Э гIэрей омбарегъэдерлуье сафарчигьо, рафдебируьтгьо э Тозе Калининградски нумаз, омбаре одомигьои рафденуьтгьо э нумаз эз де шегьергьой Уруссиет. Еки эз угьо бири мэгIлуьмлуье шоробчи эн Догъисту, духтир эн технически гIилмгьо Павел Ягутилович Мишиев.

Э у, чуь коньякгьой Дербенде имбуруз гьисди гIуьломие гIуьзет, дери омбаре верзуьши эн гIилмчи. Уре гьисди жирелуье бэхшгьо: суьрхине медаль эн Лев Сергеевич Голицын, биненорегор эн уруссиетлуье шоробчилуьгъире. Э 2007-муьн сал П.Я.Мишиеве доре оморебу бэхш орден Дусди. Хьуьрметлуье гъуногъ эн калининградски нумаз гьисди сернуьш эн жэгIмиет дин-догIоти эн жугьургьой Дербенд. 18-муьн май 2010-муьн сал, э пушой мигIид Шавуот, Павел Ягутилович восдори эз пулгьой хуьшде сифир Туро ве бэхш дори уре нумаз Дербенде.

Э пушой гъуногъ ведиреморе нушудорегор эн Любавически Ребе э Калининград Авраам Борух Дайч. У эри Павел Ягутилович шофар зери. Шиновуьсде сес шохе э дуразовуней эн мегь элул э пушой Рош а Шана – вожиблуье гIэдот жугьури. Гъисметгьо эн дур гьисдигьо дуь э зеки нумазгьо ухшеш зеренуьт э фэжэгъие гъозиеревоз э торих энугьо. Тозе Калининградски нумаз тозеден вокурде омори э торихлуье архитектурни чигьрет э жигей эн Тозе Кенигсбергски нумаз, комиреки сухундебируьт ве вачарундебируьт нацистгьо э зулуме мэгIлуьмлуье Хрустальни шев, 9-муьн ноябрь 1938-муьн сал. Нумаз эн Дербенд «Келе-Нумаз» 23-муьн июнь 2024-муьн сал сухунде оморебу э террористгьоревоз ве имбуруз нумаз гъуьч сохде оморени.

Нуьвуьсди Виктор Шапиро

Тержуьме сохди Ильягуева А.