Э товун эну гуфдири Сернуьш Хьуькуьме РД Абдулмуслим Абдулмуслимов э гъэд корисохие вохурдеи э серворевоз Минтуризме Догъисту Эмине Мерданове.

Министерстве эсер сафари э кор венгесди проектно-сметни когъозгьоре эсер параменди дерёгьие гъирогъие жигегьоре э Каспийске, Избербаше, дигь Зеленоморск Карабудахкентски районе ве Арабляр Дербендски районе жэгIмие мейдуневоз омборте 16,6 га. Э гуьнжолуьи овурдеи угьоре э республикански бюджет дешенде омори 110 млн монет.

Гуьре тозе тегьер офдеи жиге дореи, хорие муьлкгьоре доре омори э гьеммишеине э кор венгесдеи ГБУ «Сафарие бине РД». Те сер гуьрдеи нуботлуье дерьёгьие вэхде гьемме жигегьо мибу гуьнжолуьи овурде, чуьки зиёд хубте сохде иловлере эри форигъэти э гъирогъ Каспийси дерьёгь.

Региональни гъэдергьо кумекии бирмунде хубе барасигьоре. Эки меселен, э 2025-муьн сал бири пуле дореи корисохигьоре эсер параменди сафарире э муниципалитетгьо.

Э ихдиёри дори кумекии э гъэдере 59,91 млн монет э веровундеи проектгьоре хьуькуьмгьоре Гунибски, Унцукульски, Табасарански, Дербендски, Ахтынски, Хунзахски, Сулейман-Стальски, Агульски районгьо ве шегьере Махачкале:

— хубте сохдеи пеедегешдение сафарие жилгъэ э дурази гъэлечее диворе те гъэлече э дигь Гуниб ве дениширее жиге э Сулейман-Стальски районе;

— бегьем сохде омори вокурдеи хэберлуье бинере э Махачкале;

— э Хунзахски районе э песой се сал бегьем сохде омори хубте биреи гIовие шэхшэхэре Тоботе ве Каменни чашере.