Десде э бэхшвегириревоз нушудорегоргьой федеральни ве республикански идорегьой хьуькуьме омори э дигьбон Мамедкале эри фегьмсохи объектгьоре, комики буланмиши кешири э сереботи батмиш биреигьо.
Э десде комиссие дарафди жигегир министре хозяйствой дигьбони РФ Андрей Разин, вице-премьер РД Нариман Абдулмуталибов, сервор ФГБУ «Рэхьбери «Дагмелиоводхоз» Магомед Юсупов, жигегир серворе Департаменте хорире оводу сохдеи Минсельхозе РФ Михаил Капранов, сервор догъистуние Минсельхозе Шамиль Рамазанов ве екейгегьо.
Э бине тигъэтире – овхьолет гIове бердеи э нуькере Дарваг-Чай ве муьлке Самур-Дербендски ерхе, эже веди бири вечаруьсдеигьо гидротехнически дуьруьжде вокурдеигьоре.
Бэхшвегиргьо рафдеире э жиге гъиметдии гъэдергьо заралигьоре ве пуьруьш сохди суьфденуботлуье гъэдергьоре эсер тозеден э хуьшде дировундеи гидротехнически дуьруьжде вокурдеигьоре ве э гуьнжо овурдеи гьелелуьгее гIоведореире.
Бэгъдовой фегьмсохи заралие объектгьоре э Мамедкале бири корие гуьрдлеме э е гъэдер мескен агрохолдинге «Анжелине» э зир рэхьберисохиревоз жигегире министре хозяйствой дигьбони Андрее Разине.
Э корисохи гуьрдлемере норе омори бинелуье везифегьо эсер нисдсохи эзуновлейге бире гъозие батмиш биреигьо.
А.Разин риз кешири, чуьки суьфденуботлуье везифе – лап зури-зури тозеден э хуьшде дировунде коре хорире оводу сохдеие системегьоре ве доре гIове эри хоригъуллугъсохдегоргьо.
Гьемчуьн тигъэти доре омори гъиметдиире овхьолете объектгьоре, комикигьо вегуьрди заралигьо, оммо зиёд сохде коре. Э гофгьой Разине, вожиблуь неки нисд сохде эзуновлейге бире гъозие батмиш биреире, оммо ве пушоки дире дануьсдеи гъэдергьоре, эри чуь ухшешие гъозиегьо нисе вогоруш бире.
ФГБУ «Рэхьбери «Дагмелиоводхоз» дуь эекиревоз э идорегьоревоз хьуькуьме уже сер гуьрди эки веровундеи норе оморе везифегьоре.
Бинелуье вожиблуьи – э кутэхьэ вэхд тозеден э хуьшде дировунде минкини корисохи системере ве доре гьеммишеине гирошдеи гIовдореие жофокешире э вэхд гуьре.
Бирмунденим, чуьки Самур-Дербендски гIов дореие ерх – бинелуье объект хорире оводу сохдеие системе доруме Догъистуре. У э гуьнжо овурде гIове омборте 10,3 гьозор га зимигьо, дешенде дуьруьжде сэхьиблугъигьо ве онгурбогъгьо. Эз гьеммишеине кор эну межбур биреи гирошдеи гIоведореие жофокеши э вэхд гуьре.
Э гьонине вэхд ФГБУ «Рэхьбери «Дагмелиоводхоз» зиёд сохде коре э гуьнжолуьи зевербиреие хьозуьрлугъи.
Тозеден э хуьшде дировундеие корисохигьо ве темиз сохдеи ерхе мибу гировунде э зурие жире, эри кем сохде гъэдере эзуновлейге бире гъозиере батмиш биреигьоре ве дореи гIове э вэхд жэлдлуье битмишигьо.
