Сервор Департамент эн граждански гъэлхэнди эн одомигьо генерал-лейтенант Олег Мануйло омори э Дербентски район, эри хуьшдени ю гъимет норе гъэдер гъуьчсохие коргьоре бэгъдовой келе ворушгьо.
Э рафдеи уре рэхь сохдебу жигегир эн пуреихдиерлуье нушудорегор эн Президент РФ э СКФО Магомед Рамазанов, региональни министргьо ве сервор эн Дербентски район Эльман Аллахвердиев.
Суьфде угьо рафдебируьт э дигьбон Мамедкале. Десде фегьм сохдет миенее школере №2, зарали зере оморигьо эз сайловгьо. Э инжо хундеи сер гуьрде омори. Песде десде рафди э район Михайловке ве э куче Заречни, эже гировунде оморени гъуьчсохие коргьо.
Жейлее тигъэт доре омори э дигь Араблински – э еки эз лап зарали зере оморигьо могьлугълуье жигегьо. Э жигенлуье школе, вокурде оморигьо гьеле э 1970-муьн сал ве хьисоб сохде оморигьо эри 410 хундегоргьо, омбаре зарали зере омори. ГьейсэгIэт хундеи эн э келе классгьо хундегоргьо гировунде оморени э гьевел биригьо богъчей гIэили. Оммо хундеи эн чуькле классгьо гировунде оморени э жирей онлайн.
Олег Мануйло гьемчуьн фегьм сохди хунегьой одомигьоре зигьисденуьтгьо э кучей Вокзальни. Одомигьо хуьшденишуь согъбоши гуфдирет эз сервор эн район эз Э.Аллахвердиев ве эз администрацие эн дигь эри зу кумеки сохдеи. Зараливегуьрдегоргьо тогIин сохдет, ки э угьо расиренигьо пулгьоре угьо вегуьрдет.
Э эхир десде фегьм сохди зарали зере оморигьо жигей дамбере эн Рукельски гIовдоне.
Бинелуье гъосуьт гофсохдеи э одомигьоревоз бири дореи пулгьо ве тегьер э гуьнжо овурдеи угьоре. Нушудорегоргьой эн федеральни меркез хубе гъимет дорет тегьергьой ниссохдеи эзуновлейге бире гъозиегьой эн сайловгьоре э Дербентски район.
