медицини гlилм, профессор
Дофус зери СТМЭГИ
Тержуьме сохди Ильканаева И.
