Э жугьури–догъи жэгlмиет дин-догlоти бинелуье мескен ОГЕ э Москов гировунде омори эдебиети хундеигьо э жугьури, гlуьзетсохи офиренуьши гье и мэгlлуьмлуье шогьире, музыканте, мэгlнихуне, мэгlэси шансоне Ефрема Амирамове (уре э апрель мибисдо 70 сал). Чуьнки Амирамов нуьвуьсди омборте дестонгьо э зугьун уруси, э жерге корисохи э хьозуьрлугъи эки гье и хундеигьо жерге нуьвуьсдегоргьо тержуьме сохди офиренуьши эн уре э жугьури.
Вокурдеи хундеигьоре, гьеммишеине бердегор, Людмила Теймурова-Юсуфова, ихдилот сохди э жугьури э товун шогьир, Хэлгъи артисте Ингушетие ве Кабардино-Балкарии, хунди тержуьме сохдигьо хуьшден ю чорризе шогьире: «Не вокурдем ме хуне…», «Чуьтам руьхь ве жендек не бу ми э еки тигь бире», «Дестонгьо – гье и мэхьшовогьо», «Мере гьечи хуте сохди тебиет».
Шогьир Елизавета Юсуфова, хунди хуьшден ю тержуьме сохдигьо э жугьури дестонгьо «Мэгlни ме», «Мэгlэси, коминире ме шиновусдем, чуьтам тост».
Екбиреи э онлайн нуьвуьсдегор Ирина Израева, гъовум Е.Амирамове, хунди дестон, гlуьзетсохи шогьире. Э утогъ, эже гировунде омори хундеигьо, сесдори дуь мэгlни эну, гlуьзетсохи ёргири шогьире. И.Израева гlуьзет сохди, чуьки Ефрем бу неки мэгlнихун – у бу хьохом жун. Мэгlнигьой эну сес дори, чуьтам тубономе, чуьтам вогу э товун муьгьбет, дорд, имиди».
Рэхьбер офирение гуьрдноме жугьургьо-догъи нуьвуьсдегоргьой Уруссиет Генадий Рахмилов хунди э оригинал ве э сэхьиблуь тержуьмесохи э жугьури дестон нуьвуьсдегоре «Куьгьне хуней иму».
Тербиедорегор английский зугьун ве зугьун жугьури э ОГЕ Елена Мардахаева тержуьме сохди ве хунди дестон «Ночью», нуьвуьсде оморигьо шогьиревоз э 1975-муьн сал.
Нуьвуьсдегор Лидия Давыдова-Эммануилова гьемиге онлайн екбири эки эдебиети хундеигьо. Лидия хунди дестон шогьире «Нальчик», «Гlуьзетсохи э хьэрмэхьгьо».
Тербиедорегор зугьун жугьури э жэгlмиет дин-догlоти шегьер Реутов Ирина Зарбаилова хунди э оригинал ве сэхьиблуье тержуьмесохи э жугьури нуьвуьсдеигьо «Чуьтами менфигlэтлуье деврон», «Биёйт хуте бошим муьгьбетлуь бире».
Лиза Рафаилова, тербиедорегор английский зугьун ве иврит, тержуьме сохди дестон шогьире э жугьури, ве э тегьер онлайн нушудие ошгоре хунди дестон Е.Амирамове «Шексохи хэйрлуьи эри жун», «Иму гьеммейки э келегедие хуьшденхогьи хушдеревоз наз-бузлуьим».
Марал Давыдова, тербиедорегор чуьклеи десде э ОГЕ, хунди тержуьме сохде оморигьо Л.Теймурове-Юсуфове чорризе «Э салгьоревоз жуне бовориниревоз Худоре герм сохденуьм…».
Зугьуние желдлуьи жугьури Дарья Буцева, студентка магистратуре РГГУ, гьеммишеине бердегор гьермегьине торихи-этнографически хундеигьо э ОГЕ, хунди э жугьури тержуьме сохде оморигьо Г.Рахмиловоз дестон Е.Амирамове «Эже рафденуьм – не дануьсденуьм…».
Фрида Юсуфова, шогьир, дофусзерегор, президент Гьеммегlуьломие конгресс зенгьой жугьургьо-догъи, онлайн екбири эки эдебиети хундеигьо:
«Ефрем Амирамов бу одоми рэхьмлуье ве келе жун. Ме те имогьоиш не дануьсденуьм бовор сохде, чуьки нисди э имуревоз эн иму хьуьрметлуье хьэрмэхь». Ф.Юсуфова тержуьме сохди ве хунди дестон шогьире «Нум гуьрде гъозие эн мере гlэмел миёв жейлее…».
Желдлуье бэхшвегир эдебиети хундеигьо э жугьури Эстер Акиваева хунди э оригинал дестон шогьире «Мэгlнихун ме». Нуьвуьсдегор Эльмира Шалумова, гlуьзет сохди, чуьки э офирение жире Е.Амирамов куьндлуьи эки Владимир Высоцкий, дестонгьой угьоре хунденуьт, гуш веноренуьт, муьгьбетлуь биренуьт одомигьо э гьемме гlуьлом.
Эдебиети хундеигьоре сер кешири гъовумгьо Ефрема Григорьевича, Артур Амирамов ве зен ю Надежда. Надежда Амирамова, хунди сэхьиблуье дестон гlуьзетсохи «Э ёргири э товун Ефрема Амирамове».
Э эдебиети хундеигьо гьемиге бэхшвегир бири магистрантгьо РГУ нум Косыгина Александр Рабаев ве Тельман Гаджалиев, хундетгьо дестонгьой шогьире э зугьунгьо жугьури ве уруси: «Гье и Гlуьлом, э комини ме зигьисденуьм…» ве «Эри Деде».
Хьэрмэхь Е.Амирамове, книгдофусзерегор, бэхшвегир Союз нуьвуьсдегоргьо Уруссиет, Юрий Азарьянович Абрамов, ихдилот сохди э товун омборегъэдерлуье вохурдеигьо ве меслэхьэтгьо э шогьиревоз ве гlуьзет сохди, чуьки «Амирамов гьишди очугълуье нишоне э шогьири, дестонгьой эну бигlэдотлуь лугъондлуьи ве у верзирени гlуьломие очугъсохи».
Нальчинец, бэхшвегир Совет келетегьо э ОГЕ Цфания Израев ихдилот сохди э товун у вэхд, кейки э Нальчик угьо зигьисди э е хуне, гье э у хуне, коминире Ефрем гlуьзет сохди дестон хуьшдере «Куьгьне хуней иму». У гlуьзет сохди, чуьки шогьири ве музыкальни мэгlрифет Ефреме веди бири эз зуине салгьо, у те эхир бегьем сохди норе гъосутгьоре.
Ефрем Григорьевич дуьллерзиреи нушу дори э дошдеи гlэдотгьо жугьургьо-догъи культуре. Ведешенде оморигьо уревоз альбом «Мэгlнигьо жугьургьо догъи» бисдо вожиблуье гъозие культури зиндегуни, вокурдеи эри фирегьлуье могьлугъ жирелуье бешгъэлуье гьово музыкеи жугьургьо-догъи. Гье и омонети бири нушу доре, э у хьисоб, премиеревоз нумине С.Вайнштейна, бэхшире оморигьо фондевоз СТМЭГИ э 2022-муьн сал.
Товушлуье ёргири Ефреме Амирамове – кук хэлгъ жугьури, мэгlэси шансоне, шогьире, музыканте, мэгlнихуне ве нуьвуьсдегор мэгlни, продюсере.
Гьемме дофусзереигьо нуьвуьсдегоргьой жугьургьо-догъи гуьрд сохде омори э книгхоне фонд СТМЭГИ, э цифрогьоревоз, сеслуье ве офдеи жиге дореи э сайт stmegi.com.
Нуьвуьсди Людмила Теймурова-Юсуфова
Тержуьмесох Ильканаева
Сирот STMEGI
