27-муьн январь э Уруссиет э ер овурде оморени еки эз вожиблуье рузгьо эн торих ватан – Руз бегьеме хилоссохдеи Лениграде эз фашистки ведабурраи. И руз вилеет э ер овурдени игидгьоре, гъовхо бердембируьтгьо эри зиндегуни эн гIэзизе шегьер, нумгьой комигьоки эри гьеммишелуьги э суьрхине хьэрфгьоревоз нуьвуьсде омори э верэгъгьой эн торих Ватан.
Фашистки Германие сер гуьрди ведабурраи Ленинграде гьеминон 1941-муьн сал, Ведабурра оморигьо э дуьшменевоз, шегьер бурра омори эз мундигьо бэхш эн СССР. Ведабурраи дураз кешире оморебу экуьнди дуьсалним ве эзу товун пуч биребу омбаре шолумие могьлуьгъ ве лешгерчигьо эн Гъирмизине лешгер. Немецски серворгьо хьэрекети сохдембируьт хуьрд сохде азади эн одомигьой Ленинграде, гьишденки угьо буланмиши кешире эз гьеммишеине гъиснеи, эз нечогъигьо ве эз ерэгъ шендеигьо.
Не денишире э неветовусденигьо овхьолет, одомигьой Ленинград вир не сохдет чигьрет инсоньетире ве бирмундет нишоней довомлуьи ве игидьетире. Угьо кор сохдембируьт э завудгьо, эже сохде оморембу ерэгъгьо ве зиедие гъэдер ерэгъгьо, борж бердембируьт э пожаргьоревоз, кумеки сохдембируьт гировунде э де мескениге гIэилгьоре ве келетегьоре. Гьееки э лешгерчигьоревоз, гъэлхэнд сохдембируьт хуней хуьшдере э гьимет эн зиедие гъувотгьой хуьшдеревоз ве э омбаре пучбиреи одомигьоревоз.
Еки эз бинелуье верэгъгьой гъэлхэнди шегьер бири мэгIлуьмлуье Рэхь зиндегуни – жилиде рэхь эз Ладоге, ологълуь сохдембугьо э Келе хориревоз. И бу е теке рэхь хилоссохи е ченд гьозор одомигьоре ве бердеи гереклуье овгъотгьоре. Те имогьиш и рэхьэ гуфдиренуьт нишон имиди ве довоми.
Те эхир ведабурраи Ленинград векенде омори 27-муьн январь 1944-муьн сал. Эри расире э и бараси герек бу омбаре гъувот ве гьуьнерлуье лешгерие коргьо эн лешгер совети. Э гIэрей эни коргьо веди бирени Ленинградски-Новгородски операцие, комиреки барасилуь гировундебу серворгьой довгIо ве мэгIэнолуь кори сохдигьо э гъовхо эри Ленинград. И бесгъунире бу келе негъуьллуье ве психологически мэгIэно эри гьеммей вилеет.
Ленинград э гьеммей гIуьлом бирмунди нишоней игидьетире ве муьхькемлуье боворинире э Бесгъуни. Эз е гъэдер вэхд бэгъдовой варасдеи довгIо шегьер мундени нишон довомлуьи ве эрклуьи эн хэлгъ урусси.
Имбуруз Руз хилоссохдеи Ленинграде миллетлуье мигIиди. Гировунде оморени межлуьсгьо, вохурдеи ветерангьо, бирмундеигьо эн лешгерие техникере ве гировунде оморени шекуьллуье-музыклуье мероприятиегьо. Одомигьо кура биренуьт гьееки, э ер овурденуьт ихдилотгьой эн келетегьо эрхэгьоре, хунденуьт дестонгьо ве гуш дошденуьт музык эн салгьой довгIоре. Торихчигьо риз кеширенуьт мэгIэной эн Ленинградски ведабурраире эри э гуьнжо овурдеи бэгъдовой довгIое еклуьги Уруссиете. Гирошдетгьо эз гурунде синемиштгьо одомигьой Ленинград бирет нишон эн игидьети, мугьбет эки ватан ве эн инсоньети.
Вожиблуьни ихдилот сохде э товун буьзуьрге игидьети э келе биренигьо эрхэгьо. Эхи энжэгъ дошденки хьуьрмете эки гирошдигьо, гIэмел миев вокурде биевгьоре, азадлуь гьисдигьо эз довгIо ве гужвенореи. Эзу товун имбуруз, кейки гье гене шиновуьсде оморени оголзереигьо эки гуьрд биреи э иловлей эн жэгIмие фикир гъэлхэнд сохдеи гIьуломе ве дузгунлуьире, жирелуье верзуьшире бирени синогъи эн келебебегьо ве эн келеи келебебгьо бердетгьо зулумире. Ве бигьил ер э товун эн ведабурраи Ленинград бу гьеммишеине нубо эн хьуьрметлуье гъэножогъи эки гьер одоми, бирорьети ве разилуьи э жэгIмет, дуь э еки кумеки сохдеи ве хьозуьрлугъи гъэлхэнд сохде ватане эз гьер секонеигьо.
фото: sbmpei.ru
