Марал Давыдова нушудорегор гъумолет, биней комини лугъонд ведарафдени э Гъирмизине Слобода, оммо хуьшдени ю хьэсуьл омори э Баку. Э кифлет деде-бебей эну бири хьофд гlэилгьо. Марал омборегlэили деде, угьоре хьэсуьл омори чор зиёдгуьзелие гlэилгьо. Омборе сал, эз 23-муьн сал, у зигьисдени э Москов, желдлуь бэхшвегири сохде э гьоимдошдеи дин-гlэдотгьой хэлгъ хуьшдере ве кор сохде э соводи дореи жогьиле эрхэгьоре. Имбуруз у бэхш бире зиндегуние синогъи хуьшдеревоз, ихдилот сохде э товун кифлетлуье дин-гlэдотгьо, гьемиге вокурде очугъ сохде пэхнии муьгьбетлуье жирей хурекгьоре.
— Шалом, хьуьрметлуье Марал. Ишмуре ижире раче нуми. Ки ишмуре дори и нум?
— Нум Марал мере дори келебебе э хотур дедей хуьшде.
— Чуьтам ишму дануьсденит дошде гlэжоиблуье гlэдотгьоре ве дин-гlэдотгьой хэлгъ хуьшдере, зигьисдеи э дури эз жигегьо динлуье кучмиш биреи жугьургьой догъи?
— Иму эз гlэили зигьисдейм э келе кифлет, эже келедеде ве келебебе гоф сохдет э жугьури. Гье у бу гьелбетте, эзу товун ки гофсохи дуь э екиревоз э зугьун дедеи. Гьемме гlэдотгьоре иму вегуьрдейм эз угьо. Ве муьхькемлуь гlуьзет сохдейм, гьемме, чуь угьо сохди ве эз гъонун не ведарафдеи.
— Комини жирелуье мигlидгьо ве гlэдотгьо кумеки доре кори сохде дуь э екиревоз э эрхэгьоревоз э гъэд кифлет ишму?
— Гьемме мигlидгьоре иму эз гъонун не ведарафде эз гlэили: гьелбетте мигlид Нисону (Песах), Рош а-Шана ве екигегьо вожиблуье гъозиегьо жэгlмиет дин-догlоти имуре.
— Эйчуь гьэгъигъэт зугьун жугьури вожиблуьи э корисохи несигlэдореи?
-Эри иму лап вожиблуьи дошдеи дин-гlэдотгьой хэлгъ жугьурире, э у хьисоб, гьелбетте, зугьун дедеи. Жугьури руьхсет доре мэгlлуьм сохде э гlэилгьо жирелуье торих ве верзуьши эн культурей иму. Гlилмчигьо гуфдиренуьт, чуьки фикир одоми дегиш бире эз межбурлуьи эз товун у, э комини зугьун у гоф сохде.
— Коминини ишмуре эз гьемме очугълуье ёрбиёри эз гlэили, бесде оморенигьо э зугьун жугьуриревоз.
— Э ёр ме гьисди гьово гlэзизе хуне, пурлуье гlэзизе лугъотевоз, гермиревоз ве гъэйгъукеши эз келетегьой кифлет.
— Гьисди ми жирелуье гlэдотгьо хьозуьрлугъи хурек, коминигьоревоз ишму келегеди сохде эз гьемме омбор? Ихдилот сохит э иму кифлети рецепт хьозуьрлугъи хурек.
— Э рузорине кифлет иму гуьрд бирейм гьееки, эри чуьки гlуьзет сохде шоббот. Келедеде ве деде хьозуьр сохдет дин-гlэдоти хурек: гlош-епрэгъи, дулма, хое-гушт, шомокуфде ве омборе екигегьо. Гье и рецептгьо гирошдени эз эрхэгьо э эрхэ.
— Комини хосиет сохдени зене хубе хозяйке хуней жугьури? Комини эз гьемме вожиблуье дерс дори ишмуре деде ве келедеде?
— Эз гъонун не ведарафдеи шоббот, хьозуьр сохде динлуье хурек, гофсохи дуь э екиревоз э гlэилгьоревоз э жугьури – гьемме гье у кумеки доре имуре мунде бофолуь эки мироси иму. Вожиблуье дерс – хьуьрмет эки кифлети дин-гlэдотгьо ве селигъэлуье гъэножогъи эки зугьун бебе-келебебе.
— Чуь эри хуьшдени ишму гьисди серворлуье мэгlдон мозол ве доруние динжи?
— Эз гьемме омбор бугьолуни жунсогъи ве хушхьоли гlэилгьой ме. Винире ловехэнде сифет угьоре – ёгlни гьис сохде шори ве динжи.
— Коминигьо дэгъдэгъэгьо зиндегуни кифлете бэхш доре э ишму гьис шори ве хошвегири?
— Бире э ён еки э гlэилгьой хуьшдеревоз, сохде муьгьбетлуье кор, софо вегуьрде зиёдгуьзелие гьовой гьемкорсохгьоревоз – ини серворлуье мэгlдон мозол ме.
— Комини нушудореи гьисди ишмуре э товун бишерксуьзе муьгьбет э гъэд куьндлуьегьо ве гъовумлуьегьо ишму.
— Бишерксуьзе муьгьбет э зеленмиши – гье у дуь екире варасиреи, кумеки дореи ве дошдеи кифлетлуье верзуьшигьоре. Э хьэйфкеши, сервор кифлет ме рафди эз и гlуьлом («Худо рэхьмет сохо»).
— Э хуне, э кифлет, ишму гоф сохденит э жугьури?
— Эри, э келетегьоревоз эз кифлет иму гоф сохденим э жугьури, гъэрезки э гlэилгьоревоз ижире сейрек бире.
— Комини хурек жугьургьо-догъи э кифлет ишму хьисоб бире эз гьемме муьгьбетлуь?
— Муьгьбетлуье хурекгьо омбори, оммо бешгъэ воисдени гуфдири э товун гlош-епрэгъи – нуьшун мигlидлуье суьфре ве кифлети герми.
— Э гlэили комини мигlид эз гьемме омборте хьэз омори ишмуре?
— Нисону (Песах). Эри иму восдоре оморебу тозе партал гьэгъигъэт эри гье имигlид, ве гьово бири жирелуь дуьлшорлуь ве межлуьслуь.
— Келе согъбоши, Марал Альбертовна, эри ижире кондуьллуье ве мерэгълуье меслэхьэт. Ихдилотгьой ишму руьхсет дори лугъондте дарафде э гlуьлом гlэжоиблуье дин-гlэдотгьо ве жирелуье гlэдотгьо жугьургьой догъи. Бигьил кор ишму хьэвеслуь ве эшгълуь соху тозе эрхэгьоре, гlэилгьо келе бу гье ижире товушлуь ве рэхьмедуьле одомигьо, чуьтам хуьшдени ишму. Войге сохденуьм эри ишму хушхьоли ве гьемме кундлуьегьо ишмуре. Бигьил муьгьбет ве шолуми пурлуь соху зиндегуни ишмуре.
Нуьвуьсди Лея Гаврилова
Тержуьмесох Ильканаева И.
Сирот: STMEGI
