Э луьвэхь егьуди гуьре динбоворесохе хэлгъ иму 14-муьн Адар гировундени мигIид Пурим (Гьомунуре). Имисал э григориански луьвэхь гуьре мэгIлуьмей мигIид офдорени 23-муьн март, 24-муьн март мигIиди, 25-муьн март – Шушан Пурими.

МигIид Пурим нушу доре оморебу э гIуьзет муьгIуьжуьзе тегьер хилос сохдеи жугьургьоре э Персидски империе 2400 зиедте сал пушо, э вэхд огъоети падшогь Ахашверош.

Векил падшогь Гьомон норебу эри хуьшде фикир телеф сохде селт гьеммей хэлгъ жугьурире. Эри бегьем сохде вэхьшие везифей хуьшдере у офдени вэхд эри пуч сохде согъэ хэлгъэ. Гьомон, комики бу суруле одоми, сер зере э падшогь гуфдирени:

— О падшогь! Гьисди э падшогьети туь е гъэйм, ухшеш нисе зеренигьо э де хэлгъгьоиге. Угьоре нисе воисде э туь сер зере. Гереки угьоре телеф сохде ве ведекирде эз хоригьойму. Туь рази бисдориге ме мидешенуьм э хэзиней туь дегь гьозор монетгьой нуьгъреи. Ахашверош гъул кеширени буйругъэ, оммо у нисе дануьсде, ки зен эну Истир жугьури гуфдире.

Зулуме хэбер расиренге э сервор жэгIмиет егьуди Мордехэй, у кура сохде жэгIм егьудире, лово хосдени эз Офирегор ве гирденуьт тэгIните. Увэхди Истир мэгIлуьм сохд э падшогьэ товун зулумие коргьой Гьомон ве хосдени эз падшогь рэхьми-кумекире. Ахашверош буйругъ дорени эри дуллу сохде Гьомоне. Мердехэй норе оморени везир эн падшогь э жигей эн куьшде оморигьо Гьомон.

Э 14-муьн Одор жугьургьо и Рузе келе мигIид гирдуьт. Истир гуйге буйругъ до э товун жугьургьо хилос биреи эз дес Гьомон гьер сал и мигIид гирде биев гуфдире.

Имогьой гьер сал е мегь пушоте сер гирдеи Нисону хэлгъ иму гирдени мигIид говле биреи егьудигьоре.

Эзу товун 14-муьн Адар гировунде оморени тэгIнит Истир.

Измуш офде оморенуьт жуьре-бе-жуьре гьомонгьо, эри комигьоки тоб не бири эри дуьл доре хосде хэлгъ имуре ве веноренуьт хьэшоре э сер шолумлуье гъэйм иму. Телеф гердо гьемме гьомонгьо э гIуьлом. Мозоллуь гердо хэлгъ иму ве гьемме хосдегоргьой эну.

Омбаракбу гердо мигIид шори ве говлеи! Эз дуьли эдее омбаракбу сохденим ишмуре э мигIид шори ве говлеиревоз. Дуьл ишму гьеммише шор бире э гьемме шоре мигIидгьо расошит!

Чор бинелуье несигIэтгьо Пурим.

1. 1. Хундеи Мегилат Истир. Гьре одоми дуь гиле э руз ю бэхш вегинуь э хундеи Книг Истире, комики гIэмелини эри мердгьо, гьемчуьн зенгьош.
2. Шоре тегьер вараюнде оморигьо шуьлхьон мигIиди. Бэгъдевой себэхьине хундеи Свиток Истире норе оморени шоре мигIид, гIэмелини гьенжире шороб, ширинигьо ве шори сохде.
3. Гъуногъсевен сохде «мишлоах манот». Э Пурим жугьургьо фуьрсоренуьт бэхшгьо эри хьэрмэхьгьо, куьнде гъовумгьо (хурекгьо ве ширегьо). У одоми фуьрсоренигьо «мишлоах манот», эри могълугъ, омбар хьуьрметлуьни.
4. Кумек дореи эри косибгьо, михьтожлуьгьо, иллогьки эри дуь одоми кемте нэгI. Гьелбет, тэгIрифлуьни у инсон бэхширенигьо мисволуье коргьоре. ГIэмелини гировунде коргьой мисволуьире руз те шогьонгум сер гирде.