9-муьн май, э Руз Буьзуьрге Бараси, гьеммей республике вэхуьшди э еклуье жерге э гьеммей омборемиллетлуье вилеет эн имуревоз, эри вегири игидьети эрхэгьо барасибергьоре. Э кучегьо шегьергьо ве дигьгьо гирошди мигIид, десдегешдигьо, нушудореигьо, венореи гуьлгьоре эки сенгъ ёровурдигьо, сес сохди мэгIнигьо лешгерие салгьо, э дуьлгьо одомигьо зигьисди зуьнде хубе гофгьо гуфдиреи угьоре, ки э гъэлхэнд поисди хилоси Ватане.

Омборте 140 гьозор догъистунигьо гъобул сохди бэхшвегири э гьеммеуруссиетие корисохи «Бессмертный полк».

Энжэгъ э Махачкале э омборегъозорие жерге вэхуьшди омборте 30 гьозор одоми. Э гъэд эн угьо – ве рэхьбергьо республике, ве гьемме одомигьо. Гьер сирот э дес бэхшвегиргьо «Бессмертни полке» - гье у зуьнде торих кифлети. ГIэлем Барасире берди нушудорегоргьо келеи ве чуьклеи эрхэгьо – очугъэ бейдогъ дошдеи ве сэхде беине.

Э сиротгьой келетегьо эн хуьшдере э жергей жигегир серворе РД Фёдор Щукин, сернуьш Хэлгъие Гуьрдлеме Республике Догъисту Заур Эскендеров.

«Ижире дэгъдэгъэ, кейки иму рафденим душевоз эки душ еклуье кифлетевоз, бугьолуье гьер гоф. Иму э ёр овурденим. Иму согъбоши гуфдиреним. Иму нисе дореним гье у ёре екиреш»,- гуфдири З.Аскендеров.

Э Каякентски, Кизилюртовски, Тарумовски, Новолакски, Казбековски, Буйнакски, Избербашски, Бабаюртовски, Кайтагски, Магарамкентски, Сулейман- Стальски ве екейгегьо районгьо ве шегергьо гирошди ижире межлуьсгьо. Э гьержой бисдо жергере сервори сохди гIэтлуьгьо, э гьержой бисдо – ретроавтомобили лешгерие салгьо, тозеден э хуьшде дировундеие эшгълуьигьоревоз.

Э Тарумовке э «Бессмертни полк» рафди 102- салине жофо кеширегор тыле Айшат Махмудове Рамазанове. Э Казбековски районе десдегешдеи гуьрд сохди экуьнди пенж гьозор одоми – эз чуькле гIэилгьо те 96-салине келетере Заирбеге Усманове, комикире дори омборекбуи эз Серворе Уруссиете.

Э гьемме жиге сес сохди гофгьо э товун бесдеигьо эрхэгьоре, кумекии дореи бэхшвегиргьоре СВО, вожиблуьи дошдеи торихие ёре. Корсохгьо «Еклуье Уруссиете», «Жовоне гъэреули сохдегьоре», волонтёргьо ве юнармейцыгьо желди кумекии доре э гуьнжо овурдеи акцие «Георгиевски ленточка», «Окна Победы», бири э гуьнжо овурде бирмундеи гIэилие шекуьлгьо, омборегъэдерие гъосуьтие консертгьо, э гъержой бисдо лов сохде омори зимиие хурекхоне, ижире, комики бири э вэхд довгIо. Э богьчей гIэили дигье Дылым вокурде омори сенгъ ёровурди «Белым Журавлям» - гене ек бейдогъ гьеммишелуьгие ёргири.

Жирелуье жиге э дуьлгьо догъистунигьо вегуьрди торих майоре Тагире Манафове эз Агульски районе. У гъобул сохди бэхшвегири э МигIид Бараси э Гъирмизине мейдун э Москов – чуьтам хуьшдени ю эрзо э пушой ёргири келебебере, лешгерире Шабане Манафове, комики телеф биригьо э 1941-муьн сал э Севастополе. Тагир хуьшдени ю нушу дори мердьети э корисохи СВО, верзуьнде омори хьуькуьмлуье бэхшгьоревоз, э у гъэдер бэхше «За отвагу». Э руйбиреи эки гьемватанигьо у гуфдири: «Э руз Барасиревоз ишмуре! Екиш нибу фурмушбире, е жиреш игидьети нибу фурмуш. Имбуруз иму, бэхшвегиргьо СВО, сохденим гьеммере эри зурие бараси. Меселенгьо келебебегьо эн иму – эри иму несиети ве кумекии.

Бошит верзуьшлуь ижире миросире!»

81-муьн сали Буьзуьрге Барасире э Догъисту э нуботлуье гиле бирмунди: вэхд нисе бире э сер игидьети. Тейте иму э ёр овурденим – иму екиним. Бараси бири, гьисди ве мибу э песой эн иму.