Сервор Догъисту Сергей Меликов гировунди гуьрдлеме рэхьберисохие несиете эсер параменди шегьерие жейлее чапарлуье мескене э регион, э комики бири гуш дошде мэгIлуьметире э товун веровундеи хэберлуье гъэдэгъэгьоре.
Министр вокурдеигьо, архитектуре ве ЖКХ республике Бахтияр Уллаев гуфдири, чуьки кор рафде э везиферевоз: эз 15 гъэдэгъгьо э имбурузине руз бегьем те эхир веровунде омори 10, коре эсер мундегьо пенж зиёд сохде э норе е гъэдер вэгIэдо.
Э гъэд барасигьо – желдлуье кор эсер дешендеи тозеден э хуьшде дировундеи кучере Маячная э Каспийске э федеральни программе, тигъэтлуье тегьер кор сохдеи дуьруьжде пуледореие проектгьоре (гъуногъхонеие гуьнжуьндеигьо, зигьисдение вокурдеи) ве дешендеи суьфдеие игъролгьоре э товун гьемметарафлуье параменди е гъэдер мескенгьоре (КРТ).
Пуьруьш сохде корисохи коргьоре, Сергей Меликов нишоне венореи тегьергьоре параменди шегьерие жейлее чапарлуье мескене э Догъисту. У риз кешири, чуьки гьемме пуледореие фикиргьо мибу фегьм сохде бэгъдовой разисохдеи э шегьерие хьуькуьмевоз, ве ёгъинире дануьсдеи, чуьки бэгъдовой гъувоте дореи муниципалитетевоз минкинигьоре веровундеи проекте сер гуьрде селигъэе тигъэтлуье тегьер кор сохдеи э пуледорегоргьоревоз.
Сервор регионе дори е ченд вожиблуье овхьолетгьо эри тогIин сохдеи проектгьоре гъолинди вокурдеигьо нисе биё бу зевер сохдеи 30-40 %, бедел хунеие бине биё бу э кор венгесде эри муниципальни герекигьо, дешенде дореи хунегьоре етимгьоре, шуькестгьоре ве бэхшвегиргьоре СВО, оммо э проектгьо биё бу пушоки дире дануьсдеи объектгьо социальни инфраструктуре – школгьо ве бохчей гIэили, спортивни жигегьо ве объектгьо культуре.
Жирелуье тигъэти биё доре оморе гъиметдии шеле венореи э рэхьие тургьо ве инженерни коммуникаци, гьемчуьн гъобулисохи вокурдеигьоре талабгьоревоз э гъэршуй зулумкорлуье гъэлхэнди сохдеи ве э гуьнжо овурдеи хокоруе контейнерни жигегьоре.
Эзуш бэгъэй, Сергей Меликов риз кешири гереклуьи хьозуьр сохдеи зуте вегуьрдеи технически иловлегьоре екбиреире, нисе етегьер когъозгьо э товун минкини мерэгълуь бире э биёвгьо.
«Энжэгъ кейки гьеммей и овхьолетгьо разилуьире мивегину, иму миданим доре рэхьми э веровундеи проекте»,- гуфдири сервор Догъисту. Э гофгьой энуревоз, ижире корисохи гьишде э гуьнжо овурде хубе ве хоше хунегьо.
Жирелуье тигъэти э гуьрдлеме бири доре параменди инженерни инфраструктурере, дешенде овурдеи э гъэдерлуье овхьолет сайловие канализацигьоре ве веровундеи дуьруьжде проектгьоре гIоведореигьоре ве гIовеведебердеигьоре, комикигьо миду биёвгьо параменди шегьерие жейлее чапарлуье мескене. Эсер хэбер дореи Минстрое республике, э имбурузине руз э жиге Махачкалински-Каспийски шегьерие жейлее чапарлуье мескене везифе нори эки веровундеи 18 пуледореие проектгьо э иловлей зигьисдение вокурдеигьо.
Э сер везифе норе ве вокурдеи дуьруьжде инфраструктурни проектгьоре эсер гIоведореи ве гIовеведебердеи э хьисоб дешенде омори вожиблуье параменди жигегьой шегергьоре Махачкале ве Каспийске.
Э везифегьой дореи канализацие могьлугъе Махачкале ве Каспийске веровунде оморе жергей корисохигьо э гъэд «Инфраструктурни нуботноме», комики бире эз хьофд объектгьо.
Бегьеьем сохде, Сергей Меликов эрзо нуьвуьсди, чуьки серворгьо шегьергьо мивегину омборте ихдиёри э пуьрсуьшгьо параменди шегьерие жейлее чапарлуье мескене. У риз кешири, чуьки боржбери э гъонунсуьзлуье вокурдеигьоревоз келе хунегьоре зиёд сохде, оммо э пушо поисди гене омборе коргьо. «Ме фикир сохденум, чуьки, белки, те эхир сал кор мисохим гене э и рэхьгьо, э гъэдер гуьрдлемегьо несиете, песде уже, чуьтам ме гьевелие гиле гуфдирем, доре ихдиёригьо серворгьоре шегьергьоре, оммо э ёгъинлуье фегьм сохдеие коргьоревоз эз лой хьуькуьме»,- бирмунди сервор регионе.
Э ёр овурденим, Несиет бири э гуьнжо овурде э июль 2024-муьн сал э буйругъгьовоз серворе регионе. У огол зере э кор венгесде гьемкоркиире э гIэрей идорегьо хьуькуьме ве муниципальни соводигьоревоз эри параменди шегьерие жейлее чапарлуье мескеневоз.
