24-муьн сентябрь, э Хуней Дусди э шегьер Махачкале гировунде оморебу вохурдеи эн жигегир Сернуьш Хьуькуьм Республикей Догъисту Ризван Газимагомедове э бизнес-десдеревоз эз Султанат Оман. Бизнес-десдере сервори сохдебу бэхшвегир эн Хьуькуьметлуье меслэхьэт Оман, бэхшвегир экономически комитет эн Алверие-корхонее палатей Оман Шамса Масуд Нассер Аль-Шейбани. Гьемчуьн э десдеревоз оморебу нушудорегоргьой эн чор корхонегьой Оман.
Везифей омореи – гешде тозе инвестиционни минкингьоре ве э гуьнжо овурде алверие гъэножогъигьоре э гlэрей дуь вилеетгьо.
Ризван Газимагомедов гуфди, чуьки еклуье корисохи э гlэрей Республикей Догъисту ве Султанат Оман лап вожиблуьни эри параменд сохдеи экономикей регионе.
Вице-премьер мэгlлуьм сохди, чуьки жэгlмие алверсохи э гlэрей Догъисту ве Оман э 2023-муьн сал сохде омори э 33,6 гьозор долларгьой США. Оммо молгьой эн молведешендегоргьой Догъисту э де вилеетигегьо фурухде не омори. Э у товун гуьре суьфде нуботлуье тарафгьо э параменд сохдеи буруние алверие гъэножогъигьоре гьисди фурухдеи э де вилеетигегьо молгьой дигьлуье хозяйственни комплексе: хьэвуьжгьоре, емишгьоре ве молгьой гушдире.
Жейлее тигъэт доре оморебу э пуьрсуьш эн Гlэрейхэлгъие рэхьгьой мошингьо «Софун-Дорум», комики лап вожиблуьни эри параменд сохдеи экономически ве алверие гъэнжогъгьоре э гlэрей Догъисту ве Оман.
Э нубот хуьшде Шамса Масуд Нассер Аль-Шейбани гуфди, чуьки угьо мерэгълуьни параменд сохде хэйрлуье корисохире э Догъистуревоз. У гуфди, чуьки республикере гереки э кор венгесде жирелуье алверие рэхьгьоре, гьемчуьн гереки фегьм сохде минкингьо эри э гуьнжо овурде сафарлуье тургьоре э Оман.
Нушудорегоргьой эн бизнес-жэгlмиет Оман гьемчуьн гуфдирет, чуьки угьо хьозуьруьт восдоре гушд гусбенди Догъистуре, гьемчуьн датчикгьо эри корхонегьо э гlэрей э кор венгесдеи миллетлуье проекте «Гlэрейхэлгъие кооперацие ве экспорт».
Рэхьбер Агенство э товун сэхьибкори ве инвестициегьо эн Республикей Догъисту Гусейн Гусейнов ихдилот сохди, чуьки э регион э гуьнжо овурде омори овхьолет эри параменд сохдеи ве э кор венгесдеи проектни пулдореире (исламский банкинг). Гусейн Гусейнов эз бизнесменгьо эз Султанат Оман гуфди, чуьки гереки бэхш вегуьрде э кор венгесдеи гуьнжолуье проектгьоре.
Э товун артгьой омореи э Догъисту десдей Оман мидануь гъимет доре минкингьой республикере ве вихде вожиблуье тарафгьоре эри еклуье корисохи.
