Хьуьрмет эни одоми гъобул сохде оморигьои. Одомигьо бежид пуьрсиренуьт эз у несиет ве гуш дошденуьт эки фикир эну. И мере мерэгълуь сохди, ве ме гъэрор сохдем э уревоз гоф сохде, лап четин бугеш: у хэвлетсуьзе одомини, гьеммей вэхд эну доре омори э коргьой эн жэгIмиет дин-догIоти. Оммо у рази бири жугьоб доре э сер пуьрсуьшгьой ме.
– Шинох бошит: рэхьбер эн Кисловодски жугьурие торихе-базургенде меркез ве гье евэхди жигенлуье раби Акива Ашалом Худайнатов.
– Сер мигуруьм эз гIэдотлуье пуьрсуьш: эже ишму хьэсуьл оморейт, эже хундейт, эже гирошди гIэильети ишму – лап очугъэ вэхд э зиндегуни эн гьер одоми?
Ме хьэсуьл оморем э Грозный, гье э унжо варасдем миенее школере. Умогьой Грозный бу омбаремиллетлуье шегьер. Э салгьой гIэильети ме ве э жовони жугьрнехогьи э унжо небу. И бу гьеле ве э товун эну, ки э ер чеченгьо лап хуб мунди, чуьтам э четине эри энугьо салгьой ведекуьрдеи энжэгъ жугьргьо гъувот дорет угьоре. Имуре бу келе хуне. Э унжо зигьисдембу гьеммей кифлет иму: ме э деде-беберевоз ве э бироревоз, келедеде э келебебревоз, хэгьергьо ве бирор деде. Хуне э минжи шегьер дебу, эже кифлетгьой жугьургьо кем бу, эзу товун ме э бироревоз э школе бирим е теке жугьургьо. Мере ве бирор мере омбаре хьовиргьо бу, угьо жире-бе-жирее миллетгьо бируьт, омбар чеченгьо. Иму зигьисдебирим экундигьо эн нуькере Суьнжи, эже гировундебирим омбаре вэхд э хьовиргьой имуревоз.
Кифлет иму бегьем дине нисе гуьрдембу, оммо гIэдотгьоре дошдембирим, кимигьоре – лап тижлуь. Куьнде гъуншиети э мусурмуе хэлгъэвоз э иму лап кумеки сохдебу, чуьнки омбаре динлуье тегьергьо ежирелуьни. Мило сохде эри екиш муьгIжуьзи небу, чуьнки мусурмугьош мило сохденуьт.
Песдеине соводи ме ологълуьни э экономикеревоз. Хунде варасдем московски зеверие соводие идорере э сенигIэт «финансы и кредит». Песде кор сохдебируьм э текстильни корхоне. Гьеле э жовоне гIуьмуьрлуьгъи бирем рэхьбер корхоне ве э песдеине корисохи ме кор сохдебируьм э серворлуье жигегьо.
– Гъувот иму э биней имуни, э шивдой имуни. Ихдилот сохит э товун деде-бебе ве э товун дуре биней ишму.
– Мидануьм гуфдире, ки э риз деде э шивдой иму дери кифлетгьо эн Мелиховгьо, Фараджевгьо, Шубаевгьо ве Алхазовгьо. Келетегьо э риз бебе бируьт эз гъумолет Худайнатовгьо, оммо э гъовумгьой эн келедедеревоз иму гоф нисе сохдембирим, эзу товун ме дануьсденуьм энжэгъ э товун келетегьой эн келебебей ме.
Гъумолет имуре, воисдембу кучмиш бире эз Софунлуье Кавказ э Хори Исроил, оммо поисди э грузински шегьер Кутаиси. Ве гъовумгьой иму омбаре вэгIэдо зигьисдембируьт э унжо. Оммо келебебейме, нум комики доре омори мере, ве суьгъде бирор эну эз гьеммейки зуте вогошде оморет эз Грузие э Софун Кавказ, э Грозный. Омбаргьо эз Худайнатовгьо мундет э Грузие, рафде э Исроил не дануьсдет. Ве дирте омбаргьо эз куьнде одомигьойме рафдет э Исроил эз Кутаиси. Бебейме бине дешенди э Грозный, зен хосди, э унжо уре дуь кук бири. Чуьклеи кук – бебейме Бениамин-Валерий, гьонине вэхд э дедеревоз зигьисдени э Исроил. 120 сал гIуьмуьр гердо угьоре э борухо сохде оморигьо хори!
Бебе кор сохдембу э пуске-наладке газови установкегьоре. Песде, гирошденки э Пятигорск, эже гьеле е ченд салгьо кор сохдембу э гъуллугъсохи газе. Деде бу мэгIлуьмлуье кондитер э Грозный, бесгъубер эн омбаре кулинарни боржберигьо. У кор сохдембу э тукун «Столичный», эже кор сохдембу кондитерски цех.
Кифлет эн бебейхолуйме, Мелиховгьо, эз кубански жугьургьои. Угьо бине дешендет э Ставрополь, кейки э унжо жугьургьо гьеле кем бу. Келеи бебейхолуйме Менашир зен эшкенези хосди, Хайке Альперине, кук эну Шолум зен хосди жугьур догъире, ве кук эн Шалум, Ифраим, бебейхолуйме, зен хосди Сивье Фараджеве, гIэзизе келедедеймере. Угьоре бири пенж гIэил. Келеи эзугьо – дедейме Либа – уре доре омори нум эшкенезии э гIуьзет эн келеи дедейхолуйме эн Хайке. Бебейхолуйме идмончие одоми бу. Кеййки сер гуьрде оморебу довгIо, у ве бирор эну Яков гье бирден э лешгер огол зере оморебируьт ве рафдебируьт э довгIо. Яков мэгIлуьмсуьз нисд бири (дирте очугъ биребу, у пуч бири) Оммо Ифраим вогошде омори э омбаре бэхшгьоревоз, верзуьшлуь гъовхо бердебу. Эз ерагьо гIэзиет кеширембу у, ве у зигьисди гьемме 63 сал. Келетегьойме, Менашир (Менаше) ве Хайке, бируьт сэхьиб фабрике эже ведешенде оморембу кондитерски молгьо. Э омореи советски хьуькуьмевоз Менашир варасири, ки девлет гье генешки вегуьрде миев – ве э войгей хуьшде гуьре гьеммере дори тозе хьуькуьме. Ве песде, э вэхд НЭП, у э Хасавьюрт э гуьнжо овурди кондитерски цех. Кейки НЭП вегуьрде оморебу, у кор сохдембу э Грозный. Келедедейме ве келеи келедедейме хундембируьт э гимназие. Э ерме мунди, чуьтам угьо хундембируьт Байроне, хундембируьт романсгьо. Э хуней гъуомолет иму бу омбаре книггьо э зугьун иврит ве э идиш (э хотур келеи келедеде Хайке). Ме шиновуьсдебируьм, ки Менашир э хотур зен хуьшде хунди дануьсди идише, ве Хайке жугьурире.
– Раби – и динлуье пушобери, дануьсдегор Турои. У мие тербие ду весиетгьой Туроре, оммо и асант нисди андуьрмиш сохде э одомигьо. Чуьтам ишму оморейт эки эну, эри гъуллугъ сохде раби?
– Ме раби бирем э хотур хьэрекети зигьисде, дошденки гъонунгьой жугьургьоре. Рафдебируьм эки ижире зиндегуни лап дир, э хотур дедейхолу Сивье. У хуьшдени ю э шоббот гьич вэхд гIэтош нисе дегесуьндембу. Ве анудьрмиш сохдембу и гъонунгьоре, хуте сохдембу мере ве бирор мере.
Чуь расирениге э лугъонде гъонунгьой жугьури, и верзуьши эн лелей мени эн Мелих, комики лап омбар ихдилот сохдембу э товун эни. Э кифлет овхьолет жугьури бу: эри ме гировунде оморебу бар-мицва (дузи рабисуьз ве сифир Тиросуьз).
Э Грозный умогьой э жигей гьэгъигъэтлуье нумаз бу нумаз хунденигьо хуне, эже ме оморембируьм веноре тфилин. Э 1991-муьн сал, кейки ме зигьисдембируьм э Пятигорск, э унжо оморебу жовоне раби Шертиэль Шалумов. Ме шор бируьм куьнд бире э уревоз ве хьэрекети сохдебируьм кумеки сохде э кор эну. Песде иму рафдебирим э Исроил, ве э унжо ме желдлуь сер гуьрдуьм бэхш вегуьрде э жугьурие зиндегуни: Э Хори Исроил минкингьо эри дошде гьемме гъонунгьоре, гьелбетте, омбартеи.
Песде, оморенки э Москов ве шинох биренки э раби Исаак Абрамович Коганевоз, риз дошдеиме бегьем дегиш бири. Бизнессе ве гъонунгьоре ме дошдембируьм гье евэхди – и гурунди, оммо ме хьэрекети сохдебируьм. Гоф сохденки э рабиревоз, ме варасирем, ки мере гереки муьхьшуьл бире энжэгъ э диневоз, ве сер гуьрдуьм кор сохде э нумаз э Келе Бронни. Дирте мере огол зери дин-догIотие жэгIмиет эн шегьер Пятигорск эри вокурде тозе нумазе э кучей Тольятти. Ве умогьой ме э хьисоб венорем дин-догIотие жэгIмиете «Пятигорски жэгIметлуье дин-догIотие меркез», чуьнки э нум эну гуьре сер гуьрде вокурдеире. Гьечи иму кор сохдебирим гьееки э Агарун Мардахаевевоз ве угьонигее одомигьой эн дин-догIотие жэгIмиетевоз. Песде оморебу гьеммишеине раби Михаэль Хен, комики те имбурузине рузиш э унжо кор сохдени.
– Ишму раби эн Кисловодски, оммо ме дануьсденуьм, чуь эки ишму руй биренуьт одомигьой эн дин-догIотие жэгIмиет эз шегьергьой эн Ставропольски улке. Чендгъэдер одомигьо э дин-догIщтие жэгIмиет эн Кисловодск?
– Э 2019-муьн сал ме сер гуьрдем веровунде гъэрхундигьой рабире э нумаз Кисдоводск. Оммо те иш ме шинох бируьм э омбаре жигенлуье жугьургьоревоз, ве гьэгъигъэт, одомигьо гье бирден сер гуьрдуьт оморе э нумаз. Дузе гъэдере ме нисе дануьсденуьм гуфдире. Чуьтам дуз гуфдири эз ме серворлуье раби эн Уруссиет Берл Лазар: «Гъэдер одомигьоре лап четини дануьсде э гьер жиге эн вилеет иму ве эн гIуьлом, эзу товун ки гьеммише гье гене ве гье гене веди бирени жугьургьо, комигьоки э коминиге войге гуьре пэхьни сохдебируьт хьэсуьл омореи хуьшдере». Галахически жугьургьо, комигьоки тогIин сохдет жугьури хуьшдере эз лой деде, э Кисловодск эз 300 одомигьо омбартеи. Одомигьо, комигьоки хьисоб сохденуьт хуьшдере жугьур эз лой бебе, кем нисди. Э нумаз гьеммише шоруьт винире угьоре.
Омбаре бэхш жугьургьо – и эз 70 сале ве келете одомигьои, омбар угьо буьлуьндесоводлуье одомигьои. Еки эз угьо, Барух (Борис Матвеевич) Розенфельд – гIуьзетлуье одоми эн Кисловодск, лап хьуьрметлуье одоми э нумаз иму, лап омбар сохдигьо эри базургенди эн гьеммей десде эн шегьергьой эн Кавказски Минральни Вод. У нуьвуьсди е ченд торихлуье книггьо. Гьисди ижире вегирлуье одоми Ейлик бен Мордхе-Бер (Юлий Михайлович) Пинский, у 90 салеи, кор сохденигьо духдири. Мерэгълуье одоми – Сиюн бен Гидон Алхазов. Жугьургьо омбар сохдет эри шегьер иму: Давидсон Борис Семенович, Пихельсон Леонид Евсеевич, Измайлов Геннадий Михайлович, Готберг Борух (Борис Викторович) ве диеш. Кимигьо келете одомигьо мило сохдет. Эри эни кор эз Москов оморебу моэль Шая Шафит.
Зен ме сервори сохдени клуб зенгьоре, бэхшвегиргьой эну гьеммише оморенуьт э нумаз э шоббот ве э миенее рузгьо.
– Дин ве гIэдотгьо кумеки сохдени гирошде эз зиндегуние четинигьо, комигьоки офдорени э бэхш эн гьер одоми?
– Дин – и е теклуье гъувоти, кмеки сохденигьо гирошде эз четинигьой зиндегуни. Кейки иму бовор сохдени э У Екии, иму варасиреним, чуь гьемме гирошдени э войгей Эну гуьре. Ве энжэгъ э иму, эн жугьургьо, кейки гьерки гири рафдени эз гIэрей зиндегуни, иму гуфддиреним: «Борухо сохди Дивунчи Седигь». Дин ве дошдеи гIэдотгьоре – угьо хубтее гэлхэндчигьой имуни э гьемме синемишигьой зиндегуни.
– Комини проектгьо э кор венгесде оморени э дин-догIотие жэгIмиет эн Кисловодск?
– Вожиблуье проект иму – гъуьч сохде кугьне нумаз эн Кисловодске. Эз 1990-муьн салевоз ме гешдебируьм спонсоргьоре, гуфдиребируьм ки гереки восдоре беной нумазе ве гъуьч сохде уре. Э февраль2019-муьн сал, э кумеки эн Леонид Ханукаеввевоз, кумеки воисде сохде э гъуьчсохи нумазе бизнесмен Наум Бабаев, ве игърол бесде оморебу, беноре у восдоребу. Серворлуье раби эн Уруссиет Берл Лазар ве раби эн нумаз э Келе Бронни Исаак Коган гъобул сохдет фикир имуре ве борухо сохдет э тозеден сохдеи нумазе. И торихлуье архитектурни комплекси, э кумеки Худоревоз, те эхир гъуьч сохде миев э эхир ноябрь эни сал. И дуь беногьо мибу келе торихлуье-базургенде меркез эн дин-догIотие жэгIмиет эн жугьуоргьо.
– Ихдилот сохит э товун кифлет хуьшде, э товун зен – эхи э сер эну вери гъэрхунди эри келе сохдеи гIэилгьоре. Э коми тегьергьо гуьре угьо келе сохде оморебу?
– Кифлете иму офирейм э 1987-муьн сал. Хьэрекети сохдебирим гьемме сохде э гуьрей эн гъонугьой жугьургьо. Иму мегьр бирейм э гъонунгьой Туро гуьре. У вэхд э Кисловодск мегьр гьеле сейрек бу.
ГIэилгьоре имуре дори Офирегор э Исроил, ве угьо келе бирембируьт э гIэдотгьой жугьургьо гуьре, угьоре хуте сохдембу зен ме. У гьеммише эри ме бу лап вожиблуье кумекчи э пуьрсуьшгьой дошдеи гъонунгьой Туроре. Эри келе сохдеи гIэилгьоре ме согъбоши гуфдиренуьм эз зен ме, гьейсэгIэт у муьхьшуьл бирени э чор невегьой имуревоз.
– Чуьжире несиет мидорит ишму жовоне эрхэгьой жугьурире?
– Жовоне одомигьой эн хэлгъ имуре гIэмел миев доре омбаре несиет – омбар хунде. Гьеркире гереки э план руз вихде вэхд эри хунде дануьсдеи Туроре. Сер гуьрде гереки эз хунде дануьсдеи гIэдотгьоре ве гъонунгьоре. Э пушой гъобул сохдеи комининиге гъэрорномей хуьшдере, разилуь сохде угьоре э гъонунгьоревоз, комигьореки эри иму фуьрсори Офирегор!
Нуьвуьсди Стелла Давыдова
Тержуьме сохди Ильягуева А.
