Хьуькуьметлуье программе эн Республикей Догъисту «Дошдеи, хунде дануьсдеи ве параменд сохдеи хьуькуьметлуье зугьунгьой эн Республикей Догъисту» тогIин сохде омори 20-муьн ноябрь э гъэрорномей эн Хуькуьм Догъистуревоз.
Гереки э ер овурде, ки э товун вожиблуьи тогIин сохдеи ижире программере э Фуьрсореи хуьшде эки Хэлгъие Гуьрдлеме гуфдиребу Сервор Догъисту Сергей Меликов.
Везифей программе гьисди э гуьнжо овурде гереклуье овхьолете эри дошдеи, хунде дануьсдеи ве эри параменд сохдеи хьуькуьметлуье зугьунгьой эн Республикей Догъистуре ве унигее зугьунгьореш, гьемчуьн зугьунгьой эн бинелуье кемегъэдерлуье хэлгъгьой регионе эз республике эуло.
Чуьтам андуьрмиш сохди Сернуьш Хьуькуьм эн Республикей Догъисту Абдулмуслим Абдулмуслимов, гьеймогьине овхьолет эн зугьунгьой хэлгъгьой Догъисту ологълуь гьисдигьо э вир не биреи энуревоз. Е бэхш зугьунгьой Догъисту михьтожлунуьт э жейлее гъэлхэнд сохдеи, э кимигьо зугьунгьо гоф сохденуьт лап кеме одомигьо (эз е ченд сад те е ченд гьозор одомигьо), ве эзу товун гурунд бирени хуте сохде нуботлуье эрхэгьоре.
Хьуькукуьметлуье программе фуьрсоре омори эри гуьрд сохде гъувотгьой эн органгьой хьуькуьметлуье хьуькуьме, эн жигенлуье хуьшденрэхьберисохире ве соводлуье идорегьоре, институтгьой эн граждански жэгIмете э кор деошдеи, хунде дануьсдеи ве параменд сохдеи зугьунгьой эн хэлгъгьой эн республикей имуре. Э кор венгесдеи эну кумеки мисоху э гуьнжо овурде гереклуье ихдиерлуье, э гуьнжо овурденигьоре, гIилмие-методически ве мэгIлуьметие овхьолетгьоре эри тен-бе-тение ве эри бегьем парменд сохдеи зугьунгьой хэлгъгьой Догъистуре чуьн миллетлуье гIошири эн республике»,- андуьрмиш сохди Абдулмуслим Абдулмуслимов.
Республике Догъисту – еки эз лап омбаремиллетлуье ве омбарезугьунлуье регионгьой эн Уруссиетлуье Федерациеи, эже зигьисденуьт нушудорегоргьой эз 30 бинелуье миллетгьо омбарте, эз 110 хэлгъгьо омбарте э зугьунгьой хуьшдеревоз ве э жирей гофсохдеиревоз, э базургендиревоз ве э гIошире гIэдотгьоревоз. Э Конституцие эн Республикей Догъисту гуьре хьуькуьметлуье зугьунгьо гьисди зугьун урусси ве зугьунгьо эн хлгъгьой Догъисту. Гьеммейкире ки зигьисдени э мескен эн Республикей Догъисту зомин доре омори ихдиери, ихдиери эри дошде зугьун дедеи хуьшдере, э гуьнжо овурдеи овхьолете эри хунде дануьсдеи уре ве эри параменд сохдеи.
Э Догъисту эз гьемме омбар мэгIлуьмлуьнуьт русси, аварски, агульски, мисурмуи, табасарански, татски, цахурски ве чеченски зугьунгьо.
Лап омбарегъэдерлуье бинелуье хэлгъгьой республике, э гуьрей эн Гьеммеуруссиетие нуьвуьсдеи муогьлугъэ эн 2020-муьн сал, гьисди аварцгьо, даргингьо, кумыкгьо, лезгигьо, лакцгьо, табасаранигьо, мисурмугьо, чеченгьо, уруссгьо, ногайцгьо, агулгьо, рутулгьо, цахургьо ве диеш.
