Игид иму Беньягуева (Юнаева) – гъэнфидсохдегор, фудблогер гьемчуьн дедей чуькле духдерле. Роксана чире хьозуьр сохдени лап лезетлуь ве ишдогьлуь, бежид дорени рецептгьой хуьшдере э нувуьсдегоргьой хуьшде, эзу товун уре гьисди омбаре восдорегоргьо. Е «ширине» Инстаграмм эну шев ве руз веруьт лезете тортгьо, пирожнигьо ве мизрэхьие ширинигьо. Э дуьимуьн интернет-велг эну гIэмел миев винире беврлуье хурекгьоре, салатгьоре ве беврлуье рецептгьой дуьимуьн жирей хуреггьоре.

Кондитерски игид имуре, комики вери э интернуе нум доре омори «Даниэла-Свитс», э гуьзет духдер эну. Иму гоф сохдейм э товун эну, чуьтам мэгIрифетлуье духдер, кеиге хуте бири эз дедей хуьшде, имбуруз хьозуьр сохдени лезете тортгьоре, барасилуь параменд сохдени инстаграмм хуьшдере, дошде веровундени дуьсале духдер хуьшдере.
-Роксана, чуьтам ишму э вэхди ю гьеммере сохденит? Тортгьоре, дошде веровунденит чуькле духделей хуьшдере, бежид берденит Инстаграмме? Эже гереки офде гъувот эри гьеммей эни коргьо? Чендгъэдер вэгIэдо рафдени эри гьер ширини?
-Сер мигируьм эзу, ки ширинигьоре э зиндегуни иму имуре гьеммеше воисдени, эхи екиш эз гIэилгьо эз лезете ве раче гъэнфит гьич дебе нисоху, гьемчуьн келетегьореш хьэз оморе эз ширинигьо. Торих параменди эн шириние корхонегьо экуьнди сад салгьои, гIилмчигьо хьисоб сохденуьт, ки гьэгъигъэт гъэдимие мисроимигьо, гъэриш сохденки гIэселе, гъэребече ве гидегьоре, угьо эз гьеммейки зуте э гуьнжо овурдет гъэнфитгьоре. Э Мизрэхьлуье Средиземноморье гьемчуьн э Куьнде Мизрэхь э вэгIэдой хочлуье гешдеигьо емишгьоре норембируьт э офтои те емишлуье дишов хэсд небу э ижире тегьеревоз бирембу джем. Э у гуьре омбаре одомигьо нисд дануьсденуьт, ки гьеймогьине гъэнфидсохденигьо мэгIрифет – лап четине гIилми: торт мие бу рач, мэгIжуьм ве лезетлуь. Эзу товун усдо-кондитере эн буьлуьнде риз мие бу неки дананигьо э товун э гуьнжо овурдеи, чуьнки молгьой энуре бу раче жире, уре гьемчуьн мие бу синогълуье технолог, эхи э «ширине кор» ежирелуь вожиблуьни жире ве дэгIэм.
Имбуруз ме хьозуьр сохденуьм биIэдотлуье ширинигьоре. Мере гьисди зирдеси, мере нисдигеш кондидерски соводи, оммо бежид ме буьржуьнденуьм хуьшдениме. Бэгъдовой зендеи духдере ме гъэрор сохдем гуьнжуьнде чуькле кондитерски мере «Даниэла-Свитс» э жирей верэгъ э Инстаграмм. Мере лап хьэз оморе чи сохде, суьфде мере хуте сохди дедейме. ГьейсэгIэт мере э Сеть дуь верэгъ фудблоги, чуьнки угьнигегьош хуте бошут, гьемчуьн э жовоне дедегьо э нишонейме гуьре бирмунденуьм, ки гереки хьозуьр сохде тортгьоре ве фурухде угьоре. Эри гьер торт рафдени се сэгIэт.
-«Ме омбаре вэхд дебируьм э верэгъ ишму, гьемме рецептгьо хуби гьемчуьн лап хубе музыкиш, эзже ишму уре офденит?!»– хундем пуьруьшсохигьоре эки дофусзереи ишму э Инстаграмм. Гьэгъигъэтиш, бежид ишму и музыке шиновуьсденит?
-Музык э зиндегуниме – жейлее гъосуьти, эзу сер гуьрде оморени гьер себэхь ме. Музык веровундени гьовоймере, хьэвеслуь ве эшгълуь сохдени мере, нуьвуьсдегоргьоймереш хьэз оморени денишире э рецептгьойме э хубе музык гуьре.
-Кини хогьишидорегоргьой ишму?
-Хогьишидорегоргьо – нуьвуьсдегоргьоймени, шинохоймени ве гъуншигьоймени. Ме хьозуьр сохденуьм э хьэвесевоз ве мере лап хьэз оморе варавунде тортгьоре. Мере воисдени диеш сохде кор мере, сохде уре параменд, хьэрекети веноренуьм эри омбар сохде хьисоб нуьвуьсдегоргьоймере ве хогьишидорегоргьоймере. Оммо, чуькле духделеймеш гъувот дорени мере, уре хьэз оморе, чуь ме сохденуьмге, гIэил вегуьрдени лэгъэгьоре, чонголгьоре ве вогогьруш сохдени э песойме. Сур барасиме – тембели не сохде, зу вэхуьшде, эзу товун ме гьеммере сохденуьм э вэхди ю, хогьишигьоре гъобул сохденуьм пуш-пушоки, кими коре сохденуьм хуьшдениме, кими коре доренуьм э зирдесиме.
-Хэйри гуьрде зирдесире кор сохденки э хуне?
-Эри.
-Эзже сер гуьрде биней ишму, дануьсденитге ишму зугуьн догьлуье-жуьгуьргьоре? Чуь сенигIэти шуьвер ишмуре?
-Деде ве бебейме эз Гъирмизине Слободкеи, оммо ме эз деде хьэсуьл оморем, келе бирем ве хундем э Москов. Мере гьисди дуь хэгьер ве е бирор. Зугуьн жуьгуьрире дануьсденуьм эз гIэилиревоз, э и зугуьн гоф сохдембируьт келетеньойиму, дедегьо ве бебегьой иму. Ме бибоворин нисе биренуьм – и зугуьне егъин гереки дошде, и зугуьне гереки тербие доре э гIэилгьой иму, угьо мие дануьт биней хуьшдере ве зугуьн хуьшдере. Мере гьемчуьн гьисди доллоклуье соводи, мере хьэз оморе кор сохде э муйгьоревоз, муйгьоре дуз сохде гьемчуьн мере хьэз оморени шекуьл кешире. Э хуней бебе ве дедейме гьеммише гировунде оморембу бинелуье мигIидгьой жуьгуьргьо ве гьейсэгIэт ме э кифлетме и гIэдоте дошденуьм. Вэхд гIэильетиме бу шоре вэхд ве гъэйгъусуьзе вэхд. Эз жогьилиревоз ме гьеммише фегьм сохдембируьм э песой дедейме, чуьтам у лезетлуье чигьо сохдембуге, эз хьофд салеревоз мере хьэз омори поисде э пушой пилете, ме кумеки сохдембируьм э дедейме, эзу товун ме лап хуб дануьсденуьм хьозуьр сохде чире. Дедейме – лап хубе зени, жофокеши, рэхьмедуьлли, гьеммише гъувот дорени, кумеки сохдени ве лап лезетлуь хьозуьр сохдени ширинигьоре. Нум шуьверме Ифими, у 36 салеи, у кор сохдени рэхьбер э лап хубтее ресторан Москов.
-Чуь метлеби ишмуре? Чуьжире везифегьои ве плангьои ишмуре эри куьнде биевгьо?
-Э биевгьо мере воисдени вокурде э шегьер е чуькле кифлетлуье кафе-кондитерски хуьшдере.
-Э чуь дери сур бараси эн чуьклее кифлетлуье корхоней ишму?
-Иму хьэрекети сохденим хьозуьр сохде лезетлуье тортгьоре, варавунденим угьоре. Тортгьоре хьозуьр сохденим эз хубе ве тозе молгьо. Гьеммере сохденим э селигъэревоз, э гермиревоз, чуьнки восдорегоргьой имуре хьэз биев.
-Э коми район шогьнишон Уруссиет ишму зигьисденит, гьйчуь ишмуре хьэз оморе и мескен?
-Ме, шуьверме ве духдерме зигьисденим э Измайлово, э инжо лап омбаре савзини, лап темизе гьовои, гьисди омбаре жигегьо эри гешде, эзу товун иму хосденим и районе.
-Э Инстаграмм ишмуре лап раче ве мерэгълуье верэгъгьои гьемчуьн омбаре нуьвуьсдегоргьои. Чуьтам ишму дануьсдет гьечуь пушово рафде?
-Инстаграмм мере гъувот доренуьм ве параменд сохденуьм хуьшдениме. Суьфде э и кор мере небу синогъи, оммо хьэрекети сохденуьм вегуьрде дананире, хунде дануьсде э товун эну, чуьнки верэгъ ме гуьнжуьнде биев рач, чуьнки одомигьоре хьэз биев диреморе э верэгъ ме ве хунде рецептгьоре. Ме лап шорум, ки омбаре нуьвуьсдегоргьойме хуте бирет хьозуьр сохде э меревоз гьееки, буьржуьнде ве песде фурухде молгьой хуьшдере. Гировунденим пулсуьзе онлайн-дерсгьоре. Гьер усдоре гьисди жирей хуьшде хьозуьр сохдеи хуреке ве ширинигьоре. Чуь сохденуьмге ме, егъин хьэз оморени одомигьоре, ме хьозуьр сохденуьм эз хубе гьемчуьн эз берекетлуье молгьо гьемчуьн эз жуниме.
-Эз чуь гереки сер гуьрде кондитере? Суьфде гереки хьозуьр сохде печенигьоре энебуге суке тортгьоре?
-Гереки денишире, чуь хьозуьр сохдениге кондитер, кимигьо кор сохденуьт энжэгъ э тортгьоревоз, кимигьо – э ширинигьоревоз. Э гьер гъозие гереки хьозуьр сохде омбар, гъуногъ сохде куьнде одомигьоре, гъуншигьоре ве хьэрмэхьгьоре, угьо хубтее фегьмсохгьои. Оммо суьфдеи тортгьоймере гъимет доребируьт гъэгъигъэт гъовумгьо-гъэрдешгьойме.