Артур гьеле лап жогьили, уре нисди ве бисд сал, оммо уре келе гъэдуьрдане дуьли, у жугьобдорлуь ве рэхьмедуьл. У кумекии доре э вирихдегоргьо эз куьндлуье довгlо гирошденигьо жигегьо, вечирени элчэгъсуьзе кумекии эри лешгерчигьо СВО, кими вэхд ве хуьшдени ю рэхьсохде шеле э довгlо гирошденигьо мескен. Келеи келебебей эну – ветеран Келе довгlой Ватани, белкине, унегуьре ве э Артур хэбер бири генетически ёргири. Дануьсдеи э товун гье и жогьиле одоми, зигьисденигьо э Краснодар, ме гъэрор норем меслэхьэт сохде э уревоз. Гьевел у гьич вэхд интервью не дори, вирихде пэхьни бире томошелуьире, оммо ме уре минет сохдем. Лап воисдени, эри чуьки э товней ижире жогьиле гедегьо дануь чуьтам гlэмел миёв омборте одомигьо.
— Ихдилот сохит э товун хуьшде. Эже ишму тербиевегуьрдейт? Эже гьейсэгlэт зигьисденит?
— Тербиевегуьрдем э Краснодарски Президентски кадетски училище, песде дарафдем э Дорумие-Уруссиети гуманитарни институт. Хундеи вегуьрденуьм э юристи, чуьнки хьисоб сохденуьм, чуьки эри гьер одоми вожиблуьи дануьсде гъонунгьо вилеет хуьшдере ве дануьсде э угьоревоз кор сохде. Зигьисденуьм э Краснодар. Лап хосденуьм гье и шегьере.
— Ихдилот сохит э товун келебебе ве келедеде, э товун келеи келебебе. Эзжеи гъумолет угьо?
— Бебе – жугьур догъи, хьэсуьл омори э Махачкале, уре гьисди бизнес хуьшде. Келебебе, Ядадия Урилов, ве келедеде, Ася (хьэсуьломорегор Мишиева) ве гьейсэгlэт зигьисдени э шогьнишон Догъисту. Келеи келебебей ме Натан Ядадияевич Урилов – мэгlлуьмлуье одоми, боворине коммунист ве гьейронлуье рэхьбер жовонгьо, гъэрезки хуьшдени ю хьэсуьли эз гъумолет раввингьо Красной Слободы. У бу мэгlрифетлуье тербиедорегор, омборегъэдерлуье хундегоргьо э ёр гуьрде ве хьуьрметлуьи э у те имогьоиш.
Келеи келебебе Натан хундеире вегуьрди э дербенди педучилище, песде тербиедори э еки эз школегьо Дербенд. Э 1939-муьн сал уре огол зере омори э гъушун ве гирошди гьемме довгlоре. Э 1946-муьн сал у вогошди ве эз е салиге зен хосди. Уре хьэсуьл омори шеш гlэилгьо, келеи эз угьо – келебебей ме Ядадия, нум доре оморигьо э хотур келебебей хуьшде. Келебебей ме кор сохде серворлуье сенигlэткор гъуллугъсохе мэгlлуьмети технологиегьо Дагэнерго. Ме текебури сохде келеи келебебе-довгlо гирошдегор хуьшдеревоз ве келебебей хуьшдеревоз.
— Чуьревоз ишму мерэгълуь бире? Гьисди ми ишмуре хобби?
— Э гьонине вэхд кор сохденуьм э шегьер Краснодар э банк. Мерэгълуьнуьм жэгlмиетлуье коревоз, гьисдуьм кумексохдегор депутат шегьери дума. Иму кумекии доре э вирихдегоргьо эз азадбире месконгьо, фуьрсореним гуманитарни кумекии эри лешгерчигьо э СВО. Гьисди Гьеммеуруссиетие фонд кумекии эри вирихдегоргьо ве кучмишбирегоргьо, ме омборе вэхд бирем векил нушудорегор гье и фонд э Краснодарски улке. Фонд корисохде э кумеки дореи вирихдегоргьоре, э гуьнжо овурдеи пуллуье кумекииревоз, корикумекии доре э гуьнжо овурдеи документгьоре, соводии кумекииревоз (хундеи уруси зугьун). Э гуьнжо овурденим вечиреи томошелуьигьо, э хуьшде вогосунденим спонсоргьоре эз гьемшегьери нушудорегоргьо бизнес корсохгьо.
Е гиле хуьшдени ме бирем рэхьсохдегор колонне э гуманитарни кумекии э Мелитополь. Иму хьэрекети веноре лап зеверие гъэдер асант сохде зиндегуни вирихдегоргьоре ве кумеки доре лешгерчигьой имуре э СВО.
— Комини эдебиети жанр ишмуре хьэз оморе? Комини музыке гуш дошденит?
— Эз эдебиет эз гьемме омборте мерэгълуьи торихлуье. Мере хьэз оморе хунде ве э товун ватани, ве э товун гlуьломи торих, жирелуь э товун Ближний Восток. Гье и лап мерэгълуьи ве соводлуьи. Оммо музыке хьэз оморе жире-бе-жирее, энжэгъ э у дэгъдэгъэ, кейки ме гуш дошде, у гуьнжуьнде бу э хьол ме гуьро.
— Чуь ишму эз гьемме омборте хьэгъэ доре э хьэрмэхьгьой хуьшде?
— Неки э хьэрмэхьгьо, оммо ве э гьемме одомигьо ме эз гьемме омборте хьэгъэ доре э бофо. Хьисоб сохденуьм, чуьки гьеммере гlэмел миёв михьило сохде, эзуш бэгъэй одомифурухи.
— Гьисди ми ишмуре муьгьбетлуье метеле енебуге хьохоми, коминиревоз ишму рэхьберисохде?
— Муьгьбетлуье мэгlэси ме гьисди эн Махатме Ганди: «Ишму миё бошит гье у дегиши, коминире воисденит винире э гlуьлом».
— Худо рази ишмуре, Артур, эри меслэхьэт. Хосденуьм эри ишму барасигьо э гьемме песдеине сергиригьо! Ве имиди, чуьки иму гье гене вохурде миданим э портал фонд иму ве офде миёв диеш омборе екигегьо гъосуьтгьо эри меслэхьэт.
Нуьвуьсди Стелла Давыдова
Тержуьмесох Ильканаева И.
Сирот STMEGI
