Э вэхд ю герек гьисдигьо э республике пуьрсуьшгьо пуьруьш сохдет э гуьрдлеме зутеине штаб э зир рэхьберисохи жигегир векил нушудорегор президент э СКФО Магомед Рамазанов.

Э бине повестке – нисдсохи бире гъозиегьо ЧС э республике.

5 гьозор хунегьо, буланмиш биригьо эз сайлов фегьм сохде омори. Э могьлугълуье жигегьо тозеден гъуьч сохде омори гlовдоре расундеи, электрически ве газови комуникациегьо, рэхьмошини э омборте муьлкгьо э кор венгесде омори.

Э гlови объектгьо республике гировунденуьт темизсохе ве гъирогъмуьхькемсохе коргьо.

«Гереки теке жейлее руй биреи эки гьер зигьисдегор, кор сохде э угьоревоз, кире гьисди гьемме гереклуье документгьо, э угьоревоз, ки мидануь угьоре э гуьнжо овурде, ве э угьоревоз, ки мидануь вегуьрде кумекии эз бюджет не деригьо фондгьо», — гуфдири э товней гировунде оморенигьо кор Магомед Рамазанов.

Дес зере омори ве жугьоб органгьо хьуькуьм э руй биреи одомигьо. Рэхьбер хьуькуьм Сервор ве Правительство Республике Догъисту Махач Омаров мэгlлуьм сохди, чуьки э гирошдигьо мегь э региональни ЦУР дарафди экуьнди 17 гьозор руйбиреигьо. Гьемме угьо нуьвуьсде омори ве фуьрсори э герек гьисдигьо идорегьо.

Бэхшвегиргьо гуьрдлеме пуьруьш сохди гьемиге пуьрсуьшгьо хьозуьрсохи эки сафарчие вэхд кори, четинигьо дануьсде расунде муниципалитетгьоре контейнерни мейдонгьоревоз эри муьхькемлуье жэгlмиети хокору ве екигегьо.