Э Москов гировунде омори эхирлуье бедел фестиваль «Ёргири эрхэгьо. 26-муьн Ияр – Руз хилоссохдеи ве азади» — суьфдеи э хуьшде гуьре кинофестиваль, гуьрд сохдигьо нуьвуьсдегоргьоре эз жире-бе-жирее регионгьой Уруссиет ве эз екигегьо вилеетгьо. Гуьнжоовурдегоргьой фестиваль бири: бинелуье жэгlмиет дин-догlоти ОГЕ, мисвосохе фонд СТМЭГИ / канал Суьфдеи жугьури ве Киноклуб ОГЕ.
Фестиваль бири гировунде э гlуьзетсохи эки 26-муьн Ияр – жугьури Руз Бараси, мигlид хилоссохдеи ве азади, нореи э ёргири э товун бараси э сер миллетперезе Германие э Дуьимуьн гlуьломи довгlо.
Гъосут фестиваль – дошдеи зуьнде торихлуье ёргири э товун Холокост, игидьети лешгерчигьо ве хилоссохдегоргьо эз документальни, возирение, любительски ве екиге фильмгьо.
Э фестиваль фуьрсоре омори 17 фильмгьо эз Москов, Дербенд, Моздок, Нижний Новгород, Дзержинск, Симферополь, гьемиге эз Вена. Э артлуье технически вихдеи э программе фестиваль бири дешенде 15 фильмгьоре.
14-муьн май э киноклуб ОГЕ гуьрд бири томошесохдегоргьо, э хьисоб коминигьо дебири омборе жогьиле одомигьо. Э сергуьрдеи бири дегесунде оморе се шэгlм ёргири э хотур мигlид 26-муьн Ияр. Сервор медиадесде СТМЭГИ Давид Мордехаев э бирмунуши хуьшде гуфдири, чуьки э сергири шэксохи денишири э хэёл Бориса Нисанова э товней гировунде фестиваль фильмгьоре, оммо эз сергуьрдеи бирмундеи гьемме бибоворинигьо лов-тум сохде омори: э дуьруьжде утогъ не мунди е бигlоре одоми. Гlэрсгьоревоз пурлуь бири чумгьой неки томошесохдегоргьо, оммо ве э жюри нуьшдегоргьо. Э жюри дарафди Давид Мордехаев, сернуьш РОО ОГЕ Герман Азарьяев, актриса МХТ нум Чехов Юлия Витрук, бэхшвегир миллетлуье кинопремие «Ника» эри хубтее зени рол дуьимуьн план э фильм Сергея Усуляк «Праведник», режиссёр-документалист Родион Исмаилов (фильм эну «Гьовуни пята олигархии» вегуьрди Серворлуье бэхш Tiger Award э Гlэрейхэлгъие кинофестиваль э Роттердам, бэхш FIPRESSI э «Кинотавре» ве диеш омборте дегьигьо бэхшгьо), продюсер Артём Виткин, коминире гьисди омборе гъэдер барасилуье кинокоргьо, Бэлла Рафаилова, бердегор киноклуб ОГЕ.
Гемриель Шубаев э хьэрмэхьгьой хуьшдеревоз, хундегоргьой москови школе №1311 «Тхия», эз дорун гирошдени ихдилот сохди э товун келеи келебебе хуьшде Александре Шубаеве. Анатолий Гендин эз Симферополь э фильм Е. Михлина ихдилот сохди э товун хуьшдени келебебе чекмечи, комини дануьсди зуьнде мунде э есири э хотур дануьсдеи духде чекме. 14-салеи Антон Погребицкий эз Тула фуьрсори фильм э товун кифлет хуьшде, эже бири э кор венгесде бигlэдотлуье жире шекуьлкеши э сер гъум. Гьемме фильмгьо дес зери э жун, э ёр мунди. Фонд СТМЭГИ гъэрор нори фирегьлуь расунде э томошесохдегоргьо гьемме фильмгьоре, бирмунде оморигьо э фестиваль. Угьо мибу бирмунде э мейдонгьо э руьхсет дореи нуьвуьсдегоргьой фильмгьоре.
Омборте се сэгlэт гирошди бирмундеи. Жюри ведарафди э пуьруьшсохи. Э томошесохе дуьруьжде утогъ гирвунде омори пуьрсуьшдореи эри вихде бэхшвегире барасибере бэхш томошесохдегоргьоре.
Омори расири вэхд гуьрде нум барасибергьоре. Ини артгьой эну.
Лауреатгьо 1-муьн любительски кинофестиваль «Ёргири эрхэгьо», гировунде оморигьо э гlуьзетсохи эки 26-муьн Ияр «Эки Руз Хилоссохи ве Азади»:
-Жирелуье бэхш –
«Эри гъоимлуье омонети э дошдеи торихлуье ёргири» — режиссёр Александр Котт (Москов);
Гран-при – «Гlэильети, хуьрд-хэсдее довгlоревоз», Елена Халевич (Нижний Новгород);
-Хубтее фильм – «Игид эн ме», Габриэль Шубаев, (Москов);
-Хубтее кифлети торих – «Ида», студентгьо киношколе «Гилель»;
-Приз томошесохе хьэз омореи – «Хананья Шаулов», Ирина Михайлова (Дербенд);
-Зиёдие приз хьэз омореи жюри – «Мэгlэсилуье келедеде», Белла Полонская.
Гьемме бэхшвегиргьой фестиваль бири бэхшире оморе дипломгьоревоз. Бири гъэрор норе сохдеи фестиваль гьерсалинеи.
СОБКОР
Тержуьмесох Ильканаева И.
