Э буьзуьрге нуьвуьсдеи гуфдире омори: «Э сукогьо зигьит хьофд руз…эри чуьки дануьсде эрхэгьо ишму, чуьки э сукогьо ме нуьшундем кукгьой Исроиле, кейки ведебердем угьоре эз хори Египет».

Мигlид Суккот э 2024-муьн сал сергуьрде шев 16-муьн октябрь ве мибу дураз кешире согъе хьофд руз, те 23-муьн октябрь. Омборте ёргирие руз ве сал э егьудии дин-гlэдоти сергуьрдени нушу доре нисе эз сегьеревоз, гьэгъигъэт эз дарафдеи офтои.

Гировундеи Суккот фуьрсорени эки торих э товун говлеи кукгьой Исроил эз Египет.

Э гешдеигьо буьзуьрге хори жугьургьо оворе бири э сэхьро 40 сал, зигьисдеи э суко эз шушле – сукках. Ёргири э товун у вэхд егьудии торих ве гlуьзетсохи мигlид Суккот.

Суккот гьисди еки эз лап шорелове егьудигье мигlидгьо, чуьнки э у вэхд жугьургьо гуьрд бире э гьееки, эз Худо разини эз у гъовумбази ве минкини мозоллу зигьисде э хори. Э гъэдимие у вэхд гьемиге бегьем сохде зимии кор ве гlошире мэхьсуьл бу диеш е вогьне эри шорелов.

Э и товун вожиблуье несиет Суккот гьисди нуьшдеи э суккот – э суко, комики поюндеи э жиге э зир вокурде асму. Э ижире коревоз егьудигье хэлгъ ек бире э хуьшдени бебе-келебеберевоз, комигьоки оворе бири э сэхьро гешдеигьо Хори имиддореи. Гье у неки вогошдеи эки гьевелине, оммо ве мугъоетире эз зиёдлуье инсони текебурлуьети, бесдеоморе э гlошири. Дебе сохдеи э кими вэхд эз хутебиреи жире зиндегуни, егьудигьо э ёр овурде э товун вожиби дошдеи дин-догlот, хьэрекети эки буьлуьнде хушхьоли. Эзуш бэгъэй, Суккот э ёр овурде э товун еклуьги хэлгъ ве эну азади эз гьемме, эзуш бэгъэй ниет Худо.

Еки эз вожиблуье дин-гlэдотгьо гьисди зиндегуни э суко. Э дуразкеши гьемме оринеи мигlид э суко хурде хурек, вохурдеи э гъуногъгьоревоз, вежегьисдеи ве гъэдиш зере. Э вилеетгьо э герме гьворевоз э суко гьемиге хисиренуьт.

Э и товун гуьре эки суко ве эну десдин дебиреи нушу дори жерге талабсохи. Сукоре войгеи вокурде хуьшдени ю. У миё бу вокурде оморе эз се дивор ве поисде э вокурде жиге: э хьэёт, э балкон, бохче мошини, шишехоне ве екиге. Вожиблуьи, эри чуьки э зевер сер эну не бу гьичиш, бун ве доргьо. Эри вокурде суко гlэмел миёв э кор венгесде гьер мол, оммо бун эну ёгъин миё бу дегуьрде оморе эз шушле, гъэмишлугъ, гиёв ве екиге битмишигьо. У дегуьрдеи гъэлхэнди сохде эз офтои ве сузуми, оммо нисе эз гужлуье воруш, э вэхд коминики руьхсет доре мунде э хуне. Э суьфдеи дуь руз межлуьс – гьеле эгенер э куче сайлов оморе, гереки хурде э суко гъэрезки ми чуькле кесег нуне. Гьемиге нуьвуьсде омори шевхисиреи э суко, оммо эри гlэилгьо, зенгьо, нечогъгьо ве эри угьо, ки зигьисдени э хинике вилеетгьо, у нисди ёгъинлуь.

Вожиблуье бедел Суккот гьисди гlэдот вокоширеи лулаве, э вэхд коминики миё бу борухо сохде эри чор жире битмишигьо. Эри гье у вечире оморени хунче эз этрог, шушле луьл, адаса ве арава. Э жейлеи угьо гуфдирени э товун жире жугьургьо, оммо гьееки гуфдирени э товун еклуьги хэлгъ.

Гьечуь, этрог дорени мейво, комигьоре гьисди ве лезет ве буй,- у жугьургьо, комигьоки дануьсденуьт Туро ве зигьисденуьт седугъи жире зиндегуни. Э гидеи луьле вероморени ширине мейво, нисе оморенигьо буй – гье у гьисди боворсох дин-догlот, комигьоки дануьсденуьт Буьзуьрге Нуьвуьсдеи, оммо нисе сохде рэхьмлуьи коргьо. Эз битмиши мирт буй оморе, оммо гуьле гlэмел нисе оморе хурде,- гье у егуьдигьо комигьоки зобу дануьсде Туро, оммо сохденуьт рэхьмлуьи коргьо. Суьгуьт лезетсуьз ве буйсуьз, у гуфдирени э товун угьо ки шинох нисди э дин-догlоти нуьвуьсдеигьоревоз ве не сохде хушхьоли коргьо.

Гуьре екиге гъондуьрмиши, этрог гуфдирени э товун дуьл, шушле – луьл шидрей кемер, гиргинее тегьер велг мирте – чумгьо, оммо суьгуьт – лэгlэ. Кучмиш сохде оморигьо э хунче, угьо гуьнжуьнде одомире, коминики бофолуьи э Худо ве хуьшдени боворини.