Сервор Догъисту Сергей Меликов гировунди гуьрдлеме, э комики гировунде оморебу артгьой гировундеи миггIид 80-сали Бесгъунире э регион ве пуьруьш сохде оморебу план гировундеи Сал Еклуьги эн хэлгъгьой Уруссиете.

Бэхшвегиргьой гуьрдлеме – рэхьбергьой эн органгьой хьуькуьм, депутатгьо, жэгIмиетлуье корсохгьо ве нушудорегоргьой эн жовоне идорегьо.

«Нубогьой торих, комигьореки имуре весиет дори Шамиль э догъгьой Кавказ, вихдет песдеине гъисмет эн омбаремиллетлуье хэлгъэ бире э хьисоб эн еклуье Ватан – эн буьзуьрге Уруссиет», — гуфди Сергей Меликов. Гьемчуьн Сергей Меликов э ер овурди э товун мэгIэной эн Имам Шамиль, гуьрд сохдигьо кавказски хэлгъгьоре э хьисоб эн Уруссиетлуье хьуькуьмет.

Гереки э ер овурде, гирошденигьо сал мэгIлуьм сохде омори Сал еклуьги эн хэлгъгьой Уруссиет э гуьрей Буйругъ эн президент вилеет.

«Сал еклуьги мибу жэгIмие дешендеи иму э муьхькемлуье ве гуьлишонлуь биренигьо биевгьо эн республике. Иму омбаре девргьо гьееки гъэрор сохденим четинигьоре ве шор биреним э барасигьой эн дуь екиревоз. Догъисту е гилейгеш мие бирмунуь, чуьтам жуьр-бе-жуьрелуьи, э гуьнжо овурде оморигьо э хьуьрмет сохдеи дуь екире ве эн еклуье верзуьшигьой одоми, бирени себеб параменд биреи»,- гуфди Сергей Меликов.

У э ер овурди, ки вожиблуье везифей эни Сал – зиед сохде системни бинегьоре эри еклуьг сохде жэгIмиете, эри гIэдотлуье несигIэтлуье верзуьшигьо, эри варасиреи дуь екире ве эри еклуье хубе жофо. Экуьнди 400 гьозор одоми бэхш вегуьрдет э мероприятие гIуьзет сохде оморигьо э гировундеи мигIид 80-сали Бесгъунире ве Сал эн гъэлхэндчигьой Ватане э Догъисту.

Э республике гировунде омори 125 дуьруьжде гъозиегьо ве эз 3 гьозор волонтерски акциегьо омбарте, э и хьисоб лешгерие-идмонлуье возигьо, гешденигьо экспедициегьо, фестивальгьо, концертгьо ве еровурденигьо акциегьо.

Э товун артгьой эн гирошдигьо сал э пура тегьеревоз ихдилот сохди вице-премьер республике Муслим Телякавов.

9-муьн май э Каспийск гировунде оморебу межлуьслуье парад э гIуьзет эн 80-сали Бесгъуни. Э юбилейни сал эз меркезлуье мейдун гирошдебу 1500 одоми.

И руз Догъисту ек биребу эки Гьеммеуруссиетие гешдеи «Уьлуьмсуьзе полк», э комики бэхш вегуьрдебируьт 75 гьозор одоми.

Э шегьергьо ве районгьой республике гировунде оморебу акцие «Гъэлем Бесгъуни», вожиблуье гъозие комики бири рафдеи мошингьо эз Каспийск те Волгоград.

Э Руз еровурди ве хэйфбери вокурде омори тозеден сохде оморигьо Музей эн лешгерие гIуьзет э нум Макарова. Гье у руз гировунде оморебу акцие «ШэгIм еровурди» ве «ГIэтошлуье шекуьлгьой довгIо».

Э кор венгесде омори проект «100 рузгьо те Бесгъуни», э гIэрегьой комики гьер сал те 9-муьн май бирмунде оморени видеороликгьо э товун игидигьой эн догъистонигьо – эн бэхшвегиргьой эн Буьзуьрге довгIой Ватани.

Ведешенде омори документальни фильм «Сильные духом» э товун игидгьой СВО. Э декабрь гировунде оморебу шекуьлуье бирмундеи «ВОВеки СВОи».

Э гьемме муниципалитетгьо варавунде оморебу кучегьо, мейдунгьо ве пушони беногьо. Оводу сохде оморебу лешгерие битехьэимгьо ве мемориалгьо.

Э чор шегьергьо – Каспийск, Дербенд, Хасавюрт ве Махачкале – гировунде оморебу ватанхогье акцие «Равнение на флаг» эже межлуьслуь вокошире оморебу Гъэлем Бесгъуни э 35-метрои флагшток.

Бирмунде оморебу томоше «Гъирмизине гъэлем э Берлин», гIуьзет сохде оморигьо э гъовхолуье ве жофолуье рэхь эн Игид Уруссиет Абдулхаким Исмаилов.

Э гъуллугъ эн сервор республике гуьре э гуьнжо овурде оморебу рафдеи гIэилгьо – эз желдлуьгьо эн жовоне жуьмуьсдеигьо – э жигегьой эн гъовхолуье гIуьзет.

Э Каспийск вокурде омори Аллея эн Игидгьой СВО, эри гьеммишелуьг э ергири гьишдеи чор догъистонигьо, комигьореки доре омори нум Игид Уруссиет эз уьлуьм эуло.

Э гуьнжо овурде оморени Богъчегьой еровурди. Э гьеммей Догъисту эри игидгьо норе омори мемориальни тэхдегьо. Дофус зере омори книггьо «Игидлуье кукгьой догъгьо», «Гъовхолуье гIуьзет эн Догъисту», «Книг еровурди» «Фурмуш нисе сохденим СВОих».

Э Махачкале бегьем сохде омори гъуьчсохи лешгерие битехьэимгьоре. Гировунде омори лешгерие-идмонлуье вози «Зарница 2.0» — гъэдер бэхшвегиргьо зиед бири эз дуь гиле омбарте ве расири э 100 гьозор. Десдей Кизляр бесгъун берди э «Лешгерие-тактически вози».

Э кор венгесде омори проект «Иму э ер гуьрдейм! Иму эрклуь биреним!». Э гIэрей проект «Аллея эн Уруссиетлуье гIуьзет» гировунде оморебу бирмундеи «Гъэлхэндчигьой Ватан э гIэрей девргьо».

Э товун план гировундеи Сал еклуьги эн хэлгъгьой Уруссиете э Догъисту ихдилот сохди вице-премьер Муслим Телякавов.

Э программе данание, ватанхогье, базургенде ве идмонлуье проектгьои.

Э гIэрей бинелуьигьо – форумгьо: «Ме хосденуьм Уруссиете: Уруссиет – и имуни!», «Уруссиет иму – Догъистуй имуни» э гIэрей фестиваль «Догълуьгьо» ве «Зугьунгьо эн хэлгъгьой Догъисту – мироси ве биевгьо», гIуьзет сохде осоригьо э жуьр-бе-жуьреи эн зугьунгьой республике.

Жейлее тигъэт доре оморебу гIэдотлуье верзуьшигьоре. Гьемчуьн гировунде миев: фестиваль эн кифлетлуье гIэдотгьо «Кифлетлуье сакля», фестиваль эн хэлгъие мэгIрифетгьо «Дошдегоргьой гIэдотгьо», Форум эн келетегьой эн Дорум Уруссиет «Хьохоми эрхэгьо э еклуьги Уруссиет». Гьемчуьн э план гуьре денишире оморени ки гировунде миев жовоне мероприятиегьо: ГIэрейхэлгъие студенчески форум «Биевгьо – э песой дусди хэлгъгьои»; ватанхогье акцие «Равнение на флаг» ве диеш.

Э гуьрдлеме сервор регион догьистонигьоре дори хьуькуьметлуье бэхшгьо, комигьоки кумеки сохдет хьозуьр сохде мероприятиегьоре, ологълуь гьисдигьо э гировундеи мигIид Бесгъунире гьемчуьн эри ватанхогье несигIт дореи жовонгьоре.