24-муьн апреля э дуьруьжде утогъ Муниципальни татски (жугьури-догъи) театре з нум Манахимове бири музыкеи-литературни бирмунуши, гIуьзетсохи 95-муьн сали эз руз хьэсуьл омореирево шогьире Беньямине Исиевиче Сафанове.
Э дуьруьжде утогъ кучмиш бири хосдегоргьо жугьури-догъие шогьири, эри доре бож ёровурдеи шогьире, гене гуш дошде шогьири э зугьун жугьури. Лап дуьлхоши бири винире э утогъ зигьисдегоргьоре Дербенде жире бе жирее миллетгьо ве жире бе жирее гIуьмуьрлугъии.
«Зиндегуни – гье у кутэхье рэхь эз зиндеи те гIэжели. Ве энжэгъ эз гьер эз имуре межбур биреи, комини мибу сэхьибие рэхь эну. Эн Биньямине Исиевиче у бири четин, оммо очугьэ ве мерэгълуье… Омборе хуьшдени ю, ве омборе жэгIметие гирошди эз дуьл шогьир, комики бирмунде э риз нуьвуьсдеи эну»,- гуфдире сервор Муниципальни жугьурие театре Борис Юдаев.
Э дуьруьжде утогь театре сес сохде дестонгьо Беньямине Сафанове, мэгIнигьо э жугьури, э гъэдер эну нуьвуьсдение э дестонгьо эну – чуьтам э веровундеи возирегоргьо эн театре, гьечи ве огол зере гъуногъгьо.
Бердегор бирмундеире возирегор Наргиле Агаларове, шинох сохде бэхшвегиргьо корисохире э зиндегуни шогьире, бирмундеи эну сес сохде э жугьури.
Мэглуьмлуье дербентски мэгIнихун Лаура Изгияева хунди дестонгьо шогьире ве веровунде е чед мэгIни э жугьури, возире э карасди музыкеи эри хуьшде э фортепиане.
Возирегор эн театре Александр Рабаев бирмунде э гъуногъгьо хубе возиреи э гитаре. Э зир возире э карасди музыкеи эну взирегор эн театре Христине Абдуллаеве пур сохде утогъе мэгIнигьо э жугьури э миллетлуье жирелуье э бине романтически вихде оморение гъово.
Возирегоргьо эн театре хунде достонгьо Беньмина Сафанова. Александр Рабаев нушу доре гъэйгъу гъуногъгьо достон «Эри тербиедорегор». Возирегор эн театре Лиана Нагдимаева эз дорун гирошдение хунде достоне «Зигьисденим иму э догъгьо», Христина Абдуллаева – «Э дусде кифлет». Христина веровунде е ченд мэгIлуьмлуье мэгIни э жугьури. Хундегор 9-муьн классе дербентски школе №15 Евгения Гилядова хьозуьр сохде дестоне Б.Сафанове «ГIэзизе Ватан».
Гъуногъ эн бирмундеи бэхшвегир гьеммей корисохи Муниципальни жугьурие театре, жугьурие-догъие шогьир, корсох Союзе нуьвуьсдегоргьо Уруссиет Пейсах Мишиев нушу доре эри гъуногъгьо дестон эн хуьшдере, жейле хьозуьр сохде эки литературни корисохи.
Веровундегоре сервор фонде СТМЭГИ Данил Данилов согъбоши гуфдире серворе театре Борисе Юдаеве э песой оголзереи ве бирмунде, чуьки э электронни библиотеке э сайт STMEGI.сом жиге доре хьэшд книг дестонгьо ве ихдилотгьо Беньямине Сафанове, дофусзереи э Махачкеле эз 1974-муьн те 1994 салгьо:
-Хосденум туьре, Васал, 1974
-Э рузгьой шолуми, 1976
-Куктуньум, Ватан, 1979
-Богьдоргьо, 1982
-Иму бэхдлуьним,1984
-Э рэхь бебегьо, 1985
-Товуш э пенжере, 1987
-Бергулуй зиндегуни, 1994
У бирмунде, чуьки гьемме хьэшд книг Беньямине Сафанове сес доре шогьир ве тербиедорегор Розе Мардахаеве (Данилове), аудиокниг эн шогьир гьисди э азадлуье верасирение тегьер э сайт STMEGI.сом в мобильном приложении Jbooks
