Министр соводи эн Уруссиет Сергей Кравцов омори э Догъисту. Гьееки э веровундегор гъэрхундигьой эн сервор регионе э Федор Щукиневоз фегьм сохди соводие идорегьоре зарали зере оморигьо эз сайловгьо ве бэхш вегуьрди э корлуье гуьрдлеме э товун нисд сохдеи эзуновлейге бире гъозиегьой эн зобуне овхьолете.

Эз сер вертолет рэхьбергьо фегьм сохдет Адильотарски ве Новоцилитлински школегьоре ве меркез «Бстионе». Э хунденигьо идорегьо хундембируьт экуьнди 500 одоми. Бэгъдовой дуьгиле батмишбиреи беногьо вачаруьчди ве гIэмели нисди гъуьч сохде. Хори хьозуьр сохде омори эри вокурде беноре эз зу вокурдеоморенигьо молгьо ве эри песдеине оводу сохдеи.

«Имбуруз иму э Федор Вячеславовичевоз э иловле пар зеренки фегьм сохдейм жигей батмиш биреире, пуьруьш сохдейм тозеден вокурдеи деригьо э унжо соводие идорегьоре. Вожиблуьни, чуьнки э гуьнжо овурде биев хубе овхьолет эки 1-муьн сентябрь. Хьозуьр сохде оморени проект буйругъноме эн Хьукуьм Уруссиетлуье Федерацие э товун дореи Республикей Догъистуре миллиард монетгьо эри тозеден вокурде объектгьой эн соводие инфраструктурере. Лап вожиблуьни, чуьнки гьемме коргьо веровунде биев э вэхди ю ве хуб. Иму кумеки мисохим»,- гуфди С.Кравцов. Э план гуьре денишире оморени ки э Догъисту тозеден вокурде миев гьемме 130 зарали зере оморигьо эз сайловгьо соводие идорегьо. Гузет сохде оморени, ки федеральни пулгьо фуьрсоре миев эри гъуьч сохде 29 соводие идорегьоре. 94 объектгьой соводи гъуьч сохде миев эз пулгьой эн республикански бюджет. Хьофд соводие идорегьоре гъуьч сохде гIэмел ниев ве э план гуьре денишире оморени эз федеральни пулгьо э жигей энугьо вокурде миев хьофд зу вокурде оморенигьо беногьо ве хубте сохде миев э ен энугьо гьисдигьо мескен.

Э корлуье гуьрдлеме гуфдире оморебу э товун чорегьо гъуьч сохдеи объектгьоре ве э товун пуьрсуьшгьой параменд сохдеи системей соводи эн регионе. С.Кравцов ихдилот сохди э товун эну чуьтам э шегьер Хасавюрт вокурде оморени школе эри 1150 жигегьо ве э товун артгьой эн хубте сохдеи соводие инфраструктурей эн республикере.

Эз 2019-муьн салевоз э инжо э кор венгесде омори 72 жэгIмисоводлуье идорегьо эри 27,6 гьозор жигегьо, э чор сал вокурде омори 62 богъчегьой гIэили эри 9,5 гьозор жигегьо. Эзуш бэгъэй, э 2025-муьн сал гъуьч сохде омори дуь колледжгьо ве дуь богъчегьой гIэили. Чуьтам гуфди рэхьбер республике, эри нисд сохдеи эзуновлейге бире гъозиегьоре гуьрд сохде омори гъувотгьо эн гьемме ризгьой хьуькуьм.

Э иловле пар зеренки веди бири, ки хори эри вокурдеи хьозуьри. Бешгъэй вокурдеи, гьеле гьисди ве капитальни гъуьчсохигьо. Имуре вэгIэдо лап кеми – эз се мегь кемте. 1-муьн сентябрь гIэилгьо мие э школе бурав. Четине кори. Федеральни меркез – министерствой соводи, Хьуькуьм – имуре гъувот дорени. Овхьолет эри э кор венгесдеи проектгьоре льготнини ве минкингьо доренигьо. Кор иму – гуьрд сохде гъувотгьоре ве гъэрор сохде гьемме пуьрсуьшгьоре»,- гуфди Ф.Щукин.

Хьуькуьм РФ фегьм мисоху дореи Догъистуре 2 млрд монетгьо эри тозеден вокурдеи ве гъуьч сохдеи школегьоре ве богъчегьой гIэилгьоре зарали зере оморигьо эз сайловгьо, Э товун эни мэгIлуьм сохди министр соводи РФ С.Кравцов э гуьрдлеме гировунде оморебугьо э Махачкале. Веровундегор гъэрхундигьолй эн сервор Догъистуре согъбоши гуфди эз министерство соводи эн Уруссиет эри гьеммишеине гъувотдореи системей соводи эн регионе. Гьемчуьн у гуфди, ки республике эз тараф хуьшде мирасунуь гьемме герекие овхьолете эри э кор венгесдеи вожиблуье проектгьоре.