Э и рузгьо эки ме зенг зери хэгьергили ме Лидия Давыдова (Эммануилова) ве бэхш бири э меревоз дуь мэгlэнолуье хэберевоз эз зиндегуни хуьшде. Гьевелимуьнжи, э Википедие дарафди дофусзереи э товней эну. Гье и моле гуьрд сохди ве дешенди э сайт келеи кук ю Шабтай. Дуьимуьнжи, мэгlни э гофгьой эну «Муьгьбет, муьгьбет…» и пушогьо бири тержуьме сохде э иврит. Э пушо норе везифегьой Лидие ве мэгlжуьмлуье десде, э коминиревоз у кор сохде, ведешенди э тегьер гье и мэгlни гене ве э английски зугьун.
Мэгlни гlуьзетсохи эки Руз гьемме муьгьбетлуьегьо. «Муьгьбет, муьгьбет…» — пенжимуьн э хьисобевоз мэгlни Лидие. «Гимн Гlэжелсуьзе полк» бири гlуьзет сохде оморе гlуьзетлуье дипломевоз рэхьмедуьлие фонд CTMЭГИ, гьемиге мэгlлуьмлуьи мэгlнигьой эну «Кавказ», «Муьгьбетлуье Духдерле» ве «Романс». Гимн гьер сал нушу доре э гофсохдеи радио, гьемиге сес сохде э межлуьс э хотур Руз Хилосбиреи ве Азади 26 ияра, э акциегьо «Гlэжелсуьзе полк».
Мэгlни «Муьгьбет, муьгьбет…», — ихдилот сохде Лидия, — ме нуьвуьсдем эз чор сал омборте песово. Композитор гъобул сохди бишерксуьзе гъэрорнореи э гуьнжо овурдеи эри эну гьово музыкеи э жире рок-н-ролл. Суьфдеи уре веровунди исроили мэгlнихун Жанна Евдокимова, вегуьрдигьо дуьимуьн жиге э конкурс э Иерусалим. Эзуновлейге, э томошеи мейдонгьой Москов ве э телешоу «Чор Гlэруьси» уре веровунди мэгlлуьмлуье уруссиетие мэгlнихун Любовь Макарова.
И пушогьо э ме омори хэёл тержуьме сохде мэгlнире э иврит, ве иму э мэгlлуьмлуье э Исроил ве э серхьэдгьой эну десдей музыкантгьо гъэрор норейм э дегиширевоз э гуьнжо овурде, эри чуьки мэгlнире хунде э иврит – зугьун вилеет, э комини зигьисденим. Не денишире э четинигьо ве довгlо, э кумеки дореи Максима Хантаева ве Сары Брайнер, дануьсдейм тержуьме сохде уре ве э хэлгъ фирегь мэгlлуьм сохде тозе тегьер мэгlнире. Максим сохди эдебиетлуье тержуьмесохи мэгlни ве э музыкеи гъэдер. У мэгlлуьмлуье мэгlнихун, режиссёр анимациегьо, гуьнжуьндегор клипгьо, мультипликатор ве нуьвуьсдегор. Согъ боши уре ве Саре Брайнер – мэгlнихун, актрисе, вежегьисдегор, режиссёр-нушудиидорегор томошегьоре, фестивальгьоре ве шоу-программагьо (Music Providerm Dictrokid). Лап дуьруьжде согъбоши эз ме ве композитор Гирша Зильбера.
Гlэмел нисе оморе гlуьзет не сохде гlэжоибие гуфдире оморе хубе гофгьоре бэхшвегиргьой жугьургьо-догъи чат «Zuhun dedei», гуьнжо овурдигьо Фрида Юсуфова, желдлуье бэхшвегир комини экуьнди хьофд сал гьисди Лидия.
Зофруте овурденуьм гуфдире гофгьой Ада Хаимове:
«Лидочка, омборекбу э ведарафдеи мэгlни туь э иврит. Э суке музыке енебуге эстрадни эри веровундеи мэгlни дуь жире хьисоб бире эз гьемме гурундте эри мэгlнихундегоргьо, гье у – джаз ве песде РОК-Н-РОЛЛ. Лап хубе мэгlни бисдо, э у дегешди ве гофгьо, ве музык, эзуш бэгъэй э гьонине вэхд кеми ки нуьвуьсдени э стиль РОК-Н-РОЛЛ. Бежид сес доре мэгlнигьо э стиль: диско, шансон ве баллада-романс. Войге сохденуьм эри туь бэхдевери ве гьемме хубигьо, хьуьрметлуье Лидия иму. Гьемиге диеш нуьвуьсдеи сечсохдение мэгlнигьо».
Нуьвуьсди Хана Рафаэль
Тержуьмесох Ильканаева И.
Сирот: STMEGI
